Afghanistan gam ii khuapi Kabul sungah tuni Wednesday ni in Bomb puakkham in mi 64 sipah a, adangzong mi 320 takbang liam cih Reuters pan kizasawn hi. Kabul City sung aom Diplomatic Quarters sungah zingsanglam zunkahhun laitak “Rush Hour” in thupiang ahihi.
Afghan Officials te genkhiatna ah hih Bomb kitampen Suicide Car Bombing hi a, mi 64 in sihlawhkhin uhhi ci’n genkhia hi.
Bomb puakkham pen ginngaih mahmah in, agamlapi pekpan inzong meikhu vommeimai in vandawn ah akhuto zaizai kigalmuh theihi.
Ageina ah amukha te genna ah tua Bomb apua mawtaw pen apuakkhap khitciangin ageinai aom mawtaw tezong awkcipgawp in, mizong tampi aliamgawpsa kimuthei cihi.
Video etnopleh: Massive blast near Indian embassy in Kabul’s diplomatic area
Diplomatic Quarters sung ahih mahbangin tualai aom French Embassy leh German Embassy tezong hih Bomb Attack hangin siatna om cih kiza hi.
French minister Marielle de Sarnez in agenkhiatna ah French gammi pen tuciangciang asi aliam kuamah kizanailo ci’n genkhia hi.
Ahi zongin French Embassy sungah vanzat honkhat kisia ci a, tuaban ah Germany Embassy zong sukha cihi.
Related: Afghanistan ah US te Bomb khiatna hangin asi kibehlap, IS migilo 92 si ~ ZD
Hihzah in ahuaisia Suicide Car Bomb asukham pen kua kipawlna cihpen kipulakna omnailo hi. Nungdiak inzong IS migilo te’n Afghan Capital sungah tamveipi Bomb sukham zelzel uhhi. May 03 ni in NATO Convoy te ngimin asukkhapna hanginzong mi 8 si in 28 bangin liamlawh uhhi.
Comment piaknop aomleh...