A lamdang “Zomi Idol” ~ Dr. James Dongno

A lamdang “Zomi Idol” ~ Dr. James Dongno

Mangte’n, “Rose pen, maangpak, lingpak, atuamtuamin min pia taleng namtui veve hi” cih paunak nei uh hi. Maan hi. Rose pak lah kici, mangpak lah kici, lingpak lah kici Kawlte’n hnin si pak lah ci hi napi, apakpen akibang hi aa, hoih lah hoih, namtui lah namtui veve hi.

Zomite-in i thupi ngaihsut mahmah Zomi Idol ci-in la siam, kivakna neite kiteelin min phatna pia-in i kipahtawi hi. Hih pen ahoih mahmah thu khat hi aa, adiakin, tuailai momnote pattahna, thapiakna, leh makaihna khat ahih baan ah mipi lungnopna ong pia thei hun nuam zat khopna khat zong ahih manin mailam ah ahoihzaw dingin i hanciam to semsem lai ding hi. Bangmin bangmin i pia zongin, atung aa paunak’ gen mah banhin “ namtui veve ding hi ”.

Thu khat ah, Idol pen Zokammal hi lo hi. Zomite-in midangte kammal khat i kawm ahi hi., Hih Idol vai, nasiatakin kikupna kinei aa aneu alian kiang panin gaihsutna, muhna tuamtuam zong i za khin hi. Zomite-in hih Idol kici min hizahta-in, thupi dangte sangin, i thupi ngaihsut pen amasa-in alamdang thu khat ahi hi.

A lamdang khat lai ah, Zomi a-it Zomi apahtawi-alaamto nuam, aki Zomisakte pat khiat leh makaihna hi napi minamdangte min khat kibulphuh kik bilbel aa alamdanna khat ahi leuleu hi.

Tua sang alamdang zawlai khat pen, Zomi Idol aphuakte Pasian um mite vive hi dingin ka um hi. Idol in liim nih nei hi. Khat pen mihingte muhna hi aa, kipahtawina, ki thupi-laakna min hoih khat ahi hi. Adang khat pen, Pasianin Azakdah mahmah, Ahuat mahmah, Akih mahmah min ahi hi. Mihing mai ah hoihin namtui hi. Pasian mai ah sia-in kihhuai hi.

Tua sangin alamdang zawkan lai khat ! Idol vai tawh kisai lawptakin, hun khat lai-in “ Ka khuakhai mei tang ee”, mah bangin a kuamapeuh kituh liangin tawlpi khat sung i kikum ngeeingaai khin hi. Tua kikupna ah aituam lak phialin, nasiatakin kigen aa thanophuai mahmah hi. Hih zah aa i uk, i lainat pih aa lawptakin i kikup theih pen zong alungdamhuai mahmah thu lamdangpi khat ahi hi.

Hi napi’n, hi napi’n, midangte’n i gam i leitang (Zogam i cih ngakngak), laam khat hi lo, lo ciing khat, acre khat zong hi bek lo, acre 12,000 ciang “Ko gam hi” ci aa suh ong sawm uh ciangin hih Idol zahin kinin, vei-in, laina-in i kikum ngei beek hiam? Diang ding cih thadah, pau zong pau ngam lo, dai khipkhep; mimal 30,000, – 50,000 te zat pau MRTV ah akop-athuahin om khin napi, azah 6-10 vei aa tamzaw mimal 300,000 valin azat Zopau, MRTV ah a-om loh Idol zahin thupi asa i om hiam?, pau ngam tuan lo, daai mit cip, koi lam tung khin?;

Chin State sung ah mimal 150,000 kiim a omna, azai mahmah leh Chin State sung ah gampua pan sum atampeen alutna (Kawl gam ah athumna), Tedim leh Tonzang Subdivisions-in Division i ngah zawh nai loh nangawn Idol zahin akin, idol zahin agen i om beek hiam?, kamka ngam lo, bu mang; Midangte’n, kum simin Chin State budget pan, MMK 34 billion, 17 billion,, 12 billion, 10 billion ngah ziahziah, Zomite’n kultaal lampi tai khat asau angah sunsun Zomi leh Zomi kituh lunglung!

Hihte khatvei beek “Idol “zah, “khuakhai mei tang” zahin i lunghimawh ngei hiam? I ngaihsun kha ngei beek hiam? Ei sung thu khat pepeuh a-om ciangin kikham zo lo zahin kituh zeenin kikum, kinial, kitawng, apua lam tawh kisai Zogam vai thupi mahmah a om nakleh kuamah pau ngam nawn lo, awng ngam lo, bu mang, koi ah om kithei lo, daai cip. Ai kuahan acih bang aa meidawi maw? Muhna-in baan zo lo maw? deihzawkzawk tel ding hi.

I kin zawk ding, i laitangnat zawk ding, i ngaihsut mahmah ding Zogam ading athupizaw thu tampite vei lo, gen lo, kikum ngei lo-in, Zokam zong a hi beek lo, ‘Idol’ hih zahta-in i vei, i buai pih lingling zawsop ciangin, “ Zomite, thong-de, noong-de, tong-de, ah-de” ong kici zenzen leh ahehpen ding pa ka hih hangin ka dawn kik nading ka thei kei hi. Ih huang sung bek en lo-in, huang pua khuadak ta ni. Dr. James DongnoPosted Sept. 10, 2019