2020 Party, Candidates leh Nepotism

2020 Party, Candidates leh Nepotism

Ong tung ding kitelpi ciang Zogam ah party tuamtuam siksan in MP a ut candidate tampi kuanglui nuam in kithawithawi ta cih thu i za ciat khin hi. A party leh ami kician a genkhiatna a om nailoh hang, party tamlua leh candidate tamlua MP panmun kituh kidemna pan tua meizom a i ngah ding, i lawh ding a gah pen a limci ding sang a limci lo ding lampang in lek zaw hi.

Banghang hiam i cih leh, Zogam ah Zomite “thu tawh” sang “tanau meltheih, beh le phung tawh” nungta zaw, thu vaihawm zaw hihang. I thu theihna, i thukhualna leh saupi lungngaihna pen i nepotism in khuplet zo mahmah lai mawk hi.

Tua ahihman in party leh candidate ong tamlua leh tua tanau vai thu vaihawmna leh tua nepotism ii thuneihna zungthuk kha semsem lai ding hi.

Tua ahihman in mimal quality neilo pi, tanau, beh le phung tha muang a, mimal hamphatna ding mitsuan, tu le tu a ngahtheih ding ong kikhia ( i phut, i vaihawm ahi peuhmah lo ) contract peuh lam-etna lel tawh alum alet i suah khak ding patauh huai zaw tham hi.

Tua gu in a khang vat ding a, khang bangzah hiam ong lehtawn sak ding hi. Pilna nei leh thuthei khangthakte in nakpi tak ngaihsut huai mahmah hi. A beisa a kipan tuni ciang dong Minam bup a huaizo ding makai muanhuai i neihlohna pen i pil i siamna in a cinloh man hizaw lo a, nepotism hang a khat le khat i kimuan zawhlohna hang ahih lam phawk huai mahmah ta hi.

A beisa hun saupi a kipan i tangthute ki-enkik in, muanhuai i sak ding, a huaikim zo ding mi kimu lo hihang. Muanhuai lo i hihman in kimuang lo hihang. Kimuang lo i hihman in khut kilen a nasep khop theih cihbang omlo hi. Pangkhawm theilo i hihman in kithahat theilo hi. A tawpna ah panmun ngahkha sunsun in tangpi tangta sang in sanggam tanau khutkuak dim khat petmah lo buang phattuamna pia hetlo pah takpi hi.

A suksia sak sawnsawn pen in, mipi tangpi tangta’ ngah ding kilapsangna leh khantohna huai mang a ipsung khat ah guang ong suak sawnsawn hi. Ngah ding khaktanna bek hilo, suhkhiatsak ong suak sawnsawn hi. Ahi ding mah sa in kisuang hetlo ban ah tua mun tuh tantan ngam lai tazen hihang.

Nepotism i a siatna leh a zumhuaina khangthakte in limtak ngaihsun phapha dih ni. Angsung leh duhhop huaihamna in thu ngaihsut theihna lungsim leh thu muhtheihna mit humcip sak a, tua zah a zumhuai a zum theilote mipi leh gam le nam sik le tang a maikhak mun ah ding ding a ong kipat loh ding, mipi in zong pilvang tak a i nawlkhin, i pampaih theih ding thupi leh lunggulh huai mahmah ta hi. Mite’n mainawt, ei tawtawn niloh lai ding maw? Pau Khat Suan