Abraham Lincoln sakol tai kidemna ah

Abraham Lincoln sakol tai kidemna ah

Sakol tai kidemna ah khuapi kiimkotin a tai uh ahi hi. Abraham Lincoln zong a masa lamah pang vava pahlian hi. Tua zanin huihpi nung ahihmanin vasano khat a bu panin huih in a letkhiat, lamlai ah a mu hi. Tua vasano a muh ciangin nusia ngam lo-in, a sakol khawlsakin tua vasano tawmin, a kiim a paam a bu zongin a va koih kik hi. Tua teng kalin a lawmte in a makhelh khin uh hi.

A lawmte tung khinta uh a, amah mual hong suak thei lo hi. Bangci hiding hiam ci-in a kidot uh ciangin, pawlkhat in, “Vasano khat a khut-ah tawi-in a khuadakdak ka mu” a ci uh hi.

Tua banga a kikup ngeingai laitakin, mual hong suakin hong tai vangvanga, “Vasano a bu ah hong koih thei kik ing ei” ci-in hong kipak mahmah mawk hi. Mite in, “Pawi thupi (kidemna) hizah lai ah vasano khat buaipih zo maw” ci-in lamdang kisa mahmah hi.

Ahizongin amah’n a dawnna ah, “Tua vasano taisan leng, ka nuntak sung lungnuamin hun ka zatngap kei hi” a cih san ziau hi. Tdkhen

Abraham Lincoln (America President 16 na) a khangno lai hun

Abraham Lincoln a khangno lai hunin amau innkuan leh a inn veengte tawh khua a lal uh hi. Phalbi sung hi a, khua vot lua in luituite zong a khal dekdek hi. Lui lian sim tham khat tuak uh a, maingap phalo pipi-in a kan tan zo liai’ uh hi. Luigal a tun lianleh a veengte’ uino phawk kha lo uh ahihmanin, uino zong patau-in a kapkap hi.

Tui nakvot lua ahihmanin, uino neite in, “Hua uino puui ni cileng khatvei kileh kik kul dinga, tu-a bek zong a sidek tak hi’ng! Bangbangleh paisan lel ni” a ci ta hi.

A khangno Abraham Lincoln in a veengpa’ thu gen a zak ciangin, “Hua uino ham leh a meel pen ka mitkha leh ka bilkha ah mang nawnlo dinga, ka nusia maimai thei kei hi” ci-in kithawi cingtengin a veengte’ uino a va puui kik hi. Tdkhen

Phamna daai-ah gial bang khin-pih ta!

Scotland gam Edinburgh khuapi ah tuucing puteek khat a uino tawh a peem hi. Amah a sih ciangin a uino zong a pu’ gei a lawi nawn kei hi. Mite in hehpih huai sa in a pu a kivui ciangin tonpih uh a, daai panin a kiman ciangin uino ciahpih ding a sawm uhleh ut lo hi. Hunkhat sung buai uh a, “Ahihleh,” ci-in nusia phot uh hi. A va puui’kik uh hangin ut nawn mahmah lo a, a pu’ kivuina tungah lumin, mite in hehpihin an a kipuak den hi. A pu’ sih khit kum 12 ciangin amah zong a si ta hi. Tdkhen