A gualzo mite’n laisim hi ~ Dong Mung

A gualzo mite’n laisim hi ~ Dong Mung

A gualzo mite’ nuntakna sungah a kibang gamtat ngeina khat om den-a tua in LAI SIMNA ahi hi.

Hunkhat lai-in mi khat in leitunga sumbawl mihau Warren Buffet kiangah, “Hauh nading le gualzawh nadingin bangsem leng hoih ding hiam,” ci-in dotna a nei hi. Buffet in ama laibusaal(library) kawk kawmsa in, “Nikhat in laimai 500 bang lai sim in.

Tuapan pilna le theihna na khang ding hi. Pilna le theihna icih pen hamphatna thuap nih ahi hi. I theihna tawm ahihlam i theihna in i khantohna ahi hi. Ahi zongin tu-a ka gen danin a gamta mi tawm mahmah cih ka thei hi. Tua hangin a gualzo mi tawm hi,” ci-in a gen hi.

Buffet pen lai a nak sim mahmah mi khat ahi hi. Sumbawlna lam akipat akipan in laimai 600 pan 1,000 kikal laisim den hi. Bangzah takin nasem a buai phial zongin nikhat a tawmpen nai 5 sung peuhmah laisim den hi.

Amah bangin lai a nak sim mahmah a gualzo mihau pawlkhatte genbeh ding hileng:

Bill Gates (Microsoft Software neipa le mihau mahmah) in kum khat in laibu 50 (kalkhat bu khat ta) sim den hi.

Mark Cuban (NBA Basketball team; Cinema le TV Company nei) in nisim in nai thum sung laisim den hi.

Elon Musk (SpaceX, PayPal cih bang Company-te a neipa) in lai nakpi in a sim den hi. Vanlai(space) ah khualzinna a bawl theihna banghanghiam, ci-a a kidot ciangin laibu tampi ka sim hi, ci-in a dawng ziau hi.

Mark Zuckerberg (Facebook a phuankhia pa) in 2015 kumin gen ngei hi. Kalkhat in laibu bu 2 peuhmah sim dingin ka khensat hi, aci hi.

Oprah Winfrey (Oprah Winfrey Show ah thugenna nei-in a lawhcing mahmah mivom numei khat ahi) in a laisim pih lawm le gualte tawh kha khat laibu bu khat telin simkhawm in a kikum zel uh hi.

Hipen mi tawmkhate laisim zia i genkhiat pak ahi hi. A gualzo mi 1,500-te thu i kan ciangin amaute in a hun awngte vuah laisimna tawh hun a beina uh i thei hi.

A kitheihbeh thu khat in, amaute in lai a sim uh ciangin gualnopna ciang bek tawh sim ngeilo uh hi. Pilna le theihna a kibehlap sak thei ding laibute telin sim uh hi. Adiak in mi gualzosate taangthu bute amaute lungsim thalawpsak thei dingin ngaihsun uh-a, sim hamtang uh hi.

Nang e.. amaute bangin hau in gualzo nuamlo na hiam?

Mikang paunak khat ah, “There is no such thing as something for nothing,” na ci hi.

A gennopna ah, “Leitungah i deih khat peuh kimawk ngah theilo hi. Na khat i deih leh na khat piakkhiat kul hi,” a cihna ahi hi.

Tua ahih manin na hauhnop, na gualzawh nop, na lawhcin nop leh… LAI SIM IN. Deihsakna lianpi tawh, Dong Mung (Ref: The Mission by Andrew Merle)