A hong sapna mun ki banglo ~ Dim Lun Zam

A hong sapna mun ki banglo ~ Dim Lun Zam

Matthew13:1ff Pasian nasepna ah i sepna i lawhcinna ki banglo ahih manin khat leh khat i ki muh dan ki banglo in, ki lungkia thei peuh mah a, ahi zongin, Topa Zeisu thugen tehna lungtang namli tungtawn in Kha Siangtho in a hong theih sak na khat ka hong hawm sawn nuam a tha ka hong pia nuam hi.

Zeisu in mihing te lungtang lei omzia namli in ong gen a, a khaici pen vantung gam lungdam na thu a hihi. I nasep na ah zong i sep na mun in leitang nei a, i leitang puakzia leh om zia te in i lawhcin na koitan hiam cih ong mu sak hi. Pasian nasem mipil te in, ihih thu tawh kisai in kha sung ah (spiritual mapping) kha gamlim i swae masak ding a gen uh hi.

Gentehna in, na na sepna mun pen “Lampitung” bang a hi munte gamte cini. Tua a teng mite in thungai phial mah leh a lungtang uh pen a kisiksik leitang bang hi a, kheng in sak a hih man in khaite lei sung ah kiphum thei lo uh a, vasa mu in tuah khiapah hi. Hi te asan theih na khagam pen a kidok khia (minus) gam ki ci hi.

Dawi mangpa in a mit uh a hum bitna mun a hih man in,0 bang zah in thu na ngen zong in, agah mu hak mah mah ding cih na hi. A hi zongin, a vei mah mah khat in thaman pia pia phot leh ama nungsang ah mikhat in na ‘AT’ (harvest or reap) ding hi mawk hi. Hih a ki pia khiapa a pen kua mah in paakta het lo ding a, mihaipa cih leh mi lawhcing lo pa in ki ciamteh kha ding hi.

A hi zong in, hih pen lawhcin loh na mun hi ci in mi khempeuh in taisan leh hih mun ah buh kisuan ngei lo a, kua mah in buh at ngei lo ding ahihi.

Zeisu in, khaituh leh a at te athaman ki bang na ci a, Sawltak Pawlu in akhang sak pen Pasian hi ana ci bek hi.

A nih na leitang nam te na sem ta ding in, suang leh lei ki hel leitang hi a, hih mi te zong zungkha zo lo in, tawntun lo a hih man in a kidok (minus) vive hi. A hi zong in a masa sang in, lametna om zaw deuh in lungduai kul na mun ahi veve hi. Hih zong ngaklah huai mahmah in lungkiat huai mah mah hi.

Bangbang a hi zong in, i lawh cin na pen ‘mitampi’ ingah ‘sumtampi’ lut cih tawh tehna (measurement) ‘muntampi pha’ cih tawh tehna, ‘ pil mahmah’ cih tawh tehna te pen Pasian a’ hi lo zaw a, mihing te a’ hi zaw ding hi.

Pasian in i nasep na te ‘Piciang tehna’ khat nei a, tua in “THUMAN NA LEH CIKTAKNA” cih BEK a hihi. Tua a hih man in thasial lo, lungkia lo,khua a vaak lai in hahkat in i sep ding Pasian deihna a hihi.

Ngaihsut ding thu te:

1. Nang A hong sapna mun ah na om hiam?

2. Tua a hongsap na mun pen leisak leh suangtawh ki hel lei a hih leh antan na thungetna tampi tawh thaman pia in nasep kulding cih phawk in la lungkia kei in.

3. Hih bang leitang te ah ongsap leh ‘Sangmang’ ‘Missionary’ nasep a sem na hihi cih ki phawk in la, bui aphak ma in tawp kei in.

4. Lungkiat na leh midang te tawh ki teh kaak na in dawimangpa khemna a hihi.

5. Leitung ah minthan na leh pahtawina te nangah kei ding a, vangtung ah nang ong ki mangngilh lo ding a, nakhempeuh a mu gige pa in, minthanna leh pahtawina tampi a hongpia ding hi. Dim Lun Zam