A mannei mahmah Guakung (INBAR)

A mannei mahmah Guakung (INBAR)

ZomiDaily :: Khuahun siatna hangin alungkham mahmah leitung gamtuamtuam makai Leader te’n Guakung ngaihsuthuai hi ci’n International Network for Bamboo and Rattan (INBAR) in genkhia hi. Guakung pen adang singkung tetawh tehna in tawmman mahmah a, akung khangbaih in zong to mahmah lelhi. Tuabanah huihnin (Carbon Dioxide) hup thei ahih manin, huih siangthosak theilai hi. Khuaneu khuata te ah mizawngte adingin sumzontheihna khat hi a, innbup inzong Gua vive tawh kilampah theihi.

Leitung azawngpen gamte ahi Africa, Asia leh Latin America te ah Guakung pen sumzonna bulpikhat hibilbel hi ci’n INBAR Director-General Coosje Hoogendoorn in genkhia hi. Hih Guakung tenghangin mihing 1.5 Billion in nuntakpih lawh a, kumsimin sumtang US$5 Billion bang ngahsak theihi. Gua inn pen akizatzawh kum 100 valbang hikhinin, mipawlkhatin mizawngte zattheihbekin tuakkha a, Guakung manphatna limtak theician loliang uhhi.

Ataktak in Guakung pen Steel sangin to zaw in, Sing sangin tawmman zawhi. Tuabanah Guakungte innding khawngin akilamciang Energy tampi beibehlo, Dolsing te bangin zenkham nawtnawt kulo banah, Zin alinciangin kicipsawm vetlo in, lam diadiai lel uhhi. Tua ahih manin Gua inn sung aomte mizawng hilo zaw in, mipilte Gua inn sungah aom hizaw hi ci’n Coosje Hoogendoorn in genngei hi.

INBAR cihpen “International Network for Bamboo and Rattan” hi-in, Sengam Beijing ah kiphualsah hi. 1997 kumin aki pankhia hi a, tu’n kum 19 bang phakhin tahi. Gamtuamtuam 36 bang kipawlkhopna hi-in, Gua & Ciing (Bamboo & Rattan) hangin sumzonna khangsakding, khuahun hoihtuam sakding cih ngimnate nei uhhi.

Akihel gam 36 tengpen anuai abang ahihi:

• Argentina
• Bangladesh
• Benin
• Bhutan
• Burundi
• Cameroon
• Canada
• Chile
• China
• Colombia
• Cuba
• Ecuador
• Ethiopia
• Ghana
• India
• Indonesia
• Kenya
• Madagascar
• Malaysia
• Mozambique
• Myanmar
• Nepal
• Nigeria
• Panama
• Peru
• Rwanda
• Philippines
• Sierra Leone
• Sri Lanka
• Surinam
• Tanzania
• Togo
• Tonga
• Uganda
• Venezuela
• Vietnam

Ih Zogam muntuamtuam ahzong Gua kilimzat mahmah cih ihtheihtek ahihi. Inn ihlam ciangin akhuamdingin Gua kiphot a, atungkhuh dingin Gua kizenpek hi. Abaang umnadinginzong Gua peekmah kizang a, asual dinginzong Gua mah kizang sawnsawn laihi. Tuateng akip nadingin naang tawh kihentuah lai hi. Inn bucingkhat siktang khatzong palo in, Gua vive tawh kilam theihi. Tuaban ah mehdingin Guatuai kinelai ahih manin, “Gua aw nangsungah kei ka om a, Kei sungahzong nang na om hi” kici ngeungeu lianghi.

Ahoihna tuabektawh khawltheih hinailo lai a, atungah ihgensa mahbangin huihnin Carbon Dioxide te honghupsak banah tua huihninteng huih siangtho tawh honglaihsak theihi. (Photosynthesis) Scientist te genna ah Eucalyptus, Chinese Fir kungte zahin Carbon Dioxide hupkhia thei cihi. Tuabanah Guazung te in leitang kipbikbek in kancipgawp ahih manin, mencipding khawngleh leitang tolhtolh cihte daltuam mahmah hi. INBAR te thu akicingzaw in amau website www.inbar.int ah ki enthei hi. Zomi Daily 2011