A Lian MahMah Leiba Kiloh Zo

A Lian MahMah Leiba Kiloh Zo

A lian mahmah Leiba kiloh zo Lo hi loin, kiloh zo hi zaw hi. “A leiba loh zo lo ahih manin a zi a ta le a neih khempeuh zuakin a leiba a loh nadingin Kumpi pa in thu a pia hi” (Matt. 18: 25).

Mihingte in ih mawhna leiba loh ding a kisap mahmahna thu ih theih ih tel matengin Lungdamna Thu (the Gospel) ii a Lungdam huaina Thu manpha ih sa thei ngiat kei ding hi. Mihing a tamzawte le thu-ummite na-ngawn in khat veivei Khrih lo tawh a cimawh, a hehpih huai mahmah mite ih hih lam ngaihsut khak in kinei lo hi.

Mi tawm khat bekin Pasian’ hehna khutnuai ah bangmah awlmawh loin a kilung nuntaak ahihna ngaihsun bek mawk uh hi. Eite in mimawh taktak ih hihna thu ih tel thei kei uh hi. Ih thusim nuam kei uh hi. Mawhnei ka hi kei, a ci nuam vive ih hi uh hi.

Khatvei lai-in Jesuh in Kumpipa’ sum mak tampi lei a ba nasem pa’ tangthu khat na gen hi. A Manglai in “ten thousand talents” kici hi. Talent khat pen pasal pha mahmah khat ii kum (20) thalawh thamanh tawh kikim hi, ci-in Lai Siangtho Siamte in gen hi. Banghangin Jesuh in hih bangin a uang lua leiba tawh kisai thu gentehna in zang ahi hiam? Ci-in kidong nuam kha ding hi.

Ih theih dingah Jesuh mahmah in zong mite in a thu gen a tel theih nadingin hih bang thugentehnate a na zang giapgiap mai mah ahi hi. Hih talent tulsawm leiba gentehna ah tua talent tulsawm pen mawhnei mi khat in Pasian’ tungah a mawhna hanga a bat leiba gentehna ahi hi. Hih in mihing khat ciat in Pasian’ tungah ih loh ih dit kik zawh ngei nawn loh ding mawhna leiba a gentehna ahi hi. Tua ahih leh eite khat ciat in ih mawhna hangin Pasian’ tungah ih leiba bangzah in lian cih kingaih sun thei kha ding hi. Loh zo lo ahih manin a zi a ta le a neih khempeuh zuakin a leiba a loh nading Kumpipa in thu pia hi mah ta leh loh zo tuan lo ahihna Lai Siangtho sungah na gen hi. Tua tak ciangin Kumpipa in hehpih huai sa-in a leiba teng maisakin a khah hi, ci-in Lai Siangtho sungah kigelh hi (Matt 18: 27).

Lungdamna Thu ih cihcih tua Thu ahi hi. Jesuh in ih leiba khempeuh pek khat zong kisam lo, paubanna om kilkel loin ong piak sak zo hi. Hallelujah!!! Leiba ong loh sak ciang bek hi loin, sum le paii tawh a kilei zo ngei lo ding tawntung nuntakna zong ong piak beh hi. Amen!!! Hih thu pen Paul in a kigen zolo Khrih ii hauhna thupha/ Unsearchable riches of Christ” ci-in na gen hi. (Eph. 3: 8). Pasian in tumahmah in ei thu-umte in hih a kigen thei lo sunglam suahtakna thupha, a kiguk sak thei lo Khrih’ hauhna sungah lungdamna pen a it huai lo ih kiim le ih paamte’ lak ah ih nuntak pih zawh ding le natna le satna, hamsatna le bawlsiatna ahi hih leitungah a lungdam pih veve zote ih hih ding hong deih hi. Khanlawhna Labu sugnah “Haksatna om lo hi lo a, haksatna kizo thei” a cih bang lian a hi hi.

Ih lungsim tawng panin mawhna thu kitelna lo tawh Lungdamna Thu a manphat mahmahna ih um thei kei ding hi. Mawhna thu a kitel semsem nuntakna pen Christian te adingin Kha lam ah khangcinna Christian nuntakzia ding ahi hi. Kha-gah gah phat theih nadingin mawhna thu ah kidopna kisam hi. Mawhna awlmawh nawn lo, piangthak khin ta, cih dan hi lo zaw hi. Tua sangsikin, khantohna zui-in mawhzia zong khang ahih manin ih nuntakna ah mawhziate enpha in Lai Siangtho tawh kisit tel tawntunga mawhna thu ah kidop tawntung ding hi zaw hi. In fact, one sign of spiritual growth is an increased awareness of our sinfulness.

Hih thugentehna ah Kumpipa in nasempa a maisak leiba talent tul sawm pen tulai hi leh ($ 6 billion) dollar mak guk tawh kikim hi, ci-in scholar te in gen uh hi. Topa Jesuh in hih zah leiba maisakna thu a genna pen Khatna ah, (1) A Siangtho a dik, a maan Pasian’ mai ah, mihingte ih mawhna hanga a lian mahmah leiba ih neihna thu hi; Nihna ah, (2) Mihingte in hih zah tawh a kibang leiba eimau’ thagum tawh loh zo ngei lo ding ih hihna lak hi (“Mawhna thamanh in sihna ahi hi…,” Rom. 6:23a); Thumna ah, (3) Pasian’ ong khuangaihna le a lungduaina (Matt. 18: 26, 29) in thakhat thu in thu ong khen pahlohna thu; Lina ah, (4) Pasian’ hehpihna hangin Jesuh’ sihna tawh mawhna thamanh ong loh sakin, Jesuh Khrih’ thawhkik vangliatna tawh mawhna’ vangliatna ong sukkhap sak zo hi (“but the free gift of God is eternal life in Christ Jesus our Lord,” Rom 2: 23b).suangdal

Hih mawhna leibat tawh kisai in, Khatna ah, Pasian’ ong piakkhong hotkhiatna pen gen zawh loh in lian mahmah in thuk mahmah a, zai mahmah hi. Salvation is not such a cheap. Hotkhiatna pen a mawkna hi lo hi. Aman pia zo lo ih hih manin Khrih in ong piak sak hi zaw hi. Ih thalawh sawm sangin Lungdam zawh sawm zaw lehang sepzawhna le a siangtho nuntak zawhna kimu zaw ding hi. Hih a lian mahmah hotkhiatna thu pen a Lungdam huai penpen thu ahi hi (Tua ahih manin hih a lian mahmah hotkhiatna thu thu don loin om lehang bangci bangin suahtakna ngah thei ding ih hi hiam? Heb. 2:3). How shall we escape if we neglect such a great salvation?

Nihna ah, mikhat in midangte’ tungah hehpihna le khuangaihna a neih theih kei leh tua nu tua pa in Pasian’ hehpihna hanga hotkhiatna a ngah nai lo pi hi ding hi, ci-in kiciamteh thei ding a (Matt. 18: 32-33), tua nu tua pa in amah a kihehpih a kikhua-ngaih, a leiba a kimai sak bangin midangte tungah zong a gamtat kei leh a thal lam cilsiat ama’ tungah tu kik tektek dinga, Kumpipa in a leiba a loh matengin thong sungah koih kik thei hi (vv. 34-35). Tua ahih manin mawhna hong kimaisak Thu-ummite in zong ih lungsim tawng panin ih sanggampa’ mawhna ih maisak kei leh vantunga om ih Pa in zong ei a’ ong maisak zo ding ahi hiam? Kote tungah ahong mawhte’ mawhna ka mai sak mah bangun kote’ mawhna zong ong mai sak in. Topa aw, hih a lian mahmah ka Leiba nong loh sak manin ka lung a dam hi. Evan. Suang Dal