A Vang Liat Na

A Vang Liat Na

Kumpipa leh Galkap mangpa ki thukimin minam khempeuh thah ding laibawl
uhhi. Hih thu Isreal gam sungah laihawm uh a, tua lai a ngah mi
khempeuh;

Sangkah dingte kah nawnlo
Na sem pai dingte pai nawnlo
Khualzin dingte zin nawnlo…uh aa, Isreal mi khempeuh a munmun ah kap uhhi.

Kumpipa leh Galkap mangpa thukimna sung panin Leitung dan ah
suahtaakna ding lampi om nawn hetlo himah leh Pasian dan ah lampi om
lai veve hi. A munmun ah lungkham mangbang i om kha hiam?

A minambup un Ni Thum Sung anne lo, tuidawnlo in aneu alian in thungen
uh hi. Tua zawhteh Pasian in a minambup un suahtakna pia hi. Minambup
suahtakna pen Antan thungetna hilo hiam? Pasian tungah i vai i apna
pen muanna hilo hiam? I vaite aplohna pen ei leh ei ki muanna hilo
hiam?

Esther bu sung ka simteh Antan thungetna in a vangliatna leh
gualzawhna tampi hong musak hi. Lungdam.

Thawn Tuang
Nashville TN USA
Sept 11,2015