Afghanistan nupi khat apasal in abil anihin at khiatsak

Afghanistan nupi khat apasal in abil anihin at khiatsak

Afghanistan gamsung, Balkh Province ah aom nupi khat apasal in abil alangnih in at khiatsak cih BBC News pan zanni in kiza hi. Hih nupinu in BBC te kiangah agenkhiatna ah apasal in hencipgawp a, tuakhit ciangin abil alangnih in at khiatsak cimawk hi.

Hihpen Domestic Violence kici innkuansung ngongtatna lianmahmah khatin ki ciamteh hi. Tua nupinu minpen Zarina kici a, tu’n ahihleh zato ah kikem in hoihtuam cihhangin thazawmcip in omlai cihi.

Mawhna khialhna kabawl lamlah kitheikei vengin, banghangin ka pasal in hihbang in kabil hong at khiatsakmawk hidinghiam ci’n genkhia hi. A pasal pen tulaitak Kashinda District sungah taimang ahih manin Local Police te’n azonsan laitak kici hi.

Hih nupinu Zarina pen kum 13 aphak in alawmpa tawh akiteeng uh hi a, akiteen khitzawh uh innkuansung pen nopsak hun tamlua khollo cihi. A pasal in zawhthawhlua in, anulehpa tetawh akimuhding zong phallo hi. Hihbang pasal tawh ka omkhawmzo nawnkei dinghi ci’n Interview khatah Zarina in genkhia hi.

A pasal pen mi amuangmawh pahpahkhat hi a, azipen pasaldang khatpeuhtawh akiho khakcingin muangmawh pahpahthei cihi. Tuahangmah inzong azipen avakkhiatding leh anulepa te kiangah ahawhding khaktancip hi.

Afghanistan gamsung ah numeite pen ki bawlsia phadiak hi. Domestic Violence ahuaisia akiciamteh te ahihleh:

January 2016 sungin numei akhangmoi mahmahlaikhat ahi Reza Gul pen apasal in anak tankhiatsak mawk hi. Tuapen Faryab Province sung aom Ghormach District sungah ahihi.

Tuakhit asawtlo in nupikhat apasal in vuakgawp, satgawp ahih manin, sihlawh dektak hi.

November 2015 kumsung in Ghor Province sungah numeino khat angkawm hi (Adultery – zi neisa pasal neisa kiang angkawm) ci’n ki mawhsak a, suangtawh ki denglum hi.

Adangdang numei ki bawlsiatna tampi om a, adiak in Aisha kici numeino kum 18 aphapan khatbang apasal in anak leh abil tansak mawk hi.

More: US galkap te’n Afghanistan ah nautang 33 that

Time Magazine te’n 2010 kumin hihvai hong suahkhiat uh ciangin leitungbup in theihlawh hi. Aisha pen atung Photo sunga anak ahengpen hi. A pasal in a at khiatsak cizen hi. Zomi sungahbel zi bawlsia, zi vuavua “Domestic Violence” cihte omlo hi ci’n kipaktak in midangte kiangah ihgen giapgiap ngam nading in hanciam ni. ZD Sawltak #zomidaily