A siding ka hihlam ka kitheih ciang ~ Deih Tung

A siding ka hihlam ka kitheih ciang ~ Deih Tung

Ka nasep na setzung pan in nasep ka tawp a, ansai khat ah na sep ka dawp hi. Setzung nasep pen khasum tawm lua in laibu tawh ki om lai a hih man in nasep hoih, kha sum hoih a zong ka hihi. Tropicana city mall (Overtime) ah nasep ka va dawp leh Manager pa pen Malay te na hi a, na thu nop mah mah hi. Nasep a ut takpi na hih nak leh tu laitak nasem deih kin ka hih man un hong siau masa sa ka lak uh hi hong ci in nasem ding in hong sang hi.Mangpau leh manglai siam lo ka hih man in kei pen kuangsawp, hai sawp cih dan khawng in a ki sapsap na ah asem kawi kawi ding ka hihi.

Inn nung lam ah nasep a om bang bang ka huh a, ni pi khat sung bang ka sep khit teh inn mai lam a sem te mi ki cing lo a hih man in manager pa in inn mai ah kuang hem ding in kei hong koih hi. Kuang khawng hem zel in tua dan teng tawh Customer te in na hongsawl sawl uh a hih man in kha khat bang ka sep khit teh order ka la thei ta hi.

Ka sai uh pen mundang ah zong hong ki phuat beh a, Kepong Overtime ah kei hong ki pai sak hi. Kepong ka tunciang in kalawm te lak ah a hai pen, pau a theilo pen ka hi hi. Kepong a ka manager pa bang in lamdang hongsa liang hi. Bangmah a thei lo pi waiter a semsem ka hih lamhong theih teh lamdang hongsa in hong encik den hi. Lai sim thei mel lo ka hih man in order khawng ka khial mun mah mah a, sum tam pi pi ka liau kha den hi. Ka manager pa bang in pen hai hongsa lua in Boss ci in hong engsap zaw lai hi.

Hai luavet ka hihman in kalawm te in a mau hai na a selna ding un hong deih bil bel uh a, lawm te khat a khial a om ciang kei hong ngawh ziauziau uh a, ka lawm te taang in tam vei pitak taai ka thuak sak hi. Ka manager pa leh ka Boss te un ka laibu a tettan tu hunta a hih man in sisit un hong ci uh a, si hong sit sak uh hi. Ka si sit khit zawh uh ni pi khat ciang result a ki thei ding hi a, nung kum in zong bang mah natna nei lo ka hih teh cih na tawh bang mah ka pa tau kei hi.

Ka sai uh pen Saturday ni sim mi tam mah mah a, ki buai thei mah mah hi.Saturday ni khat pen kasai vuah ka manager te, ka Boss te uh hong pai kim uh a, lam dang ka sa sim sim hi. Ka lawm te khatkiang bang ah mai kal pen ei morning shift hi ni maw? Mai kal ih offday ciang Rawang tuizeeu va pai ni ci in ka gen a, a hi zong in ka lawm te in hong mai tai lua lo uh hi. Ka lawm te khem peuh pen nidang sang in mai gum zaw uh a, dah mel thei mah mah uh hi.

Sai ka khak khit uh ciang in nidang in hi leh kitchen a sem te, Bar te khawng pen a ciah ziau ziau uh hi a, hih ni pen na ciah nai lo uh hi.Ka manager pa un nasem khem peuh Boss teng tawh meeting nei ding hong ci a, lam dang ka sa hi. Ka vek un ka kim diu deu khit uh teh ka manager pa un ka supervisor pa kiang ah gen ding a ki lawm teng gen in ci a, ka supervisor pa un kei hongsam hi. Ka lawm te khem peuh ki kal ah kei ka tu a tua ciang in ka supervisor pa in thu hong gen hi. Nang pen na sisit na ah onglo na hih man in mai ni li ni na ciah kul ding hi.

Vanleng letmatding zong Boss te in hong lei sak khin uh a, bang mah lung patauh ding om lo hi hong ci hi. A hi zong in ka nasep pih te leh ka boss te uh a khitui uh luang a, ka dah sem sem hi. Bang hang hiam cih leh ka nat na pen tuapcancer hi ci in siavuan te in gen uh a hih man in a kua matek in adam zo nawn lo ding cih hong thei uh hi. Tua ahih man in zong ka lawm teng amai gum uh ahi uh hi. A siding ka hi mawk ve maw ci in ka ki theih teh ka ngaih sut na hong ki dang a, ka hun lui te ka phawk kik mah mah hi.

Bangbang hi leh mangpha khak na cih na tawh ankuang um khop na kanei uh a, kua mah in an ne zo lo uh hi. Nidang in an kuang um khop na kaneih uh teh nuamlua in tam pipi ka nek ziah ziah lai uh ka phawk tek uh hi. Kawlsai khawng ah vak khawm in, KL khawng ka vak lai uh ka phawk sem sem uh a, ka ki khen ni ding uh ka lung ngai zo kei hi. Tua bek hi lo in ka nu leh ka pa kiang ah bang ci gen ding ka hiam? Ka dam loh lam ka nu leh ka pa in thei mawk le uh bang zah in dah mawk ding uh hiam cih ka ngaih sut khak teh ka khitui luanglo in ka om thei kei hi. Ka nat na in tuapcancer hi mawk a hih man in kei pen hih leitung nuntak na pan in a tawlnga ta ding cih ka ki thei a, kalawm te ka it ka ngaih teng tawh a ki khen ding ka hi ta hi.

Dam zo nawn lo ding cih na tawh mi tam pi tak in mangpha khak na dan in sum tam pi hong pia uh a, ka saivuah customer tam pi tak in zong huh na hong pia uh a hih man in sum tam pi tak ka ngah hi. Hih thu ka theih a ki pat ka ihmu nawn kei a, ka nuntakna hun hoih lai a ka gamtat na sa te ka kiphawk kik mah mah hi. Ka it ka ngaih teng tawh ka ki khen ni ding hong tung ta a, ka nasep na pan in vanleng tual pi ah ka lawm teng in hong kha in ka ki kap ziahziah uh hi.

Vanleng tung ka kah lai tak nangawn in ka lawmte in SMS hong khakkhak lai uh a, Good bye, Bye bye cih vive a hihi. Hih kammal pen nidang in ka mawk zatzat kammal a hih tei hang in tu a good bye cih lian pen kei ading in hong sukha mah mah hi. Cik mah hun in a ki mu kha nawn lo ding ka lawm ngaih teng in mangpha hong khak na uh leh ka nasep pih ka lawm teng phawk kawm sa in ka khua uh ka ciah hi.Muh na khem peuh in lungleng huai kasa a, hih leitung nuntakna pammaih ka sa hi.

Inn katun teh ka nu leh ka pa in zong hong thei khin uh ahih man in ka nu leh ka pa a lup na tung pan un a kapsim lam uhka za za hi. Ka nu khitui ka nulsak nuam mah mah a, va nulsak leng ka nu khitui a tam semsem ding lamtak ka thei hi. Bangbang hi leh ka natna pen tuapcancer natna tak tak hiam? bang nat na hi a, bangtan vei nungta lai ding ka hiam ci in ka khua vuah ka ki sit sak pha uh a, a result hong ki theih ding ka inn kuan un ka ngak uh hi. Nidang in ka tan 10 ongsazian a ki theih ding a, ka inn kuan un ka ngak lai khawng uh ka phawk hi. Tan 10 ong ka hih man in ka nu leh ka pa a mai uh tai mah mah hi.

Tu tung a result ka ngak uh a hih leh bel lam etna a bei ni result a ngak ka hi mawk uh hi. Siavuan pa in ka sisit na result laidal hong tawi khia a, lam et bei sa in bang a ci hiam ci in ka pa in dong hi. Siavuan pa in bang mah nat na om kei ci a, tua kam mal kazak teh ka mangtawh ki bang ka sa hi. Ka pa zong a za lo tawh ki bang a ka nu in bang e? ci in ka inn kuan un ka ki en uh hi.

Siavuan pa in bang mah nat na om lo hi. Hoih tak a, a ki sit hi a cidam sin sen hi. Bang mah lung patau kei un hong ci a, lam dang ka sa semsem uh hi. Ka inn kuan un lamdang ka sa mah mah uh a, bang bang hi leh zato pi khat ah va en sak pha ni ci in ka va et sak leu leu uh leh zong natna bang mah om lo hi hong ci in uh a, a dam sin sen mah ka hih lam ka ki thei hi.

Si ka kisit na pan in a sitte in midang a tawh kasi khek kha uh a hi hiam? Topa in ka natna hong dam sak a hihiam? Bangbang a hi zong in ka natna pen om lo hi cih ki theilim lim ka hih man in Topa hoih na hangbek hi cih ka thei hi. Hih leitung ah tomno khat sung bek a nungta lai ding ka hih manin nahoih tam pi ka sem nuam hi. Asi ding hi ing cih ka ki theih lai tak a, ka sep nop, ka lungtup te Topa in sepkhuan hong pia in nuntakna hong kawm lai hi ci inka kithei hi.

Keimah in hih leitungah khatveibek piangin tomno khatsungbek a nungtading ka hi hi. Tua a hih ciang azenzen in hih leitungah itna, hehpihna nei in lahthei nading (a hihkei leh) leitung ading in nahoih khat peuhpeuh septheih nading hunmanpha kaneih leh itsik lo, zekai lo tak in tu mahmah in kasem ding hi. Bang hanghiam cih leh ka nuntakna tomno sungbek a hihman in nidang ciang hihbang hunmanpha ka ngah kik ngeiloh ding lam ka ki thei hi.

Lunggulhna, tupna kician nei a, a hanciam mi ading in hih leitungah a piang zolo ding a om kei hi. Deih Tung (Hih ka laigelh pen ka tuahkhak taktak thu hi lo hi cih hong thei sak ing)