A manpha Nute’ Ni ~ Rev. Khoi Lam Thang

A manpha Nute’ Ni ~ Rev. Khoi Lam Thang

A khangto minamte in pianna Nute zaktakin thupi sim ciat uh hi. Sente le Kawlte bangin pasian zahin zahtakin bia uh hi. Leitungah Nute’ ni taktak hong piankhiatna pen a nu a itluat manin pasal zong nei lo-in, a nu a sih dong a kem Anna Jarvis hanciamna hi ci-in kiciamteh hi. Anna in a nu’ sih (1905) khit ciangin nute’ thupina phawk phapha hi. Nute’ ni neih ding hanciam hi. 1908 kum ciangin a pawlpi in thukimpihin Nute’ ni bawl uh hi.

Hih thu hoih kisa-in pawlpi sung bek hi lo, US gam sungah hong kizel henhan hi. 1914 kum ciangin US President Woodrow Wilson in gambup a bawl dingin kipsakna thu tangko khia hi. Hi ci bangin leitung ah Nute’ ni hong kizel hi. 2011 kuma dingin May 8 NUTE’ NI ahi hi. Kei a dingin Nu lo tawh Nute’ ni a masa pen kum ahi hi. Mimal kim kihel theihna Nute ni- bawlzia ding ka ngaihsutsut ciangin:

Nute’ ni Kam tawh bawl dih ni. “Pasian aw! hih bang Nu nong piak ka lungdam ci-in kam tawh pulak ni. Tua khit ciangin, “Nu aw, hong it ing. Nu aw, hong maisak in, Nu aw, ka lungdam.” cih kammalte cilbawl lo-in pulak khia ciat ni. Zomite pen “Hong it ing” a kici dakdakte hi khol lo hi hang. Ahih hangin khangthak hun ah, ngeina thak suaksak ni.

La sasiamte la phuaksiamte in la pahtawi ni. Biakinn ah le innkuan kikhopna ah nute pahtawina thu gen ni. Khualgam a omte in phone tawh hopih ni. Naupang a pauthei cilte in nu nu, pa pa a cih theih lai a, nu le pa a lungdam zahin nute lungdam mahmah uh hi. Nute lungdamna in tate a dingin thupha ahi hi. Nu tawh a om khawmte in hong it ing i cih khit ciang, i nu biang nam dih ni.

Lungdamna khitui mualtuang pelmawh ding hi. Nute tungah i itna, i lungdamna muhtheih gamtatna khat teitei tawh pulak hamtang ni. Nu tawh a omkhawm lo tate in email khak dih ni. Lai khak ni. A sihkhit cianga email le laikhakte nute in za thei nawn lo uh hi.

Neihna tawh kizui-in letsong pia ni. Neuno khat ahi zongin lungdam mahmah uh hi. Mangngilh lo-in gengen uh hi. Nute ?a dam sungin i piak theihte suangmanpha sangin manpha zaw a, a om nawn loh ciangin bangmah kipia thei nawn lo hi. Nute tungah i lungdamna i kamin gen khin zo ngei lo ding hi. I neihsa in lak khin zo ngei lo ding hi.

A taktak in nute in i kamsiam hong lamen masa lo hi. I letsong lunggulh masa lo hi. Muanhuai tak a i nuntak ding hong ngak gige hi. A khanggui a zom ding ihih lam phawk gige uh hi. A kum uh tam deuhdeuh tate tungah hong kinga deuhdeuh uh hi. Tua ahih manin i nuntakna tawh nute tungah lungdam ko ni.

• Nute’ theihin hi ta leh a theih loh in hi ta leh,
• Nute’ muhin hi ta leh a muh loh in hi ta leh,
• Nute’ dam lai hi ta leh a sih khit ciang hi ta leh,
• Nute’ tawh i om khop ciang hi ta leh i kigamlat ciang hi ta leh
• Nute’ lunggimsak ding nuntakziate pelin,
• Nute’ lungkimsak ding nuntakziate nei-in,
• Sih dong nuntak sawm ciat ni.
• Tua ciang bek in a sang penpen in Nu aw hong it mahmah ing a cici i hi ding hi.

Tua hi leh i nute lungmuang ding hi. Koikoi ah i tung zongin a tawldam ding hi. A sih ciang nangawn in lungkim takin leitung nusia ding hi. Pianna nu nei nawn lote in zong thuman le citak in nungta-gamta le hang i nu’ kha siangtho a omna pan nuihmaisa-in thupha hong pia ding hi. Hih a tunga thuthum teng lungngai kawm-in 2011 NUTE NI zang khawm ni. Nute itna tawh, Rev. Khoi Lam Thang (General Secretary, Bible Society of Myanmar)