Taiwan gamsung ATM sungpan US$2 Million ki gukhia

Taiwan gamsung ATM sungpan US$2 Million ki gukhia

Taiwan gamsung aom zattawmding sum lakkhiatpakna ATM setsung panin guta te’n sum US$2.17 Million Dollars gukhia uh cih Taiwan’s Central News Agency in genkhia hi. Taiwan’s First Bank te neihsa ATM panin aki gukhia hi a, July 09 pan July 10 Weedend ninihsung aki gukhia ahihi.

Taiwan’s First Bank te genkhiatna ah Taipei leh Taichung khuapisung aom ATM 34 sungpan in guta te’n agukkhiat uh ci a, Malware namkhat zangin ATM panin agukkhiat uh ahihi.

Local Media te genna ah hih ATM guta dingin aki ummawh pen mi 3 hi a, tualak ah mi 2 tepen zanni in Taiwan gamsung panin pusuakkhin dingin ki lamen cihi.

Hih guta te mi 3 lakah khatpen Russia gammi hiding hi ci’n Police te’n gencian uhhi. Ahi zongin adang mi 2 tepen banggammi cih theicianlo uh a, akancian laitak ahihi.

Weekend zumkhaksung in guta te agamtang uh hi a, ATM panin sum aki guk pen Monday ni zumkahkik ciangin nasem te’n theipan uhhi. CCTV te panin Checking abawlkik uhciang in guta te gamtatna teng mukhia uh cihi.

First Bank’s Vice President Yeh Chung-huei ii genkhiatna ah hih Bank ah sum akoih Customers te pen hoihtak bitna kapiading uh a, hihhang in amau neihsa te sukkhakna omloding cihzong Local Media te tungah genkhia hi.

Hih ATM 34 te sungpanin sum kigukna hangin adangte aki gukbehlohding ngimna tawh gamsung muntuamtuam aom ATM 768 te lakah 300 zong kikhakcip phot cih China Post te’n genkhia hi. ZD Sawltak #zomidaily