A Hoihlo lak ah Khat

Lengtong Kam Khen in, “Ih ki gen siatsiat zong ki khel theilo hi ve hang…”, a cih zong adikna om tham hi. Hong ki nial theihlohna mun mipi mai, ” Pulpit tung”, panin mikhat peuh gensiatna cihpen thu hoihlo lak panin a siah huai penpen khat ahihi. Pasian thu tangko na mun, phatna mun, ki niam khiatna leh lungsim piak khiatna mun Pulpit ahih manin a Siangtho lungsim hoih pen tawh zat ding pen ki sin huai hi. Khua lak vakvak in a vakna mun panin a hoihlo amuhteng Pulpit tung panin gensiat behpih cihpen nuntak gimnam nawn hetlo mikhat hita hi.

Gensiatna ahoihlo vive tampi lak ah thum gen leng:

1. Ih gen siat mi in hong thei kha keeilo in ih om pih mi khatpeuh kiangah midang khat gen siatna cih pen phattuamna om hetlo kampauna hi aa, kei hoih ing thupi ing cihna hilel ngel hi. Thulang genna ahih manin a vekpi in he..he..cih pih pah huailo hi. Hih bang mite na muh khak ciangin a nai ah om kha kei in. Phat tuamna lampi hong lak ngeilo ding mi khat ahihi. Tua bek hilo nang mahmah zong mun dangah hong gensiatna mun om tham lai ding hi cih phawk in. Thu kuppih het kei in.

2. Tuhun Online Media hun ahih manin zuu mun sa mun panin khat kiang bek in zong Online Internet panin mi khat peuh gensiatna zangh thei hi. Mimal ki gensiatna pen mimal ngaihsutna ciangciang hi phot ahih manin mipi adingin phattuamna pia hetlo hi. Mipi vai leh mimal vai ah Zomiten ki khen siam thei mahmah ahih manin Online sungah lai ki khah khat peuh Mipi ading vai thupi cihte…Mimal ading vai thupi cihte ki khen siam mahmah ta hi. Tua ahih manin online panin Thuthak leh Thucin mipite adingin phattuamna a pia thei ding thute ah Zomibup ki mainawn mahmah ahih manin mimal vai ki gen siatna tawh abuaite ki awl mawh man nawnlo hi.

thawntuang3. Mipi mai panin Biakinn Pulpit tung pan maw, Meetting na lak pan maw…cihte panin ki gen siatna pen Mipi a zakha, a ngaikha mipite adingin Pulpit/mipi mai-aa ading pa pen vangbei huai mahmah khat ahihi. Khantohna ding bang zah a thugenna lak ah aom phial zongin a naak sianglo Tuizawn tawh ki banglel hi. Tua ahih manin ki hoih genna cihte Zomibup in ih zat theih keileh zong Pulpit/mipi mai tung beek panin zangh kei beek leng hoih ding hi. Bang hang hiam cihleh na dinna munin a Siangtho mun ahihi.

Hih a tunga thute ka gen ciangin Zomite hih bangin ki gamta hi cihna hilo hi. Leitung mi khat peuh a hoihlo agamta mi khempeuh hih bangin a gamta tamzaw hi cih a gen ihihi.

Zomite khantohna ahoih ngaihsutna lam ah ki niam tuanlo ahih manin a ki lawm a ki tuak in agamta kam apau minam ihihi.

Thawn Tuang
Zomi Angvaan (Pasian Angvaan Zomi)