A gualzote tot lampi, Na gualzo nuam hiam?

A gualzote tot lampi, Na gualzo nuam hiam?

Mi khatpeuh kiangah na gualzo nuam hiam ci-in kidong hi leh gualzo nuam keng a ci om sam lo ding hi. Mi kim in gualzawhna kideih hi. Ahi zongin mi pawlkhat in “ Gualzo nuam mah ing, ahi zongin ka gualzawh nadingin bang sem ding ka hiam cih thei keng,” cih thei uh hi.

Gualzawhna i cih in, nam tampi om hi. Zum nasem mi khat adingin a za khan pen ama gualzawhna hi a, sang naupang khat adingin a sang sungah lai a pil penna in ama gualzawhna hi pah hi. Tua mah bangin sum zong mi khat adingin hauhna pen ama gualzawhna hi a, vanzuak mi khat adingin a vanteng a khotsiangna in a gualzawhna ahi hi. Tua ahi manin, bang lamah gualzo nuam na hiam cih pen nang le nang na kitheih ding thupi pen ding hi.

Gualzawhna pen Pasian aa hi. Hi mah hi. Gualzawhna pen Pasian aa hi takpi hi. A nungta Pasian a um a bia Zomite in na khatpeuh i sep i bawl ding simin Pasian mah i masak den ding mah hi pen hi. Tua ahi manin, gualzawhna i ngah nadingin Pasian zomah bang kisam hiam cih tawh kisai thu pawlkhat gen nuam hi hang.

1) Cidamna

Na khatpeuh sep ding bawl ding a om ciang’n, cidam a sep le damlo a sep kibang ngait lo hi. Lunglut dan zongbkibang loin, ngaihsutna piak zawh dan zong kibang thei lo hi. Pumli ci a dam ciangin thahat bek loin lungsim zong thahat hi. Lungsim tha a hat ciangin ngaihsutna hoih le gelna hoih tuamtuam kingah thei pan hi. Tua ahi manin, gualzawh ding a sawm taktak mi khat nahi leh na cidamna kimsiam inla, cidamna tawh kisai thu pawlkhat theihsawm in. Sum le lai a heite in ama ading ahi kei leh a innkuan adingin siavuan khat tuam neih uh hi.

2) Lawm le gual telsiam ding

Ka gualzo nuam cici napi’n, pamdunga vakvai khat tawh kithuah den mawk leh gualzawhna ngah lo bek tham loin gualzawhna tawh kigamla semsem lai ding hi. Gualzawhna a ngah nuam mi khat in ama kholhlih lawmble gual ding a telsiam ding thupi mahmah hi. A gualzo mite tawh a kikholhna in hamphatna tampi ngahsak hi. Bang hang hiam cih leh a gualzosa mite in bangci sep, bangci gel uh uh, bangci ngaihsut uh hiam cih leh ama adingin sum tawh a kilei zo lo a manpha pawlkhat ahi hi. Ahi zongin a gualzosa mite tawh kimawkkholh ding hi thei lo hi. Tua hi a, a gualzosa mi khat tawh i kikholh theih nadingin i ngimna i gelnate hoihtak le kicingtaka i gen theih ding kisam hi. Tua hi leh amau mahmah in zong bangci hong panpih thei ding, bangci hong hilh ding cih thei pan ding uh hi.

3) Ei le ei kitheihtelna

A gualzo nuam mi khat in ngimna sang, ngaihsutna sang a neih ding kisam mahmah hi. Ahi zongin tua ngaihsutna le ngimna nuai ah ka sep theih bang teng hi a, ka bawl theih bangci ciang hiam cih pen theihtel ding kisam hi. Gualzo nuam mahmah napi’n, thanemna awlmawk ngiat lo cih bang hi thei lo hi. Thanemna a nei ngiat lo mi on san lo hi. Ahi zongin thanemna a tawm thei penpen ding kisam hi. Bang hang hiam cih leh thanemna a tamluat ciangin hong susia nuamte in hong kaihkhiat nading uh baihsa lua ding uh a, ei le ei mahmah zong puk nading baih lua kha ding hi. Bang hang hiam cih leh a gualzo mi khat a pahtawi nuam mi a tam mah bangin a nungkaih nuam zong kitasam tuan lo ahi manin, i thanempenna mun ah zong hong kizawh pakpak loh ding thupi hi.

4) Khang hun thupiangte theihtelna

Khangthak hun a thupiangte bekbek thupitsak ding hi lo hi. A beisa khang hunte ah bang thu bang la piang ham cih pen limtaka kantel ding kisam hi. A beisa hun a thupiangte le tu laitaka thuliangte i kantel khit ciangin mailam hun ah bangci bangin gel ding bawl ding cih kithei pan hi. A gualzosa mite in khangthak thu bekbek kan loin a beisa hun a piang thute zong limtakin na kantel uh hi. Thutheihna a om lo ngaihsutna sung pan gelna hoih piang khia thei lo hi. Na khatpeuh a phuancilte in hih bang danin thu kantrl ciat uh hi.

5) Hazatna le muhdahna nei lo ding.

Hazatna le muhdahna i cih pen a gualzo nuamte ading bek a sia hi loin mikim ading hoih lo hi. Ahi zongin a gualzo nuam mi adingin hoih lo zaw kaan lai hi. Enna le hazatna kibang lo hi cih i theihtel ding kisam mahmah hi. Hazatna in mite hong langbawlsak a, muhdahna lungsim hong guan hi. Enna ahi leh amau tawh kibat nopna lungsim hong neisak a, hanciam nopna lungsim hong guan hi. Muhdahna le hazatna in lungsim gimsak ahi manin gualzawh nading lampi hong khaktansak thei hi. Midang khat muhdahna in vangik pua tawh kibang ahi manin vangik a pua mi khat in a vanpuak kawmin nadang bang mah septhuah zo nawn lo hi.

6) Kimuanna lungsim khangsak ding

Ei le ei kipum-muan ding cihna hi lo hi. Sem zo ding bawl zo ding ci a ei le ei tha kipiakna in kimuanna lungsim khanhsak semsem hi. Kimuanna a nei lo mi khat in a tup a sawmna tangtun zo ngei lo ding hi. Ngaihsutna sang, gelna sang nei ngam lo ding ahi manin, na a sepsep hangin madawk ngei lo ding hi.

7) Khualzin zel ding

Gualzawhna le khualzinna bang kisai laizang hiam a ci nuam om kha thei ding hi. Sepna bawlna khatpeuh ah hun sawtpi sung kidiahcip-in nasep bekbek tawh i buai ciangin lungsim navak nawn loin lungzing gawp thei hi. Tua banga lungzinna in sin tom lungtomna banah pumpi cidamna zong sukha thei lai hi. Khualzinna in muhna tangzaisak a, muhna tangzaina in ngaihsut hoih le gelna hoih hong nei theisak hi. Campany neite in a thuzekte le a thugelpite khualzinsak thei zel uh hi. A nasemte muhna ah a pi a pute uh thunuam hi, cih ding tawh kibang hi. Ahi zongin a taktak ah a thunuam uh hi masa loin a nasemte uh a nasepna sung uah lunggim singim in om mawk uh leh amau tung pan a ngah ding uh ngaihsutna hoih gelna hoih tuamtuamte ngah naen loin tampi suplawh ding uh cih thei ahi manin, Khual a zinsak uh na hi zaw hi. Min dang gamdang ah a tun uh ciang muhna thak ngaihsutna thak tawh ciah kik ding uh cih peh amau dehna na hi gige hi.

8) Tangzaitak in kantel ding

A bang lam ah gualzo nuam na hiam, na gualzawh nopna lam tawh kisai a gualzosa mite gelh laibu tuamtuamte sim ding le amau thugen tuamtuamte ngaih ding kisam hi. Na etteh theih ding mi kua om a hiam, tua mite tawh na kithuah khawm thei kei zongin amaute tung pan hamphatna khat le nih bek na ngah zongin hun na ngah simin amaute tawh kam kikum in. Thu dong den in. Lai na sim ciangin laibu khat bek siksan sawm kei inla laibu tampite sung pan tel siam in.

9) A kainawi ding nasep khat sin in

A kainawi cih ciangin na gualzawh nop pen ahi lo, nasep dang khat sin in. Limsuaih, tukpeng kimawl, maan zaih, lasak le tumging tuamtuamte khat peuhpeuh sin in. Tuate in lungsim siangsak-in tawldamsak hi. Na khat bekbek i sep ciangin a sawtna ah lungzing gawp thei hi. tua bang hun ciang, a kainawite sep ding kisam hi. Na Zomipihte simtheih dingin na share saksawn in. Lungdam, Job Cinpi (Zomi Laisim Nuamte)