A kuacik lua panin a taangzai lamah ~ Khup Lian Thang

A kuacik lua panin a taangzai lamah ~ Khup Lian Thang

Yuval Noah Harari a cih tangthu kankhiatna lamah mipil pa in, tulaitak pen leitung ah mihingte’ pianzawh khuahun a hoih penpen hun, leitung pianzawh nopna daihna tawh a kidim penpen hun, suahtakna a om pen hun, gam khat leh gam khat a kilem pen hun, mihingte’ manphatna leh mihingte’ hihna a ki thupitsak pen hun ahi hi. Gal leh sa hangin sihna sangin zukham in accident na, leitung nuamsa nawnlo in amah le amah kithatin sihna cihte tam zaw ta a, nek ding dawn ding neilo-in sihna sangin an tam ne lua, neek le dawn kidoplohna panin a kingah thei natna tuamtuam hangin a si tam zaw ta hi, ci hi. Gamvai ah leitung bup gamte’ kipawlkhopna U.N danin kipawlna lianpipi om in, U.N ii a khanuai ah cidamna lam, sum leh paai zekna lam, pilna leh cidamna lam, kilemna a bawl a hanciam ding, cih bangin amau mun ciat ah nasem ziahziah uh hi.

UN bek hilo gam haute in zong amau hanciam tawmtawh na hoih lianpi sem uh a, sum nei mihaute in a neihsa uh sum le paaite pia khiain natna satna hoihlo tuamtuam be a beina ding, mizawng daipamte huhna dingin pia khia ziahziah uh hi. Leitung pilnate khangto mahmah ta a, kithuzakna te lem mahmah ta in, mihing thatang gimluat kullo in ututna ah khual kizin thei ta hi. Nisa in khua a lum luatleh Aircon kihong ziau a mite gim luat kullo in puansawpna set tawh puante kisawp theita hi. Gal leh sa, sih theihna lauhuai tuamtuam leh khuahun siatna hangin a ki tuakkha haksakna tampi tuamtuam kawmkal ah hih bangin leitung ah nuntaknate nop semsem in khantohna lam ah a manawhna pen banghang hi mawk ding hiam cih lungngaih huai mahmah hi.

Mihing In Leitung Uk

Leitung ah mihing simloh nuntakna nei nam tampi om a tua lakah mihingte zong namkhat ahi hi. Humpi nelkaite, saite, vomte, Chimpanzee(zawng namkhat) te, etc… cih bangin tuilak aa om ngasa leh gan hing tuamtuam, huih lak aa leng vasa nam tuamtuamte lak ah mihingte sangin a thahat zaw, a pilzaw leh Chimpanzee a cihte bang pen mihing te sangin a khuak hatzaw nuntakna nei tampi om hi. A lian mahmah saipi te, a hat mahmah sahang te in leitung na ukzo lo uh a, mihingte in amau sangin a hatzaw a lianzaw a siamzaw te manin na nasawl thei na zang thei uh hi. Chimpanzee a kici zawng namkhatte pen leitung mipilte in a gen tanghtangh uh ganhing a om teng lak panin mihingte’ pianzia, a zia le tong kinai penpen dingin na gen uh hi. Amau pumpi danpen mihingte neihteng mahtawh kibang lian a, a khuak tai dan ciangin mihingte sangin zong tai zaw hoihzaw uh hi. Mihingte dan mahin a nu a pa, sanggam u leh nau, lawm le gual nei in a lomlom in teng uh hi.

Ahih hangin Chimpanzee te pen a mau bawngsung (Clan, Band) amau muhngei a kitheihpih a ki mukhak pihte bek it thei uh in amau teng bek tawh kipawl thei sese uh hi. Tua ahih manin amau omna mualkuam sunga om Chimpanzee te bek tawh kipawl khawm uh a, a gal lam kuam khat-a a om te tawh kipawlkhawm theilo ki-it theilo nasem khawm theilo citciat uh hi. Amau danmah ahih hangin a muh ngeiloh a theih ngeilohte uh pen amau te dan mahin sang theilo it theilo nasem khawm theilo uh hi. Amau’ leitung pen amau bawng amau kuam sung ciang bek ahi hi. Lam khat pan gen leng amau thungaihsut theihna pen tua ciangah khawl hi. Tua hang mahin bangzahin a pil hangun leitung nuntakna nei teng na ukzo lo uh hi. A zenzen in gam lianpi khat sungah om Chimpanzee teng kipawlkhawmin thu le la vaihawm khawm thei hi zenzen leh amaute in leitung a ukzo thei ding hi gige hi.( Ahih hangin tua bel a om ngeilo ding thu khat)

Hun masa lai in leitungah zong mihing te zong amau’ u le nau, a beh a bawngbawng bekin na teng khawm uh hi. A nu a pa, a zi a ta, a sunghte a makte leh amau kitheihpih u le nau teng bek na ki-it in na teng khawm uh hi. Gal leh sa tamna, leitung khuahun siatna tuamtuamte a nawkkhak ciangun sepkhop dinkhop loh phamawh ahihna na thei uh hi. Tua ciangin a bawngbawng a behbeh (Clan) te kigawm-a a namnam (Tribal) te suakin tua a namnamte na kipawlkhawm khawm uh a, tua panin damdamin gam khat minam khat (Nation/State) na suak uh hi. Amau lak ah a thahatte makai dingin koih uh a, a ma ukna nuai ah ki thutuakin nungta khawm uh hi.

Bawng khat pan in beh khat, beh pan in gam khat minam khat, gam khat minam khat panin minam tampi kigawm in gam lianpi khat, gam lianpi khat bek panin gam lian tampi kigawmin in gamlian tampi kipawlna khat (Zogam, Belpawl Gam, British, European Coucil, Asean, UN etc…) cih bangin a tangzai theithei dingin mihingte na kipawl thei uh hi. Tua a ki pawl khopna bulphuh in a sung gal a pua galte a kisam bangbangin nawkkhawm kihuh kipanpih diamdiam uh hi. Gentehna; Belpawl gamin sumbawlna lamah zawngkhal ahih manina kipawlpih Asen gamte in ahihtheih zah in panpih uh hi. Upmawh loh pi in AIDS natna te leitung ah a kizelh ciangin leitung bup in khut kilen in mapang khawm ahih manin hih natna pen tampitak phadawn in a kibawl na ding zatui zong mukhia khawm uh hi. Gal leh sa vai ah zong apua lam gal aom ciangin kinawkpih in ki dinpih uh hi.

Mihingte pianzia ngeina ah a mel a sa kimu ngeilo ki thei ngeilo, mimal zopna omlo, sisan kizopna om kilkel lo himah taleh minam khat hihna gammi khat hihna, kipawlna khat ah dinkhopna hangin a muh ngeiloh uh mi tampi te tawh nasem khawm, kipawlkhawm, galdo khawm, thu le la vaihawm khawm thei uh hi. Mihingte in Chimpanzee sangin a thahat zawkna ahang bulpi hipah hi. Ki pawlkhawm in na a sep khopna hangun na lianpipi sem zo uh a, tua in leitung khempeuh ah ukna neisak zo hi. Gentehna in, bawhlung tualpi khat sungah Chimpanzee tul 80 koih dingin, tualpi laizang ah Chimpanzee team nih te bawhlung kimawl sak ding hileng, a thapia ding tul 80 te in tua a kimawlte phawkkha cih thadah amau te awng ngeingai pong ding uh a, bangmahmah mumel mamel omlo ding hi.

Tua tul 80 in ki thutuakin bang mahmah sem khawm thei ngeilo ding cih pen mipilte muhkhiatna ahi hi. Mihingte in ahih leh tua bawhlung tualpi sungah kimawl thei thapia khawm thei bek thamlo in, tua tualpi ah a omlo, leitung kiu li pen in TV tawh en in tha pia khawm thei lai uh hi. Lamkhat pan gen leng ganhingte sangin mihingte in thu khinkhai theihna thungaihsut theihna a neih zawkna in mihing leh ganhing aki lamdanna hi a kicih mah bangin, tua thungaihsut theihzawkna acih pen koici kimuh theih hiam cih dotna om leh mihingte in khuakhat, kuam khat, gam khat, leitung bup-a om mihing khempeuh kipawl khawmin semkhawm nekhawm galdo khawm thei uh ci, cih pen mihing ganhing kilam danna ahi hi.

Melanesian Minamte

Hih minamte pen Papua New Guinea (PNG) leh Solomon Islands a cih gam nih ah a teng minamte ahi uh hi. A gam omna mun pen Indonesia gam tawh gamgi kizom uh a, Australia tawh zong ki nai mahmah uh hi. PNG gam ah pen mimal 8 millions val a om hangin a kitel theilo pau nam 900 val bang om ahih manin leitung ah a kizang pau nam tuamtuamte’ seh 6 suah seh 1 pen amau’ gam sungah om hi. PNG bangmah in Melanesiante’ tenna gam mah ahi Solomon Islands ah zong mi 5 lakhs val bek tengin khat leh khat a ki tello pau nam 70 val bang zang uh hi. Hih minamte pen amau khua leh amau kuam bek ah teng uh-a mi tampi minam tuamtuam tawh kikawm kikhawl nuam lualo uh hi. Amau pau bek leh amau khua, amau kitheihpih leh a beh a phungin teng khawm uh a, amau sung bek panin a thahat penpen te a makai dingin tel uh hi. 1970s khit lam ciangin PNG in Australiate’ tung panin suahtakna ngah in, Solomon Islands in Britishte’ tung panin suahtakna ngah hi.

Australia leh Britishte in hih gam nihte’ gamvai kalsuandan ding, Democracy ki-ukna bulphuh in Parliament tawh a kalsuan dan dingte a gelsak khitteh suahtakna a pia ahi hi. Suahtakna a ngah khit ciangun amau tangmi ding telna nei uh a, a khua makai a beh makaite mah na tel pah uh hi. Tua panin buaina kipan hi. Hih a tel tangmite pen gambup Parliament ah a kah hi in, gambup huamin thukhual in thu a vaihawm ding ahi hi. Ahih hangin hih tangmi te in amau khua a mau kampaute bek, amau beh sung bek adingin phut cih takin phu uh hi. A ngah zahzah tawh innlam ciah pih hi.

A thahat zawzaw, mimal a tam zawzaw leh khat le nih a kipawl thei zawzaw in panmun ngahin tua panmun siksan in a kilawmlo zah dongin amau aa ding bekin na vaihawm uh hi. Democracy ki-ukna tawh a gam uh a kalsuan hangin a mipite, gam makai tangmite pen Democracy a zang thei ding dinmun cih thadah gamkuam pi khat, gam khat adingin na a sem thei dinmun zong na tungzo nai deklo uh in, angsung ciang bek mimal hamphatna ding ciang bek le amau tanau beh le phung ciang bek, amau pau bek a paute ciangbek a khualzo dinmun ah na om pan uh hi. Gam khat in a din’ hangun khua khat pau nam khat ciang bek adingin a khualzo dinmun hipan uh hi. Hih bangin a picing lo a tualniam lungsim puakzia hangin hih gam nihte zong tuni dongin leitung ah a khangto lo pen gamte sungah kihel in, a enghuai a ut huai hetlo gam khat na hi uh hi.

Gam Khangtote

Minam tampi kigawm in gam khat-a a ding ahi Switzerland gam ah minam kibanglo, pau ki banglo minam tampi na teng khawm uh hi. German minam, Italy minam, France minam, Romansh minam cih bangin minam tuamtuam a kigawm gam khat ahi hi. A gammi peuhpeuh in a gam ki-ukna thukhunte thupi bawlin minam a tam zaw a tawm zaw cih sangin a gam leh minam bup’ mailam phattuamna ding khualin kalsuan ciat uh ahih manin tuni dongin leitung ah gam haupen leh gamnuam pen khat in kiciamteh teh hi.

Singapore gam pen gam neu mahmah khat hi-in minam tuamtuam teng khawm ngeigai uh hi. Sente, Indian (Tamil) te, Malay te cih bangin minam, ngeina pau le ham ki bang ngiatlo minamte ahi uh hi. 1965 kum suahtakna a ngah khit panin hanciamin nasem khawm uh ahih manin tuni in leitung bupin a zahtak uh gam nuam mahmah khat suakta hi. Minam tam zawte zong ki inntek sak tuanlo uh a, minam tawmzawte in zong inntek lungsim pua veve uh hi.

Makaite in minam, ngeina leh pau le ham tawh kuamah deidan lo in, a gambup nopsak na ding a gambup mailam ding bek khualna tawh nasem uh ahihmanin tu ni in a gah a nene uh ahi hi. Hih gam mite leh a gam makaite in a kuacik leh a toi angsung kualsung bek a khual Chimpanzee te, leiung hun masa laipek aa mihingte’ dinmun ah na khawllo in a khangto a picing lungsim na nei ta uh hi. Hih bangin mel le sa ki banglo, ngeina a kibatloh hangin gammi khat hih khopna panin minam khat hihna dongah a gammi khempeuh in a san’ theih na dingin gam uk kumpi makaite in picing takin hanciam toto lai uh hi. A sawtlo in zong tangtung lai ding hi.

Zomite’ Dinmun

Zomite pen nidang lai pekpan in mun khat pan mun khat ah kikhin in tangthu kante ciaptehna ah Mongolia, Tibet, Kawlzang kuam cih bangin kikhin kawikawi uh a tua panin Ciimnuai, Khul etc… ah na tung to uh hi. Tua panin a beh a bawng a tuamtuamin khua tuam ciat ah na kikhen uh hi. Kizopna tam hetlo in amau mun ciatah na teng uh hi. Hausa upa leh a thahatte in khua leh tui u sung nau sung na makaih uh hi. Tua khua tuamtuamte kigawm khawmin ukpi tuamtuamte in na uk toto in tua lai leitung khuahun tawh kituakin a kician mahmah gam khat minam khat in na ding zo khin uh hi.

1886 kum khit lam ciangin gamkek Mangkangte’ nuai na tung uh a, amau’ ukna pan in 1948 kum in Kawlte, Zomite, Kachin, Karenni, Shante kigawmin Belpawl gam khatin na ding uh hi. Mualtungmi makaite leh Kawl makaite’ lunggulhna pipen in, gam khat ciatin a om sangun kigawm in gam lianpi khatin ding khawm leh nuntakna nuamzaw khangto baih zaw ding, cih hi pipen hi. Makai masate’ ngimna bangmahin tua hun lai dingin Belpawlgam pen na khangto mahmah takpi hi. Ahih hangin angsung bek a khual, kuamah tawh a ki pawl nuamlo, minam tawmzaw te a nengniam, a toi mahmah lungsim puakzia a nei makai pawlkhat hangin Belpawl gam pen kiamsuk kikin tuni dongin leitungah gam a zawngpen khat in na om hi.

Zomite zong cihtakna leh itna a nei thu a khual minam khat hi minam dangte in na ciamteh uh hi. Kim leh pam huzap hangin a cihtakna uh a thuman nate uh damdam in bei hiaihiai ta tawh ki bang hi. Tulai Zomite pen gamvai nasepna ah amau’ thuneih hun sungin amau khua leh tui bek adingin nasem ta mawk uh hi. Tua hangin minam khat le khat kikal ah kilang neihna leh kimuhkhialhna tampi om hi. Minam bup tang dingin a ding khia makaite in mipite’ adingin nasem ding himah ta leh amau’ angsung amau mimal amau party leh amau tawh a kilem kitheikhate-a ding bekin nasem ta uh hi.

A tunga PNG leh Solomon Islands gam-a Melanesian minamte tawh a kibang dinmun ah om uh hi. Tua mah bangin Zomite sungah a thupi penpen ki zopna, kipawlna leh ki makaihna phualpi khat ahi biakna upna lam ah a cihtakna uh leh a upna laigilte damdamin khahsuah ta uh hi. Biakna pawlpite kipawl semsem ding khangto semsem dingin na hoih na lianpi sem ding, kha mangthang tampi man ding, mite in thu-um te’ hangin Pasian mu ding cih pen a thupi pen himah ta leh, tua tawh ki lehbulh in gamta ta uh hi. Tawmkhat mi tam pian leh pawlpi thak kipan pah uh a, mipil misiam thugen siam khat leh pawlpi thak kipanin a omsa pawlpi pen khen nih suak hiau hi.

A kikhensa te koici kigawm kik ding cih tawh buai in a vaihawm ding kawmkal ah a omsa kipawlna leh biaknate a kikhen theihna dingin a hanciam zong tampi mah na om leuleu hi. Sum bawl paai bawlna lamah zong sem khawm liailiai ding khawm liailiai ding sangin, tuamtat ding tuam hauh dingin lawmteng Zomi khempeuh lak ah amah bek ahau pen hih ding khawng ut a mawkmawk Zomite tam mahmah le kilawm hi. A nei a lamte in a neilo te hawmkhia nuamlo in, a pil a thei a siamte in kuamah pantah nuam mello uh hi (A piakhia, a hamsate ahuh a pantah zong kiom hi). Pilna siamna lamah zong, tawm khat sin in siam pian uh leh kuamah thusim lo in pilna neilo siamna neilo te neu et thei uh hi. Amau bek a theipen a pilpen kisa kha den uh a kuamah tawh kipawlkhawm nuam selo in a tangtat a pilna a siamna a kisaktheihpih Zomite dinmun hita hi.

Picina Lam Ah

Gam leh minam makaite, kumpi nasemte leh Company khat, Pasian nasepna, nasep khat peuhpeuh a sem Zomi mimal kim in amau’ panmun leh thu neihnate hoihtak zang siamin mimal, lawm le gual beh le phung ciang leh party khat, kipawlna khat, pawlpi khat ciang bek a khual kha a hihna panin kikhel in, gambup minam bup , kipawlna bup huamin thu khualna thumanna leh cihtakna tawh a kalsuan ding pen a thupi penpen ahi hi. Huaituam paihtuam guptuam mudah tuam nei hetlo in na sep ding hi a, pau le ham kibatpih ciang bek a khual hilo in minam bup gambup mailam khantohna ding a khual makaite hihna lamah kipuahtoh ding ahi hi. Mipite, kipawlna leh hong uk kumpi’ hong piak vaipuakte tungah hoihtak kiciantak leh cihtak ngiatin na sep ding ahi hi. Hunkhat lai in Zogam bup-a ding bek hilo in Belpawl gambup adingin a nuntakna bang uh pia ngam liangin gam le lei a hung a honkhia pu leh pate’ neihsa a zahtakhuai gam leh nam itna lungsim te pua in, amau khekhap thuman leh cihtakna tawh gam leh lei adingin makaih kik hun nasep hun ta hi.

Hun khat lai in Zogam bup ah biakna lam ah makaite ahi Tedim kampau Zomite pen, tuni in ahih leh kipawlna tampi pawlpi tuamtuam tampi in kikhen thang ta uh hi. Tuni pan kipanin panmun nei makaite in a om sa kipawlnate bangci bangin kip ding, kikhen lo ding, a kikhensa te koici kigawm khawm kik theih ding cih ngimna tawh kalsuan theih ding thupi hi. A zaizaw a lianzaw adingin khualna tawh a neuzaw thu tuamtuam te nelhsiah ngam in, mimal kiphatsakna leh khasiatna tuamtuamte’ tung gualzo in kipawlkhopna lam ah kalsuan kik ding ahi hi. A tunga gensa danin, kimawlna tualpi sunga Chimpanzee te dan hilo in tualpi sunga bawhlung hoihtak a thapia mihingte a hih ding uh thupi hi.

Sum leh paai neite, pilna siamna neite in khat le khat kipawl khawmin nasep lianpipi sem khawmin gambup dong ah a nei pen a lianpi kipawlna Company pipi neihna lamah kalsuan theih ding thupi hi. Tawmkhat ci thei pian in ki neisak kampau gamtat dan khawng a kikhel pah cih bangin a tualniam lungsim puakziate khempeuh zong paihkhiat hun ta hi. Pilna siamna neite in zong a neih uh pilna siamna te hangin kisaktheihpih se lo in, ta leh naute pattahna in zang siam in hih theih bangbang tawh mipihte’ phattuamna a pia a hih theih ding uh pen tuhun Zomi mimal kim adingin a maban lianpi ahi hi.

Chimpanzee te in bangzahin a khuak uh a hoih hangin amau angsung ciang bek aki batpihte bek tawh nasem khawm thei sese citciat uh a, tua in na lianpi semsak zolo hi. Mihingte in ahihleh khat bek in na lianpi a sepzawh loh hangin a neih uh kipawl khop theihna lungsim leh nasep khopna theihna dingin thu ngaihsut theihna in minam khat gam khat leitung bup-a om mihing khempeuh kipawl khawm sak thei ahih manin tuni dongin mihingte in leitung bup ah a thahat pen nuntakna nei a hih mah bangin kipawl khop theihna a neih tantan uh mihingte in leitung bup uk suak lai ding hi. Kibat sitset manin a kipawl thei bekte in Chimpanzee te dinmun kipan a, ki batlohna tampi kawmkal panin a zangzaw a thupi zaw ngimna tawh a lem theithei in kipawl khop theihna pen mihing te ii manphatna ahi hi.

Theih ngeiloh pau kibat pihtoh ahih hangin gamkhat minam khat leitung mihing khat hihna tawh minam pihte gammi pihte, minam tuamtuamte’ mailam nuntakna a nop ding deihna tawh kipawlin nasep khop theihna lungsim in ganhingte leh mihingte’ kilamdan’na hi a, tua lungsim puakzia leh gamtatzia in leitung mite hih ciang a tun’ ahihna pawk huai mahmah hi. Lungdam, Khup Lian Thang (Ref: Yuval Noah Harari, Sapiens – A Brief History of Humankind, Francis Fukuyama, The Origins Of Political Order)