A nasep a sem nasempa ~ Pau Khat Suan

A nasep a sem nasempa ~ Pau Khat Suan

Sang siapa’ nasep pen laihilh hi a, laihilh lo hileh a nasep a semlo hiding hi. Tua a nasep pen ama’ ading in nuntakna zonna, kivaakna nasep ahi hi. Sangsia sem hi napi laihilh kei mawk leh a nasep a semlo hiding hi. Laihilh a a nasep a sepman in zum lai at khat sang a thupi’ zawkna om tuanlo hi.

Pastor khat in pulpit pan thu a gen ding pen ama nasep ahi hi. Aman thugen in apawlpi mite thungai ahihman in amah bek thu a genthei cihna hipah tuanlo hi. Aman ama’ nasep a sem ahi hi.

Tua sangsia pa piang leh adang khat in ong laih a, laihilh kipelh tuan lo hi. Tuabang mah in Pastor pa in hun a zatloh, pulpit pan thu a genloh nipi ni in adang khat in hunzang in pulpit pan thugen a, kikhopna ah hunzang bei tuanlo hi.

A nasep a sem khat a nasep a sem hilel a lamdang gen vangvang ding omlo hi. Tua nasep semding a panmun la napi a sep kei leh maban ki tasam ding ahihman in midang in a septheihna ding a mun a ot ding ahoih ahi hi.

Lai hilh theilopi in sangsia sem leh kisum mahmah a, thu gen theilo pi in pastor sem leh pawlpi kilamthakna om theilo hi. A sep ding a theilote in nasep theihna panmun alak ciang makhak suak a supna piangsak zaw ahihman in tua panmun la kei leh hoih zaw ding hi. Pau Khat Suan