A suakcil naungek bangci kepding? (2) ~ Cing Van Kim

A suakcil naungek bangci kepding? (2) ~ Cing Van Kim

B. NAUDAP ZATNA

1. Nau suahma
* Na zat ding naudap te kaikhawm khol in.
* Naudap thakte sawp khol in la, taih sitset in. A ki sawplo naudap thak a zang kha naungekte a ci phual baih uh hi.
* Zatui tuamtuam le a namtui tuamtuam tawh diah kei in.
* Ahih theih leh tui a huup thei naudap kaang hileh hoih pen h

2. Naudap laih zia

* Naungek in zun le ek a thak leh laih sak pah in. Zunsa, eksa tawh a vun na pol man kha ding hi.
* Na laih ma in a kisam ding van le nate a nai ah koih khol in. Naungek kia nusia kei in.
* Pat siangtho hual in la, tui lum milmial sungah na diah khitteh a taw le a khaal teng a nunglam pan a mailam manawh in siak sak hialhial in.

* A ngawng a lenuai le a khaal kawma om a baalte pat le tuilum milmial tawh silkhiat sak in.
* Naungek vun ngek mahmah a hih manin nak siak lua kei in la, naudap tawh siak mang kei in.
* A sian khitteh a siangtho a keu naudap tawh laih sak zeel in.

3. Naudap hangin a piang vun san, ciphual te

* Zun le ek a thak khit zawh naudap laihsak pahpah lo-in sawt koih khaleng piangthei hi.
* Naudap thakte sawp siang lo-in zangh pah leng zong a ciphual thei hi.

More: A suakcil naungek bangci kepding? (1) ~ Cing Van Kim

* Zun le ek a thak khit sim naudap siangtho tawh laih sak pahpah in.
* Huih ngah sak zeel in.
* Powder tuamtuam zang kei leng hoih zaw hi. Lia Cing Van Kim