2020 a kipan Zomi makai dingte

2020 a kipan Zomi makai dingte

2020 a kipan Zomite makai ding peuhmah..
1) Gam leh Nam, Khua leh Tui a it a vei hiding. A itna leh a veina a gengen mi hiding hi.

2) Thuman leh a citak mi hiding hi. Nainganyii pen zuau gen theihna leh mi khem theihna siksan/platform hilo a, mipi’ ading nasem ahihna tel in, a sep kei leh mipi’ maikhak, minam bup a nenniam ahih lam a kithei mi hiding hi.

3) Amun zui in a pilna zong a niam pen hih anuai a bang hiding hi.

3a) Hausa – Kawlpau Kawllai tawh thu gen thei, kumpi lai, zum lai a geel thei a at thei hiding hi.

3b) State MP ding ahih leh Hausa quality ban ah Manglai mangpau a thei, Mangpau a thu a gen thei leh nainganyii a gen thei hiding hi.

3c) Pyihtaungsuh MP ( Pyithuh Hluttaw, Amyotha Hluttaw .. anih in ) ding ahih leh State Hluttaw MP quality ban ah Manglai tawh zumlai leh nainganyii lai a geel thei, a at thei ban ah, kiging khol selo a Mangpau tawh nainganyii gen thei, mi tawh thu kinial, a kitawng thei hiding hi.

Hih a tung a quality kisamte a hih theilo peuhmah kuanglui ding nangawn in ong kipan vet kei leh hoih ding hi.

Hih quality neilo pipi a a kipan teitei peuhmah amau leh amau mahmah zong kithei in, “a zumhuai sim gige kahi hi”.. cithei ding uh hi.

A ut leh a ngim giugiau peuhmah tu a kipan na kisin khol pah ding in i kihanthawn hi.

Hih munte a a dingngam ding a a kimuang peuhmah, tu a kipan kum 2 sung limtak kisin takpi leh a kisam quality a ban zolo omlo ding hi.

Gen bek maw?.. i cikha hiam?

Sang siate’ nasep khempeuh lak ah a thupi pen sangnaupangte hilh, thugen ahi hi. Amau’ thu genna hang a mi asuak vive ihi hi. Tua a thugen uh nasep in a kisimsak thei diam? Semlo hi..ci in a kimawhsak thei diam?

Biakna siate’ nasep lak ah a thupi pen leh mipi tawh direct a a kisai pen “thugen” ahi hi. Amau’ thu genna hang a gupna ngah, vantung gam mitsuan vive ihi hi. Tua a thugen uh nasep in a kisimsak thei diam? Semlo hi..ci in a kimawhsak thei diam?

1988 kum Kawlgam bup a buaicip laitak a agal control gige pen BBC ahi hi. BBC in a sep pen gen bek mah hi a, thuman leh adik, apiang khin thu tampi a gen kawmkawm in “hici leh… huaci leh…” ci a agen, mipi in zong a zuihlel tampi om hi.

A nasep uh bel “gen”, ” gen cihtak a gen” .. hilel. Aih leh… a genbek hi, a kici thei diam?

Thu vaihawmna khempeuh “genna” masak bek in ki vaihawm hi. Genbek hi.. a kici thei diam?

Genlo a sem pen tangtat hi a, gen masa lo, theitel sak masa lo a mi nasem a sawl pen order pia, command cihbek hi a ukcip, dictating zia le tong hi.

Gen masakna omlo nasepna, kuppih theihpih masakna omlo kimakaihna bel Kawlgam ah kum 60 kisin khin a, i pil i theih naikei leh cihtheihna ding a om nawnlo, khuak bing himai ding hihang.

Thugenna pen a gah, asia apha tampi a piangsak thei nasep thupi in i muhtheih hun ngaklah huai mahmah hi. Pau Khat Suan