A lamdang COVID-19 ~ Pau Khat Suan

A lamdang COVID-19 ~ Pau Khat Suan

I lam-etet, i ngaklah Case 1 test result “undetected” cih April 23, 2020; 9:00pm test result tangkona ah i muh ciang i lungdam mahmah a Topa’ hehpihna phat in lungdam i ko hi. Adangte zong a sawtlo in tuabang result mu ding lam-etna tawh i thungetna ahi hi.

Ahi zong in, a sawtlo in ki test kik lai ding a, swab test ban ah antibodies test zong bawl kul ding cih i za hi. Antibodies test dong bawl ding cih thu kazak man in ka lungdam phadeuh hi. Tua in dam taktak cih onglak, ong kipsak ding ahihman ahi hi.

Hih coronavirus pen leitung bup ah mihing Awn 2 leh alang val ( 2.5M) in ngah a, a lang phial mah damkik khin in, ahi zong in hih natna tawh tul 200 kim bang sikhin hi. Pulnatna nam hi a, ahih hang a-ngahkha khempeuh sipah samlo hi. Khat pan kisi pah laulau samlo i cih hang hun tomno sung a leitungbup kizel leh mi tampi mah in a sihlawh natna ahihman in a lauhuai mahmah natna/lungno ahi hi.

A khangto khin gam, zoto hoih, zatui zaha leh vanzat kicing a siawan siama siampente’ omna nangawn ah mi tampi si in, tua siawan siamate mah zong a sihlawh tampi om zawzen hi. Vanzat leh zatui zaha kicing hetlo i gam a-ding in bangzah a lauhuai cih genna vet a omlo natna/lungno ahi hi.

Tua ahihman in ngahkhak lohna ding a kidop kikep theih zah a hanciam ding, cidamna lam thupiakte mang a, thuneite’ sawlna bangbang i zuih diamdiamna in damna ong pia ding a, i nunlui ngei hunnuamte ong mukik sak baih ding ahi hi.

Banghang in lauhuai phadeuh hiam cih leh, kilawh thei bek hilo in, kilawh baih lua mahmah sawnsawn a, cinate in natna lungno a ngah leh a nat kikal hun saupi kihal in, tua kikal in mi bangzah lawhman khin ding cih upmawh sansat cihloh, kician lian a gen thei kuamah omlo hi. Tua bek thamlo in, natna lungno ngah gige nangawn a kisit hang a kimu lo tampi om thei lai mawk hi.

April 23, 2020 ni a Reuter in a genna ah, Sengam Wuhan khuapi a teng Mr. He Ximing kici pa pen February kha kipat lam in nakhak sa, awmbing, awmna sa a, amah zong hih natna lungno ngahkha hiding ki-ummawh ahihman in kisit sak hi. Ahih hang lungno mulo uh hi. Dam thei tuanlo ahihman in kisit kik a, 3 vei a kisitna dong bangmah mulo uh hi. A hi zong in March kha beikuan ciang swab test bek hilo in, antibodies test zong a bawl uh leh natna lungno mumawk uh hi.

Natna lungno ngahkhate a ngahkhak zawh ni 16 bang ciang a natna lim ( symtom) a gawl, anak teng ah tawmtawm kilang thei a, ni 18 ciang huiui leh tuap ah kilang in, tua pan pumpi sung ah kizel a ni 22 bang ciang zun le ek ah kimu thei hi ci in mipilte’n gen uh hi. Hih pen a pongpi a a hithei zawdeuh genna hi a, hici lian hi cihna hikhin pah tuanlo, lungno bankhakna pumpi’ thuakzawh hatna tawh zong kisai mahmah hi.

Hih lungno pen cina upmawhte’ dangtawng leh naktawng lam pan swab la in “neucleric acid test” a kibawl hi a, ahang tuamtuam tawh lungno om gige kimu lo ( undetected ) thei hi.. ci uh hi. Ahang tuamtuam cih ciang, a swab neulua thei, natna lungno omna muntak kuikha lo khathei cihbang om thei hi. Sengam a scientistte’n survey a bawlna ah natna nei vive tawh a sin uh ciang swab neuclric acid test tawh 30% ciang bang ki detect khalo thei hi.. cimawk uh hi.

England gam, University of Bath ah Microbial Pathogenesis Lecturer a sem Andrew Preston in a genna ah “the limitation of this tests need to be recognized, and the need to run regular tests if we want assurance that someone is truly negative, and that they remain so over a period of time” naci hi.

Hih test tawh natna lungno muhhak mahmah ahihman in ( test na-ding a dang lah om tuan samlo zel ) cidam taktak hi cih i lungmuan nading in hun sau sim la in, a kizom a tamveipi testte ah “undetected” vive ahih ding kisam cihna ahi hi.

Tua ban ah hih natna pan a damkikte, a si a sa lungno do hat in, natna lungno in zo nawnlo ding cih upna pen mankhin lo hi. Banghang hiam cih leh hih natna lungno ii pianzia a neng a tawng, a bul a bal in kitheikhia zo nailo ahihman in kidalna ding leh thahna ding zatui diktak zong a-kimukhia zo nailo hi a, ngahkik lo ding cih kuaman gencian thei tuanlo hi.

Tua ahih man in khatvei nihvei test a lungno kimu lo pen zato te’n/lab te’n negative cingam lian lo in, “undetected” cih kammal a zang uh ahi hi. Ei zong khatvei nihvei undetected tawh nakpi lungmuan ding hilo hi. Kimulo kha a nahih khak ding lung hihmawh huai lai veve hi. Tua hang a, Khaisan’ test result ah “undetected” ahih khit ciang antibodies test bawl ding lungdam huai aci kahi hi.

Topa in Khaisan a kipan Zogam Tedim, Kawlpi a cina om khempeuh ong vehsak henla, acing akem siawan siamate a kipan akim apam a panpih a seppih khempeuh zong thupha hong piaksak ta hen! A manlang thei pen a Swab neucleric acid test ban ah antibodies test dong ah undetected result a ngah mengmeng ding in damna ong pia ta hen! Zogam Zolei Zomi Topa a nungta i Pasian in ong damsak ta hen! .. Amen. Pau Khat Suan