ZYA Melbourne pan thu zaksakna (31 January)

Zomi Youth Association (ZYA) Melbourne pan zaksakna (31 January)

Khuapih tuipih sanggam u leh nau, tukum ZYA Calender 2019 hong kihawm khia, tha hong pia fund sum ding atawm atam cilo hong piakhia mimal kim tungah Lungdam hong ko masa ung. Biakna pawlpi tek ah hong kihawm ahih manin a ngahlo adeih ih om leh ZYA makhai khatpeuh tungah kizasak thei hi.

January 26, 2019 Australian Day lawpna ah ZYA Melbourne in inntek tantangin Zomite ngeina kizepzia (Traditional costume) lak theih ahih ma-in lungdam angtang mahmah hihang. Australia gam nithupi pen khat ah Zomite akhatvei kihelna leh a masa pen dingin kiciamteh a, maikum ciangin Zongeina la leh lam tawh va zai ziahziah ding hihang.

Tukum 2019 sung ZYA in ih tup ih sawm ih geelnate tawmkhat a kician zaw in hong tangko ung.

1. ZYA malakna tawh kumpiten Zolai sang ong hawn sak in, February 9, 2019 ciangin sang kipanta ding a, Prep panin year 12 ciang a ut peuh Zolai sang kikah theita ding hi.

2. Minam leh ngeina kembitna ah ZYA in limtak in zuun ding kihanciam mahmah a, Pupa tawn dan akipan tualsuak vanzat leh thu le la tawh Australia kumpi nithupite leh Zomi nithupite pawi khamin, kihel hamtang kisawm hi.

3. Zomi huhna kisam peuhmah huh zawhna ding ZYA lunggulh ahih mah bangin, gentehna : Inn kituah, Kamphen kisam, Hawhna ciahna mawto hawl ding /paipih ding kisam hong kingen khenpeuh kihanciam ding hi.

4. Kumpi tawh kizopna ih thuklut theih zawhna ding leh inntek zawk theihna dingin lunggulhna tawh Councilte phalna bangin socialwork sep ding lkilunggulh hi.

5. Delhi, Malay leh Thai a om ih Zomipihte Australia hong tuntheih na ding lampi zongin kumpi uliante kimuhpih ding hi.

6. Melbourne Zomi sungah dahna ih tuah ciangin ZYA in Inntekte deih bangin tanuk nasep tavuan la ding hi.

7. Australia gam Adelaide Zomi Innkuan, Brisbane ZYA leh Melbourne ZYA te thukimna bangin Zongeina kumkhen phawkna in KHUADO CUP 2019 September 27,28,29 sung Pawi kikham kik ding hi. Tukum Khuado Pawi ah Australia gambup Zolia Zotang kidemna, Bawhlung bet (Volleyball) kidemna leh Bawhlung suih (soccer) kidemna kivaihawm ding hi.

8. ZYA fund zon na dingin

a) Kumsim ZYA Calender kibawl ding hi.

b) Khuado fund dingin Lucky draw bawlin Khatna, Nihna leh Thumna dong prize kipia ding hi.

c) ZYA T-shirt ahoih mahmah fund huh ngetna in kibawl ding a, Tukum Inn lusi fund sum nget pen kisawm nawnlo phot hi.

9. November 05, 2019 ciangin Annual General Meeting kizang ding a, December 07, 2019 ciangin Zomi carol night zang khawmin makai thakte ki-aapna tawh kizang khawm ding hi.

10. January 26, 2020 Australian Day parade ah Zomi ngeina van leh kizep ziate lak in Zo ngeina la leh lam tawh va kihel ding hi hang.

Ngaihsut piakna, dotnop, telnop a om leh [email protected] ah hong muak ung.

Kipum khatna tawh khantoh ding alunggulh ZYA tangin

Info & Publicity Department
ZYA Melbourne
January 31, 2019