A Ihmu Zomi ~ Bob Tuangpi

A Ihmu Zomi ~ Bob Tuangpi

Galkap ukcipna panin 2008 thukhunpi pan hong piangkhia gam kimakaihnathak ah 2011 panin Union Solidarity and Development Party (USDP) kumpi makai Thein Sein leh apawlte in hong makaih uh hi. Tua 2011 -2015 kikal sung gamphuahkik nang ngimna tawh kikhelna (Political and Economical Transition -Top down change/Myanmar Spring) 2008 thukhunpi siiksanin (Displined Democracy) hong pankhia uhhi.

Amasa-in gamsung ki-ukna hoih tawh kalsuan kipanthak ding (Good Governance/Democratic Governance), anihna ah kumpi makai hoih/asiangtho suaksak ding (Clean Government), gambup kilemkik nang vaihawmna (Nationwide Ceasefire Agreement -Union Peace Conference), gam ki-ukna asusia golhguk neekna phiat zawh nading leh gambup ah zawnna khiam ding ( Anti-Corruption and Proverty Reduction) cihte ahihi (2011 -2015)

2015 gambup kiteelpi pan gambup makai hong suak National League For Democracy (NLD) in maban hong zomto uhhi. Gam makaih nang NLD kumpi in zong mungtup tuam hong luikhia leuleu uhhi. Tuate in, gamsung kilemkikna maban ( National Recogciliation and Peace Process -21st Century Panglong Conference), Democracy Ki-ukna diktak tawh kalsuanna ahilo 2008 thukhunpi puahpha ding/athak gelhpha ding (2008 Constitution Amendment) leh gambup ah thukhun kizelhna leh muibutna (Rule of Law/Law Enforcement) hippha diak deuh hi (2016 -2020 ???)

Zomi te in khat bek ineihsun gamvai sem Zomi Congress For Democracy panlakna tawh 2015 kiteelpi pan gambup Innpi leh Gamkee Innpi tutna agawm (6) ah kingah-in hih abeisa leh tulaitak gamsung minamte’ kilemkikna vaihawmnate ah (Union Peace Conference – 21st Century Panglong) khawmpi ah thu kisung thei/kamkupna kinei-in idinmun pulaakna zong gambuppi theih kipulaak khia thei hi.

Union of Burma/Myanmar suahtakna ngah nang hanciam hun kipan tuni dong gambup akikhel sim hun thupite i etkik tak ciang’n (Historic Turning Point) ah Zomi te mimal hanciamna akihelkha den hihang. Ahizongin tuni ciang Zomi te in igamvai leh minam nasepna ih khuangaihkik teh minam leh gamvai ah taangpi taangtate’ khanlawhna ih sanggam mualmite tawh kitehkaakna’n tualniam/ziakai mahmah lai mawk hi.

Adiakin Myanmar lam Zomi te 2010 gambup kiteel khitteh ikhuadaak leh ih kiim-le-paam aa sanggam teng in gamvai leh minam vai ah ih ihmut/khaangmat lam phawkkiklak hihang! Gamsung kumpizum nasepna tuamtuamte (Government Staffs) leh apualam (NGOs & INGOs) panmun hoih simsim ah nasem tampi ki om simtham hi. Tua bek thamlo-in, biakna kipawlna tuamtuamte ah zongh gambup bulpi dong leh gamdang kipawlna thupi honkhat tawh nasemkhawm honkhat om simtham hi.

Minam leh gamvai athahat nading gamvai nasemte atawsawn ding leh atawikhai ding (Check and balance) pen tualsung leh gamsung gampua kipawlnate (Civil Society Organizations & Community Based Organizations -INGOs &NGOs) ahihi.

Laigelhpa Myanmar gamsung muntuamtuam avazinkhak koikoina ah (Adiakin Shan State,Kayah State leh Kawlzang mun honkhat) gamvai kamkupna nei-in akihelkhakna leh amuhkhak thuthak tampitakte’ lakah thupi leh ettehhuai asak pen ih sanggam mualmite gamvai leh minam vai khanlawhna ah ih phawklohna ahang in gam leh minam khanlawhna tatak omnailo ahih ziak kilang sa hi.

Mun tuamtuamte ah minam tuamtuamte in gamvai leh minamvai athahat nang tualsung kipawlna tuamtuam ahi Khangno kipawlna, Numei kipawlna leh Sangnaupang kipawlnate in amau’ dinmun tawh kituak leh tualsung thupiang zui-in ( Issue based) ban ah thu-le-la kician siksanzui (Data based/Document based/Evidence based) panlakna neithei pahpah uhhi.

Zomi sung ah zongh tua bang tualsung kipawlna (CSOs/CBOs) kipawlna tampi om veve napi’n atungah igen’ mundang sanggam mualmite sang’n kituantual zaw/thanem zawlai tham hihang. Cihnopna ah Zomi sung tualsung kipawlnate hawmthawhna hilo manawt ding tampi omto lai ding cihna bek hi. Khuado, Zomi Nam Ni leh Sialsawm ciang bekin donghu/tawmvei ei sung kisatsuah ngeingaina bek kihiphot hi.

Gamvai leh minamvai athahat nading gamvai leh minamvai asemte tualsung kipawlnate in encikin tawsawn det akul (Monitoring group/Watch dog -Gtna :Media leh Research/Data collection) tampi kisam gige hihang. Gamkhangtote leh minam akhangto ding kithawite in ih pelhtheih loh pello ih nawktoh ding thu ahihi.

Zomi te igensa mah bangin gamvai leh minamvai nasepna ah gam leh minam lamhkik nading ahih naak leh (Zomi National Interest & Zomi National Building) ah ipantheihna tek (Sumhaute, Kumpi nasem uliante, Biakna nasemte leh tualsung kipawlna Non-Governmental Organization) te in aciang aciang ah hualkhat in ih luankhop kul ding hi.

Tua bang tuibang luangkhawmin imun tek ah panlaakna ih neihtheih khit tak teh ih minam thahatna (ဇိုမီးအမ်ိဳးသားစုေပါင္းစြမ္းအား) gam leh minam ading ih zat theih hun tak ciang’n Zomi mungtup mualsuah zo pan bek ding hihang! Agelh : Bob Tuangpi (07112018)