ZYA HQ pan Nasep dan theihsak na

ZYA HQ pan Nasep dan theihsak na

Sisan nasep zia
Nidang Sisan kisam te le Sisan piading te kiho sakin ki vai hawm hi. Sisan piate a thadim kik kul veve ahih manin pawlkhat ten tua ading Ks. tul 30-40 bang pia in aneilo ten 500-1000 cihbang in nana kipia uh hi.

Sum deih man ahih loh uh hang Sisan hawmte khatlekhat kithuza kik uh in lemkhinlo ahih manin zumpan ciangtan sakin kivai hawm hi.

Tua ading in Sisan thawl 1 kisamte in Ks. 10,000/- sipiate tha dim kik nading apiak ding ahi hi. Tuaban ah ZYA Zumpan Sisan hawmdingte inn ah pi in zato ah kipuak a man teh inn khakkikna datsi man Ks. 2,000/- kilak beh ding hi.

Motor nasep zia

Lamkal accident zato puak, cina zato pan inn ciahpih cih a kipan Kalaymyo sipin huamsung pen sum kingenlo in a lungnuamlo a hong pia teitei te lah fund ah kilutsak hi.

Kalaymyo pua lam ahih le a nai, a gamla zui in sum kila hi. Motor hawl cial kul ahih manin le Motor Diesel manding cihdan bektawh amet kilalo in kipai sak hi. Motor neihsate pen aniam nam le 4×4 nam hilo ahih manin amual, aguam kantan kul namte lampi hoihloh nate kizui sak kim zolo hi. Tua dan a zat theih ding motor sang nam le 4×4 nam neihzawh nading zong aki hanciam mahmah laitak hi.

Oxygen nasep zia

Oxygen kisamte pen abung a mawkna in kikawmsak in, gas thunman pen Ks. 3,000/- tung ahih manin zumpan gas adimsa tawh ahih le Ks. 3,000/- kila hi. Apua lam pan athun nuamte zumpan a mawkna in abung kivaihawm sak hi.

Theihding

Hih pen atangpi ading gelna hi a minam, pawlpi, khua ki deidan lo in kisem hi.
Azenzen in bangmah nei hetlo takpite in Pawlpi Siate theihpihna maw, Hausa upate theihpihna maw tawh a khong in kivai hawmsak hi.

Sisan, Oxygen le Motor tawh nasep pen khang sawnsawn dong kizop zawh nading lunggulh na tawh fund kicing nei zo nailo ihih manin sum kila ahi hi. Ahih hang in bangmah neilo takpite ading in zong ZYA pan fund zonna ahun zui in kinei zel a Leitungbup Zomite in ahun zui mah in huhna, panpihna nongpiak manun zong nasep kizom toto thei hi.

Atuam diak khat ah hih bangmah neilo takpi te ading ci in Kawlgam sungpan Sanggam Zomipih khat in Kawlsum Ks. 2,000,000/- hong piakkhiat manin zong kilung muang tuam mahmah hi. ZYA HQ, Kalaymyo April 2, 2019