A picing zaw a Minam it kisin hunta ~ Pau Khat Suan

A picing zaw a Minam it kisin hunta ~ Pau Khat Suan

Zomi kahi hi. Zomi nu le pa sungpan kapiang a, Zo an ne in Zogam ah ka khangkhia hi. Zomi hihna kei’ tel hilo a, kei deih le deihloh tawh zong kisai lo hi. Ong piangsakpa in Zomi a ong piansak hi a, vantung gam katun ciang nangawn in ka kipatna ong kidong hileh Zomi, Zogam pan a ongpai hi’ng kacih kul lai ding hi. Hihpen kei’ tel hilo, kei’ nasep zong hilo, kei’ ut le utloh tawh kisai lo, ka hihna ahi hi.

Sidek liang in kalaih nuam phial zong in kasi kasa kilaih theilo bek hilo, kei ut-tel a apiang hilo kahihman in Zomi hihna kalaih thei ngeikei ding hi. Namdangte’n ong ngai mahmah in, keizong ka ut mahmah phial zong in namdang ka suakthei ngeikei ding hi. Ka Zomipihte’n ong ngai kei zong in ong paithei tuanlo ding a, ong deihkei zong in ka Zomi hihna ong suahkhiatsak theilo ding hi. Banghang hiam cih leh amau’ hang a Zomi ahi cihbang kahi zenzen kei hi. Amau tawh zong a kisai kilkel lo thu ahi hi.

Hih ka hihna pen ahi a kasan ziau lel ding leh ka nuntakpih ding hi a, ka nuntakpih siam leh kei leh ka mipihte hampha in, ka nuntakpih siam kei leh kei hamsia in, ka mipihte mindaisak, sumsak kahi ding hi.

Kei namdang ka suah theihloh mahbang in ka hihna midangte ka piaktheih ding zong hi tuanlo hi. Ka it ding leh ka hihzawh leh kanam phattuamna ding ka hanciam ding hilel hi.

Ka mipih, ka nampih khempeuh zong kei bangmah ahi hi. Kei a tuam, a phadeuh a ki-itsak, it phadeuh kineih sawksawk saaksaak sese akul zong hilo hi.

Kei mihing kahihna leh kapianna ka dignity hi a, ka nampih ka mipihte mimal khatciat zong keibang mah a amau’ hihna a dignity ciatciat uh hilel hi.

Mihing khat hihna leh mi cingtaak khat hihna tawh ka dignity kakep bang in, midangte’ dignity zong ka thusim leh ka zahtak sak akul leh a kisam ahi hi. Ka dignity abuse sawm mawkmawk a om leh hehtheihna ding thuneihna kei’-a hi a, midangte’ dignity abuse kha mawkmawk kahih leh mi gina lo kahi ding hi.

Minam ki-itsak phatdeuhna tawh i nampihte’ mimal dignity ahi zong in, Nambup dignity ahi zong in abuse a, mimal angsung hamphatna ding hanciam niloh khawlsan huai hi. Tuabang ginatlohna e’n i nusiat bang in, tua bang a a-ginalote zong nusia ta ni.

I ngaihsut ding, i gen ding, i sepding pen “Minam ki-itsak, it phadeuh kineih a ei’ cihbang a cilo khempeuh thu khen a galgiikna tawh nampihte’ dignity abuse ding” hilo in, i minam bup nuntak khuasak, pil le siam, neih le lam ki-khangkhanna ding septheih bawltheih a om bangbang ei’ munciat pan hanciam ding ahi hi.

Kipawlkhawm a hanciam a kul hun om a, mimal a hanciam a kisap hun zong om hi. Midang tawh kipawlkhawm a sepkhop bawlkhop bek minam tawisangna hilo hi.

Mimal in pil mahmah in, namdangte’ zahtak mi suakzo hile hang i ommuan a minam tawisang kihi lel hi. Tuabang mah in, mimal in siam mahmah, hau mahmah lehang zong tuamah hilel hi. I hihna, i omna mun pan i minam i zumpih mawkmawk loh ding a thupi ahi hi. It phadeuh kineih a, akpi tuitha kawkek bang a dian’ sawksawk, ot daidai a kisam hi hetlo hi.

Midangte’ Zomi hihleh hihloh thu vakhen ding zong ei’ nasep hilo hi.

I minam i it takpi leh it ngiungeu in Minam leh Gam ading i septheih bang sem, i sintheih bang sin, i gen theihbang gen, kihilh kihuai in ma pangkhawm ni. A picing zawdeuh a minam it kisin ni. Pau Khat Suan