A Etteh Huai Pawlpi

Thupatna:
Pawlpi (Church) cih kammal pen Laisiangtholui ah, kamkhat zong na kizanglo in, thuciamthak ah, Topa’ Zeisu in Peter kiang, hih suangpi tungah ka Pawlpi kaphut dinghi, cih a genpen a masa pen ahi hi. Greek kamin Ekkelesia ci-uha, mangkam in, assembly or to call out, eipau in mipi kikhopna or aki samkhia cihna ahi hi. A kisamkhia cihtak ciangin satan ukna pan-a, a kisamkhia cihnop nahi, ci-in, theologian pawlkhat ten gen uh hi. Leitungah Pawlpi lian a, aki ciamteh 2000 bang valding in kigen hi. A kiciamteh lote tawhsimleng a tulsawm asim in tamding hi, bang hanghiam cih leh hunkhat lai-a Kawlgam ah AG makaipi asemngei Sya Myou Chit in, Zomiten githa khat aneih nak uh leh Pawlpi phuanngam uh hi, acih mahbangin 2007 pan 2012 kikal Delhi ah, kawlgam pan-a apai Zomite sungah Pawlpi 5 kimbang omman hi, kici hi. Mailam ah, bangzah hongpiang laiding hiam, cih I gentheikei hi. Banghang hiam cih leh ei upmawh banglo in, kiamlam manawhlo a, khanlam manawh den ahih manin, a nisim, a khasim, a kumsim in khangkhangmai hi. Innkuansung khat nangawn, Pawlpi khat ah, kikhawm kimlo in, Pawlpi nih leh thum ah, aki khawm innkuan honkhat, Zomite sung mahmah nangawn ah I omta hi. Siahi zong kacipah kei-a, hoih hizong kaci ngamkei hi. Bangpawl bangpawl ah, I om zongin I pawlpi min tawh vantunggam kitungding hilo napi-in, ahi zongin paidan kician a neilo pawlpi te-in buaina tuamtuam tuak-in, a tawpna ah, ki khenthangna, ki mainop mawhna tuak-uh ahih manin, tua bang I tuahloh nading in tawm kikumsuk dih ni.

1. Missionna Asem Pawlpi: Theologian pawlkhat ten Pawlpi aki phuhphet in missionna aseppah ding ahi hi, ci-uh hi. Mission na I cih takciang in tampi tak huam hi. Naupang pattah na sang, tagah sang, pitek putek kepna inn, khamtheihzang leh mi hoihlote kepna inn, mundang khat-ah, va-om in, vabusa a, Pasianthu a theih nading uh vahanciam, vagen cih bang dan etc, tampi tak om hi. Tua hi-a, Mission na I cih pen I sepnop nak leh ei tawh kituak a, septheihluat ahi hi. Pawlpi pawlkhat in Missionna sepding ngaihsun loin Pawlpi van leh neek leh dawn, pawivai bekbek tawh buai masa uh ahihmanin, buaina lianpi tuak uh hi.

2. Sumpi Zeksiam Pawlpi: Sumpi zeksiam I cih takciang in mum tampi tak-ah, Sum kizang ahih manin, a vekpi in, I genkhin zokei dinga, atom in gen hileng, thukhun aom bangin, a Sum neih uh azang, Pawlpi pen a etteh huai Pawlpi ahi hi. Sia Job Thawngno in Pawlpi pawlkhat, a sumpi uh a siate, a makaite un, a ut bangbang un ze-uh ahih manin, kikhop hunkhat in sumpi appa in, Topa Zeisu min in kong-ap hi, cilo in, siate, upa makaiten a utut un a zatding un, hih sumpiteng kongap hi, ci-liang hi,ci hi. Leitungah gam khat leh gam khat buaina zong sum leh pai vai-ah, amau gamte sang in khantoh zawknading nak-ut lua-uh ahih manin aki do lawh, aki buailawh tampi om hi. Topa Zeisu nungzuite sung mahmah ahzong, sum leh pai vai-mah in buaina omin, sum deihluat na hangmah in zong, Topa Zeisu nungzui Judas Iscariot in, amakaipipa uh Zeisu galte kiangah hekgiap hi. Laisiangtho in sum deihluatna in mawhna hi, naci liang hi. Maan hi. Sum deihluat manin a pumpi na ngawn uh a khuallo mitampi tak, eimisung mahmah na ngawn-ah omta hi. Bangbang ahi zongin, Pasian biakna dinga, akipia sum pen siata, upa makaita bek hilo in a neupen pan alian pen a, ahih manin limtak azek pawlpi peuhmah khango in, cidam hi.

3. Tukhun Limtak Azui Pawlpi: Pasian biakna Pawlpi bek hilo, dawibiate nangawn in thukhun nanei uha, tua thukhun a zuilote peuhmah, bangbang asem zongin kuitunglo uha, a nuntakna un thuaklawh hi. Khangluilai bang dawi a thoih uhteh, sawlpang kongpi ah khai or kelkong ah khai or khuanawl ah khai-in, sawlpang kikhai napi innsung or khuasung ah, a lut teitei mi peuhmah aluang un tuakgiap hi. I biak Pasian mahmah zong thukhun thupi asa leh thukhun abawl masapa ahi hi. Eden huansung a, singgah tampite lak-ah huapenneloding, na nek uh leh na nek nini un nasi ding uh hi, cih thukhun, Adam leh Eve tungah napia hi. Tua thukhun Adam leh Eve in, a palsat manun, Eden huan panin ki nawhkhia in, tu’n gentheipi in leitungah nungta in, zing leh nitak nekding leh I mailam hunding bekbek buaipih in I omtek hi. A eteh huai Pawlpi I cih in a thukhun uh a neu lianin limtak zui-a, pawlkhatte tungah nemdeuh, maisakpawlnei cihdan hilo in, ahi bangmah a, athu khun uh azui liailiai Pawlpite pen a etteh huai pawlpi kici hi.

4. Meeting A Zahtak Pawlpi: Meeting thu kikupna aneih uhteh, a gennop bangbang uh suakta tak-in, makaiten gensak in,amau zong genpah ziahziah tek uha, thu khen hamsa khat aom khak leh atamzaw thukimna mangin, zui-liailiai uh hi. Meeting sunga thu kikupte zong, a kilawm bangin pulak-a, Delegate meeting sunga thu khensat a hoihlo aom khak leh delegate meeting dinghun ngakzo a, tuamah tawh a khelkik, Join Meeting thu khensat a hoihlo aomkhak leh Joint Meeting mah ngak-a, tua hunteh, a tamzaw thukimna mah zui-a, a kalsuan Pawlpite pen a etteh huai pawlpi kici hi.

5. Biakpiakna A Zahtak Pawlpi: Biakpiakna ah zong, khat leh khat kitheisiam in, Khasiangtho nasepdan a thuklam, a zailam tellua uh ahihmanin nang upna mankei, ko-a bek aman hi, cih bangdan omlo in amau suahtak dandan leh Laisiangtho tawh kituak-a, Pasian biakna anei Pawlpi pen a etteh tak pawlpi kici hi.

6. Piakkhiatna lam-ah: Kuamah gen kuamah hanthot ngak sese, kulsese loin, Pawlpi van leh na leinading leh etc, ah sum aki donteh a neihzah tawh kituak-a, apiakhia, a zekkhia, a zangkhia, Pawlpite pen a etteh tak Pawlpi kici hi.

7. Maikai leh mipi: Biakna makai leh leitung lam-ah makai pawlkhatte bang, Pasian danin a ki ngaihsun om leh kilawm kasa hi. Thukhat gen, nakhat asep nak uh leh amau hih pen ahoih pen akhial vetlo ding danin a ngaihsunkha makai pawlkhat om hi hang. Nungzui pawlkhatte zong makaite aneu muh, Farisai ten Jesu amawhna akhialh nading azon mah bangun, makaite khialhna ding azong thapai I om hi. Maikai hoih I cih in thuman thutak genngam semngam in anung zuite zong hilhngam, piangam, huhngam hi. Nungzui hoih I cih ten zong makaite a thanem na munte ah huh in, itna tawh panpih, gen etc, uha, langpanlozaw uh hi.

Thukhupna: Ute naute Pawlpi I cih takciangin biak-inn bek, Zumbek, siate, makaite bek, hizenzen lo-a, anungtan-a, a tute, kikhopsunga, apualam khawng-a aomte, aneu pente, a kipan I vekpi in, I kipawlteh I omkhopteh I sepkhopteh Pawlpi kician, Pawlpi aki cithei pan ahi hi. Tua hi-a, Pawlpi etteh huai, etteh tak I cihte, a biak-inn ahoihman, a Zum uh aliat man, sia/makai atam man, mipi a tamman, sumpi a tamman himasa lo hi.

Khaibawi