2013 kum Asylum-seeker te tettan beiciang Card pianawnlo in laidal tawh laihtading

2013 kum Asylum-seeker te tettan beiciang Card pianawnlo in laidal tawh laihtading

Tuni 15 February 2017 (Wednesday) ni in Malaysia UNHCR zumpisung aom Conference Room sungah CLU (Community Liaison Unit) te makaihna tawh Meeting kinei hi. Hih Meeting sungah Kawlgam minam tuamtuampan kipawlna makai te “Sub-Ethnic Burmese Minority Leaders” teng sam uh a, 2017 kumsung UNHCR Policy thakkhat pulakna neikhia uhhi.

Tua apulakkhiat ahihleh 2013 kumsung in Asylum-seeker Card akipia khempeuh tettan abei ciangin Card tawh ki Renew saknawnlo in, laidal bektawh ki Renew saktading cih ahihi. Hih Policy thakpen 01 March 2017 ni akipan kizangsuak tading ci’n UNHCR thunei te’n genkhia uhhi.

2013 kumsung Asylum-seeker Card a ngahte cihciangin adiakdiak in Mobile Registration hunlai Card akipia te kihel hamtangding uh a, a Card tawite uhpen gentehna 791-13C-xxxxx cihdan in akipan te ahihi.

Abeisa in Asylum-seeker Card apiak uhciangin kum 2, kum 3 cihbang tettan neisak uh a, ahi zongin March 01 ni akipan apiakding uh laidal ii tettan pen kumkhatbek hisak tading uhhi.

Pawlkhat te Asylum-seeker Card tettan bei in laidal tawh alaihsakni mahin RSD Interview ding Appointment piakikding uh cihi. Ahi zongin Asylum-seeker Card tawi khempeuh kumkhatsung in avekin Interview kibawlzo loding ahih manin, tettan laihsak in apaikhempeuh RDS Interview dingin Appointment piakhin zoloding cihi.

RSD cihpen aki tomlawhna hi a, asau in “Refugee Status Determination” ahihi. RSD ii akhiatna pen Manglai in UNHCR Website ah anuai abangin suaksak uhhi.

A vital part of being recognized as a refugee is Refugee Status Determination, or RSD. This is the legal or administrative process by which governments or UNHCR determine whether a person seeking international protection is considered a refugee under international, regional or national law.

UNHCR in Refugee hitaktak hi cih hong ciaptehtheih nading un RSD Interview pen naphi tektek kisam a, athupi mahmah Interview khat ahihi. Gambel dingin ngetna anei mikhatpen UNHCR ahih keileh Government khatin leitungbup, gamkuamkhat ahih keileh gamkhat ii zuihding thukhun “International, Regional or National Law” tawh dotcianna aneihkhit dikdek uhciangin Refugee khatin ciamtehpan uhhi.

RSD Interview pen sawtthei hamtang a, pawlkhat te naikhat, nainih sungbang thudotna neithei uhhi. Hih RSD Interview azo tebek Refugee Card taktak piapan tading uhhi. RSD Interview akia te ahihleh Refugee Card a ngahtheiloding hipah hi. Tua ahih manin hih RSD Interview hongkisap ciangin na tangthu hoihtak na gencian theihding thupi mahmah hi.

UNHCR in hihbangin avaihawmna pen Malaysia kumpi ii thupiakna tawh avaihawm uh ci uhhi. Malaysia kumpi in Refugee taktak leh Refugee in aki ciamteh nailo Asylum-seeker te theiciannuam uh ahih manin, abaih in khenciantheih nading in hihbang in avaihawm uh ahihi. (Abeisa in Refugee Card leh Asylum-seeker Card te amailam kibangsak uhhi)

Note: 2013 kum masiah in Refugee in aki ciamtehsa, Refugee Card atawi khinsa te bangmah kisaikhakna omlo hi. Card tettan abei ciangin a ngei mahbangin hong Renew sakding uhhi. 2013 masiah in Refugee Card a ngahte adingin hihpen thulamdang hilo a, UNHCR te’n tuahunlai in apiazia uh tu’n hong zatpih kikding hilel hi. Tua hunlai in Asylum-seeker te Card kipia ngeilo a, A4 laidalpi bek tawisak uhhi.

2013 kum ciangin Asylum-seeker te A4 laidal azat taangin Card piak hongkipan uh a, tuapen 2017 kumciang alaihkikding uh hita hi. Abeisa in “Asylum-seeker Card” leh “Refugee Card” ki lamdanna gencihtak in ih gengenhang atelzo mahmahlo pawlkhat om a, tuate adingin telnop mahmah tading hi.