Ahi bangin ~ Tdkhen

Ahi bangin ~ Tdkhen

1. Hong kipimuh hen cihna hikei; hong kineumuh ding ut lo; a hibang bangin!

2. Hong kiphat hen cihna hikei; hong kigensiat ding ut lo; a hibang bangin!

3. Hauh man-a kipimuh ding utna hikei; zawn man-a kineumuh ding ut lo; a hibang bangin!

4. Liat man-a kizahtak ding utna hikei; neu man-a kisimmawh ding ut lo; a hibang bangin!

5. Kamtam man-a kipil muh ding utna hikei; kamtawm man-a kihai muh ding utlo; a hibang bangin!

6. Piak zawh man-a pahtak ding utna hikei; piak zawhloh man-a kihawmthawh ding utlo; a hibang bangin!

7. Daupai man-a kimuanpah ding utna hikei; daupailoh man-a kinusiatpah ding utlo; a hibang bangin!

8. Kipilsakna hipah sam kei; kithuhilh cianga kihai kimuhna ut lo; a hibang bangin!

9. Ei’ zia banga mite tehteh ding hisam kei; mite’ zia tawh kitehteh ding zong hikei; a hibang bangin!

10.A lian khempeuh muanhuai khin sam kei; a neu khempeuh nopneh huai khin sam kei; a hibang bangin!

11.A tam khempeuh khamuanpihhuai khin sam kei; a tawm khempeuh khalaupih huai khin sam kei; a hibang bangin!

12.I dam laitakin i nat ding hong nai a; i nat laitakin i dam ding hong nai hi; a hibang bangin!

13.Cidam pen cinat sangin a hoihzawk mah bangin, cinat zong cidam sangin a hoihzawkna omthei hi; a hibang bangin!

14.Mite i en’theihna zong hoih veve, hanciamna hong pia hi; i en’lohna zong hoih veve, lungsim siangtho hi; a hibang bangin!

15.Vasa lakah vahui ham zaknop pen a, va-ak ham zakthadah pen hi; ahi zongin zumpih tuanlo hi; a hibang bangin!

16.A hoih lam enleng a hoih teng bek kimu a, a sia lam enleng a sia teng bek kimu hi; enkhawm leng; a hibang bangin!

17.A haute hau denlo thei a, a zawngte zawngdenlo thei-in, a sangte zong sangdenlo thei a, a niamte zong niam denlo thei hi; i hunzat laitakte a kibang khinlo ahi hi; a hibang bangin!

18.I muan mikhat a daupailoh ciangin a muanhuailo kisa thei a, i muanloh mikhat a daupai ciangin a muanhuai mah kisa thei hi; a hibang bangin!

19.Humpite ganhing lakah kumpi zah khat ahih hangin, a duh peuhpeuh nepahpah lo-in, aisanna tawh Pasian tungah an a ngen hi. I hihnate suang lo a, Pasian i hungaihna zong ganhingte sangin i hoihzawkna a om nai tuanlo ahi hi; a hibang bangin!

20.I suah ciangin kilungdam a, a si ding kihi gige hi; i sih ciangin kidah a, a thokik ding kihi gige hi; a hibang bangin! Tdkhen