A kibang lo Zomi & Zogam ~ Pau Khat Suan

A kibang lo Zomi & Zogam ~ Pau Khat Suan

A kibang lo pawlkhat kibang sak masa thei hile hang, i ngaihsutna, i deihna, i lunggulh, i tup i ngim ong kihual zawdeuh thei ding a, tua in i tonkhawm pah kei zong in ngatna kibang, kungmui kibang, lam-etna kibang ah ong paikhawm sak thei zawdeuh ding hi.

Tampi omding lak ah…

1) Zomi i cih ciang –

a) – Tedim, Tonzang, Lamka bulphuh a kamphen kullo teng

b) – Kawlgam Chin State pan a kipan khia minamke khempeuh

c) – Kawlgam Chin State, India Mizoram & Manipur, Bangladesh Chittagong Hill track minam khempeuh

2) Zogam i cih ciang –

a) – Tedim, Tonzang, lamka huam ( & Kamphen kullo teng tenna zanggam kuam teng )

b) – Kawlgam Chin State (& Chin State a minamke te’ tenna zangkuam kipeh teng)

c) – Kawlgam Chin State, India Mizoram & Manipur gamkhen, leh Bangladesh Chittagong Hill track (& tua gamte tawh a kizom minamte’ tenna gamkuam pawlkhat)

Zomi & Zogam i cih, i lawh sim in i mitkha a ongsuak minam leh gam kibang hileh i mailam, i nanawtna, i lam-etna, i tup i ngim, i lunggulh ong kihual ding a, i masuat kibang in i kalsuandan leh i tot lampi kikum thei ding, khat le khat tha kipia in kipanpih thei zawdeuh ding hihang.

Nambup ai-awh a kampau ding kua?

Parliament leh kumpi vaihawmna ah member khempeuh in nasep nakpitak hanciam napi, tua nasepna midang/gamdangte mai ah a genkhiat ding ciang mi khempeuh in gen zaizai lo a, thu gending mi khat ki minvawh, ki tuamseh in tua in gen hi. Tua pen spokesperson (spokesman/spokeswoman) kici hi.

Minam vai nasep nakpi tak hanciam ngeingai ding hi a, ahih hang tua minam tawh kisai thulian thu thupi genna pen “spokespersons” gen ding ahi hi.

Tu laitak a i spokesperson pen i MPte ahihlam phawk gige ni.

Um nuam keng

I minam sung biakna leh kipawlna tuamtuamte a vaihawmnate ka etet ciang…

Mipi in Pasian’ nasem a i ngaihsut biakna nasem, biakna siate ki muang mahmah, ong khemkhem phial tale uh, (ong khemkhem uh ahih lam i theih gega zong pawlkhat om lel e ) a hihna khempeuh uh Pasian enkawm sa a kimuang tantan napi….. tua i siate mah in mipi (layman) peuhmah muang vetlo, naseppih ding leh khut kiletpih ding genloh thu le la thuthuk kuppih ding nangawn a ngaihsun vetlo, bangmah a thei kilkel lo ding bang a ngaihsun in, a pawlbawl sunsun uh zong sawltheih ding a a ngaihsun uh hileh kilawm hiveh aw…

Khasiat huai sa ing. I muh gige a piangpiang thu hi a, sang nuam takei leng ong piangpiang thu hi napi thei gega sa mah in um nuam het kei tantan ing. Pau Khat Suan