Ahoihna mu in

Ahoihna mu in

Hoihmuhna (Optimism) vs Ahoihna Mu
Hoihmuhna cih kammal pen a ngaihsut huai thu khat hong hi ta hi. Christian te in hoihmuhna ih zatna ah a thu tawpna (the last result) pen a hoih lote hoih muh, a hoihte hoih muh thei nawn lo ah hong koih hi. Hoihmuhna ii a thutawp pen hoih het lo hi.

Gamlak Vakna 13: 30-14:6-12na ah thukan 12te lakah Caleb le Joshua in hoihmuh/hoihlaak ci-in kigen pahpah hi. A hoihmuh uh hi loin, Israel te gal a zawhpih den Topa’ hoihna a mu uh hi zaw hi. Adang thukan 10te’ muhna zong a maan mah hi. Ahi zongin amaute in Topa sungah upna le muanna nei lo uh ahih manin meidawi muhna tawh a kidim uh na hi bek hi. Tua ahih manin Canaan mite va sim loh ding thu hong hoih lak, hong hoihmuh uh a, mipi in sang thei uh hi. Joshua le Caleb in Topa’ muanna tawh gal sim ding le mainawt ding lamah a hoih muhna uh a gen ciangin mipi in suang tawh den lup sawm lai uh hi. Hih Lai Siangtho mun in hoihmuhna thu hong hilh hi loin, Topa upna le muanna tawh Topa a lungkim sak nasep sep ding thu hong hilh a hi hi. Topa a um lo a muang lote in Topa’ thuciam banga a kip thu-ummite’ thuhilhna le zia le tongte hong siat muh ding uh hi.

Topa in uisi khat ii a ha paak sitset a hoihna a mu hi beka, a hoih lopi a hoih muh hi lo hi. A vom kim lai a kaang a ci hi lo hi. Hoihmuh cih le a hoihna mu cih thu kibang lo hi. Ahihna banga mu cih le ahihlohna pi khat va hoihmuh cih thu kibang thei lo hi. Tuiphum Pawlpi sungah Tuiphum upna bangin a citak nuamte kihoih muh loin Limsang upna le Liberal Dikzuul upna thu a hah gente’ gen bangbang kihoih muh sawm mahmah se hi. Nomau’ pawlpi ciat zong en lecin uh tua cibang hoihmuhna hanga, thumaan-thutak pen Ni awk in a valh bangin hoihmuhna in Jesuh le a Singlamteh Tatkhiatna thumaan-thutak valh nuam in kamka ka khin hi.

Hoihmuh a sawm pha mahmahte in tulai hun zui-a a nungta siam lote a valval ding hi ta, cih kammal zang mahmah uh hi. A taktak in ci lehang a val cih bang kuamah ih om kei hi. Amau’ sial khekhap sunga gamtatna leitung bup sa a, a lawmte a val a sak uh pen a maizum huai mahmah ahi hi. Mite in bang gen, mite in bang duh, mipi’ deihna cih a bulphuhte pen a meidawi makaite’ zia hi zaw hi. Tua bang mite in koimah ah bulkip, mualsuang phuh makaih zawhna hong nei zo tuan het lo ding uh hi. Aungsan SuhKyi in mipi’ deihna banga a makaih hi lo a, ama’ makaihna mipi in kideih hi zaw hi. Mipi’ deihna ih cih zong mi tawm khatte’ deihna a kilawh gawp khawng hi lel thei hi. Tua hi in, nahoih semte kihoihmuh lo a, na hoih lo semte kihoih muh, thu gina lo gen giapgiapte, ciamnui nui theite le mite a lungkim sak thuhilhsyate’ hanciamnate kihoih muh ahih manin, nahoih sem, kisa zaw uh hi.

“Bangteng in Topa Lungkim sak hiam, ci-in kan un” – (Eph.5: 10). “Topa in bang a sem dingin hong deih hiam ci-in kan un,” – vs 17. Mihingte hong pahtak theih nadingin a gamta hi zenzen leng, Khrih’ nasem ka hi kei ding hi (Gal. 1: 10).
Topa’ Ni (Sunday) ni pen nute pate cihdaan a, mihing kilaitaat nading Ni hi loin Topa’ thawhkik Ni hi, ci-in thu a hilhte kihoih muh lo a, Topa’ Ni ih ci ta zongin Mihingte’ geelna bangbangin a kizang thei hi lel hi ci a, a utut a gente’ thuhilh bangbang a sia a pha kihoih muh kihoih lak sak sawm pha mahmah se hi. Mite’ a lungkim sakte kihoih muh a, Topa’ a lungkim sakte kihoih muh khin zo nawn lo hi.

suangdal

Tua ahih manin Topa Jesuh in, “Na gen peuh ahi ahih leh, “Hi” ci inla, ahilo ahih leh, “Hilo,” cihna tawh kicing sakin. Tua bang hi loin kiciamna kam na zat ciangin Dawimangpa tawh kizomin thumaan lo na hih lamtak hong kilang hi (Matt. 5: 37). Let what you say be simply “Yes”, or “No”; anything more than this comes from evil. Ahoihna le ahihna maan genna pen hoih gen, hoih muh, hoih lak kici thei lo hi. Thumaan thutak kisiat muh thei beka, thumaan sa, thutak sa hoih muh kul thei nawn lo hi. LST in hoihmuhna thu gen lo a, a hoihna mu cih bek gen hi.

Hoihmuhna in a hoih lote hoihmuh, a hoihte hoih sa thei nawn lo cih thu tawp hong puak thei ahih manin hoihmuh kei inla, a hoihna mu bek in. Ahoihna ih muh theih kei leh zuau thei kamsang thuhilh khialsyate a hoih muh minam ih suak kha ding a, ih tual sungah thumaanna le cihtakna hong tualbial thei lo dinga, a kilawm lopi khat in Pawlpi Tuucing, Gam-uk makai hong sem kha ding uh hi. Hoihmuhna tawh ih gam zuun loin, ahoihna taktak muh theihna tawh ih gam zuun in ih Pawlpi puahpha ding hi hang. Tua dingin Topa in thupha hong pia ta hen!

Evan. Suang Dal