A Lamdang Siangthopumpi Kilahna

A Lamdang Siangthopumpi Kilahna

1998 kum in Argentina gam, Buenos Aires Archdiocese ah, tu laitak a alianbel Siampipa ahi, Francis in Cardinal Quarracino khut nuai ah Auxiliary Bishop asep laitak in, Siangthopumpi tawh kisai nalam dang khat hong piang hi. Tua thupiang lamdang pen Man(photo) zaih sak in, limtakin kan telsaka, thupiang aza amu khempeuh in lamdang sa mahmah uhhi.

1996 kum, August kha 18 ni, nitak nai 7 hun in, Fr. Alejandro Pezet in Buenos Aires khuapi sumzuak sumleite phualpi a om, Catholic Biakinn pi ah Missa bawl hi. Siangthopumpi ahawm khit ciangin, nupi khat hong pai in Siampipa kiangah biakinn nunga om khuaimei kivakna khat tungah khomun themneng khat ka mu hi ci-in siampipa kiangah va gen hi. Fr. Alejandro zong tua nupi nu genna mun ah vapai in ava et leh ninthem abang Khomun va mu takpi hi. Tua ninbang Khomun pen anek ding piang thei nawnlo ahih manin tui akikoih kuangneu khat sungah akoih khitteh, Siangthopumpi biakna biakinn neu sung a om Siangthopumpi buk sungah va koih hi.

August kha 26, nipi khuavak ni in tua Tabernacle hongin a et leh tua Khomun pen sisan tawh naki dim a, lamdang sa lua ahihmanin Bishop Jorge Bergoglio ( tu laitak a Pope, tua hun laitak in Auxiliary Bishop) kiangah va gen hi. Bishop in tua Khomun pen Manzaih siam te tawh hoih tak in manazaih na dingin thupia a, September ni 6 ni in Bishop gen bangin kihih hi. Tua mante a et uh ciangin, sisan tawh aki tuam Khomun pen nakhang in ki gol muh mahmah hi. Kum tampi sung tua Khomun pen Siangthopumpi buk sungah kikoih a, tua thu pen kuama theih loh dingin ki immcip hi. Tua bangin muatlo le kisia hetlo in om ahihmanin Cardinal Bergoglio (Archbishop suakta) in Science lam tawh kisai pilna neite limtak in sittel-kantelna bawl sak hi.

Kum 1999, October kha ni 5 ni ciangin, Cardinal pa sawltakte mitmuh in Dr. Castnon in tua sisan kituam Khomun themneng khat la in New York ah analysis(sittel-kantelna bawl dingin puak hi. Hih thu tawh kisai in thuman aki theih nading deihna tawh tua Khomun pianzia athu ala Scientist te kiangah themkha bek zong pulak lo hi.

Scientist te khat ahi Dr. Frederic Zugiba pen cardiologist(Lungtang siavuan) leh forensic pathologist (Upadi le Science lam kizop zia athei Natna zong siavuan) hi a, ama muh khiat na ah; “Hih pen mihing sa le si taktak hi in, mihing lungtang sathem khat hi. Tua sathem akilak laitak in akilakna lungtang pen nungta lai hi. Banghanghiam cih leh tua sathem pen gamtaang thei in tua sungah nuntakna nei sisan kang Cell tampi tak zong om hi. Tua banah tua sisan kang cell te’n tussue te pailet uh ahih man in tua lungtang pen gimna lianpi thuak hi cih zong hong theisak hi. Cihnopna in, tua lungtang neipa pen a lungtang nakpitak in ki lok in a diip nakpitak in kisaii cih na hi.”

Australia minam journalist Mike Willesee leh Sitni Ron Tesoriero te’n zong hih thu tungtanga nasepna khempeuh encik in teci pang uhhi. Dr. Zugiba genkhiat kammalte hangin tua Khomun pianzia athei khempeuh lamdang sakna tawh kidim uh a, kampau theilo bangin kamvangsa in om uhhi. Mike Willesee in Scientist pa kiangah ‘a zenzen in hih pen mihing tung pan akila hi leh tua sisan sunga nuntakna apiangsak cell te bangtan vei nungta zo ding hiam ci in dong hi. Dr. Zugiba in a dawnkikna ah, ‘minute tawmno sung bek nungta zo hi’.ci hi.

Tua ciangin Journalist pan zong thupiang khempeuh a mongpan in pan in Siavuanpa tungah gen khia hi. Hih pen amasa in tui mawkmawk sungah kha-khat sung kidiah in, tua khit ciangin kum thum sung asiangtho-a akibawl tui sungah limtak in kikoih a, a tawpna ah nangma kiang hong kipuak ahi hi” ci-in limtak in gen hi. Dr. Zugiba zong hih thu a zak ciangin lamdang sa in alungmang hi.

Tua ciangin Dr. Zugiba in athu tel nuam lua mahmah ta ahih manin hibangin dong hi. “Hih thu limtak in genpha un, misisa khat kiangpan nalak uh hileh, bangci bangin hih tanvei cell te nungta in gamtang thei ding hiam? Hih lungtang pen kum 1996 a si mikhat kiangpan na ngah uh hi zenzen leh bangci bangin tuni ciangdong nungta thei ding hiam?”

Tua khit ciangin, Mike Willesee in Dr. Zugiba kiangah hih Khomun hong pian khiatna thu Siampipa thupha piak Mangbuh vuinel tawh akibawl silngo aki sawh lo Moh kang khat pan mihing taktak sa bangin sisan tawh akidim na thu hoih tak in hong gen kik hi. Tua thu azak ciangin Dr. Zugiba zong lamdang sa mahmah in banghang in hih Khomun mawkmawk lel khat pen siampipa thupha piak na tawh anungta Sa le Si suak thei hiam, science lam pilna tawh zong kitel zong nawn kei thuthuk lua hi, ci in dawng kik hi.

Tua khit teh Doctor Ricardo Cartanon Gomez in hih thupiang tungtawn a Buenos Aires a akibawl Lab report leh Lanciano a tua bang lian thupiang report a khinkhai theih nading in vaihawm hi. Akipat khiatna bangmah a thei vetlo Pilna nei mipil misiamte in tua report tegel a et uh ciangin anih in kibang linlian cih mu khia uh hi. Mihing khat bek sungpan akila hi a, a sisan nam pen AB hi in, hun khat lai in Middle East kiim ah suak in, anungta ngei pasal khat hi, ci uh hi.

Upna bek in a lamdang mahmah Pasian nasepna te mihingte tel theih ding le ngaihsut theih dingin hong lak khia hi. Tua upna pen Pasian upna hia, Khomun le Lengngahzu sungah Chirstu om taktak hi cih hong thei sak nuam upna zong ahihi.

Siangthopumpi tawh kisai Buenos Aires a thupiang pen a lamdang mahmah kilahna khat hi ci-in Science lam pilna nei ten teci pang uh hi. Hih thupiang hangin Topa Jesu in Khomun sungah amah om taktak hi cih ih up ding le ih san ding hong deih hi. Amah pen Khomun sungah alim bek tawh hilo in ama pumpi mahmah tawh omhi cih zong hong thei sak sawnsawn hi. Hih pen upna mit bek tawh ih muh theih thupha akipia Khomun le Lenggahzu sunga akisel Topa Jesu ahihi. Eite in leitung mit tawh ih muh theihlohna ahang in amah pen vangletnadim pumpi(glorified body)tawh om ahih mah ahihi. Hih Siangthopumpi tawh Jesu in eite hong et gige in hong it tawntung a, hong gumkhia nuam tawntung hi.

Christu pumpi sungah note tawh,
Fr. Raphael Khuppi
Manila