A theihhuai upna laang (No. 4) ~ Langh Khan Mung

A theihhuai upna laang (No. 4) ~ Langh Khan Mung

Prosperity gospel in hauh ding leh dam ding a bulphuh theihna uh in LSTho pen a deihna munte teptan kawikawi-in a kigelh a mal lianin a khiatna uh pan hi.

Mikangin “a literalist exegesis of some biblical texts that are taken within a reductionist hermeneutic” kici hi.

Zeisu pen Topa hina panin leiba neipa suakin, Kha Siangtho pen mimal khat ciat i nopsakna dingin vangliatna a nei nasem hong suaka, Pa Pasian pen a piansakte’ i kisapna, deihna, lunggulhnate a kicingsak, hotel bang hileh zite’ van a tawisakpa hong suak hi.

Hih thu asangte’ thuhilhna-ah kam tawh pulakna thupisak mahmah uh hi. Tua banga pulakna pen “word of faith” ci uhin, thu-um mite nuntakna-a Pasian kammal LSTho’munah koih uh hi. Upna a zawngkhal kei nak leh Pasian’ min tawh kiptak leh khotakin i pulakkhiatnate in nate piangsak, khelsakzo ding hi ci uh hi.

Tua ahih manin mikhat in thupha leh hamsiat, ama’ tunga a thupiangte ama’ kam pana a pusuak kammal hang hi. Thuhilhte in na kamah nalamdang om hi-There is a miracle in your mouth” ci uh hi.

Hih bangin a pianna dingin na lunggulhte kician leh tel mahmah in. Na kamin lokhia in. Pasian’ vangliatna leh upna hangin ngahkhin ing kici in. Thuhilhte in Pasian kamciamte (the promises of God) a kam panin a genkhiatna tungtawnin, Pasian pen tua thuhilhte i kammalah thong kia-in kihen-kikhih hi cih upna tawh mu ding hi ci hi.

Cidamna zong thupisak uh hi. LSTho kammalte, thudikte lungngai-in kam tawh i pulak ciangin, lunggulhnate a tangtungsak ding vangliatna hong piang hi. Zeisu’liamma tawh ka damzo hi-By the wounds of Christ I have already been healed ci uh hi. Amau ngaihsutna uah, hih bangin i cihna in damna ding Pasian thuphate hongin, khahkhia-a kidam hi ci uhhi.

Damlohna,zawnna, tuahsiatnate pen a kicing upna, a thakhauh upna neihloh manin kiphukha ahih manin, hehpihna leh kikhualna omtheilo hi. Hihbanga a guallelte pen Pasian in itlo hi cih hisawnsawn hi. (zomlai ding) Langh Khan Mung