A minthang boxing ki tumsiam pa tung pan thalakna

A minthang boxing ki tumsiam pa tung pan thalakna

Kum 37 a pha boxing tumsiam pasal Manny Pacquiao pen Dec 17, 1978 ni-in Kibawe, Bukidnon, Philippines ah piang hi. Sanggam 6 nei hi. Amah pen kum 6 a phak in a nu leh a pa ki khen hi. A ki vak nang uh a Nu bek in dinzolo ahih manin kum 14 a phak in nasemin a sanggam teng vak hi. Tua ahih manin sangkah theilo hi. A biakna pen RC pawlpi hi aa, biakna azui mahmah ahih ban-ah Pasian a zahtaak mahmah pa ahihi.

Kum May 10, 2000 kumin zi neih in tu-in ta 5 neih hi. Tu kha pen a zi neih kha ahihi. A zi neih zawhteh sangkah maban hong zom kik thei-in 2007 kumin amah kum 29 pha hi mahleh High School zomin zo pan a, kum 2009 kum in Honorary Degree of Doctor of Humanities (Honoris Causa) cih Southwestern University (SWU) ah Doctor ki pia hi.

Philipines pan boxer pa Manny Pacquiao pen leitung ah zawhna sagih, gihna sagih pan a lapa hi. Gihna nam li ah lineal championship a lapa hi a, tu laitak “No.1 boxer pound-for-pound” a hi hi. Ama tup khempeuh a gikna kibang peuh leh a zo denpa cihnopna hi. Hih zah a kitup siam pen a lamdangin a ki ngaihsun ahihi. Tu kum May 2,2015 in mivom pa tawh a liang na pipi in ki tumin hong lel mawk hi. Cidam sinsen in ki tum hileh zo ngel ding hi kici hi.

Kumkhat a summuh a tawm pen USD 40 millions pha ki ci hi. May 10, 2010 in Member of Parliament dingin kitel a, professional boxer lak pan MP a sem masa pen zong ahi hi. A thu aki cing zaw in na simnop leh>>http://en.wikipedia.org/wiki/Manny_Pacquiao

Nu leh pa lemtanglo panin khang khia himah leh ka khan khiatna diklo manlo cilo in hanciam vitvet hi. Ama tung panin thalak huai pawl khatte in:

* Pasian a zahtak in, nisim Lai Siangtho sim
* A Nu a huh nopna
* A sanggamte a vak nopna
* Zi neih zawhteh sang kahna
* Pilna thupi hi cih tel in kum tampi khitteh aban zom
* A thanem ni, a lungdamni Topa tungah lungdamko veve
* A piang khempeuh Topa in theihi cih tel hi
* Tupna hanciamna nei vilvel hi

Mi pawl khat in Pasian thu umta keileh ahanciam mi ahih nakleh a tupna tan tung vive inteh ci thei hi. Hi kha mah inteh. Thukhat om hi. Hatna hauhna pilna nei-in i lungtuptan i tung zongin Pasian hong piak hi, Pasian hang hi….icih thei keileh amaimang thei hiziau zel hi. A kip a khosak pen Pasian bek hizel hi. Titanic Tembawpi te, World Trade Center….cih bangte ngaihsun leng Pasian in a siacip dingin a phalnak leh haksa hetlo na hizel hi. Leitungah Pasian tawhlo in ngaih muan ding khat beek omlo hi. Pasian amuanman, a zahtak manin gentheihna pan nopna, min thanna, hauhna, pilna…cihte a ngah ahi pasal pha Manny Pacquiao tung panin thalak huai tampi om lai ding hi.

Zomite hong Angvan Pasian tawh ton khawm denni. Lungdam.

Thawn Tuang
May 21,2015