Zuaupi hi ~ Kham Khual

Zuaupi hi ~ Kham Khual

Leitung ah mi hampha leh en’ huai kasak mahmah mi nam nih om hi. Khatnate ahih leh mawl mahmah, pil lua het lo napi, leitung pilna ah zong pil mel lo a hih hang Topa Jesu leh a mihin’ pihte uh a it mahmahte ahi uh hi. Amaute in Lai Siangtho’ gente zong dik takpi mah hiam cih zong kan sese lo, Lai Siangtho gen ahih peuh leh um suk pah, zong nuntakpih pah uh hi. Hih bang mite pen en’ huai kasa mahmah hi. A nihnate ahih leh leitung pilna ah zong pil mahmah, Topa Jesu a itna uh zong mi tampite in a phak lohte ahi uh hi.

Kei a ding a ka teel theih ding bang hileh a nihna pen ka teel ding hi. Gentehna in a min in lo le’ng, Oxford University a Dr. John Lennox cih bangte pawl ahi hi. Hih pa pen Ph.D thuap thum bang a ngah Science leh Philosophy pan a ngah hi in ahih hang amah pen leitung mun tuamtuam ah zin kawikawi in Science in Pasian om ahih lam kawk hi ci-in thu gen kawikawi in Pasian um lo tampi tawh zong kam kinialna (debate) nei mun mahmah hi.

Adang:- (1) Dr. William Lane Craig (Ph.D in Philosophy, Ph.D in Theology), (2) Dr. Sharon Drickx (Ph.D in brain imaging, Cambridge), (3) Dr. Allister Mcgrath (Ph.D in Chemistry and Theology), (4) Dr. Ard Louis (Theoretical Physicists) hi pa bang pen Cambridge University ah Chemistry hun khat lai-in hilh in, tu-in Oxford ah Physics hilh hi. A nu leh a pa zong Biologist tuak hi in tu in Africa ah missionary in om uh hi, (5) Dr. Francis Collins (Physician- geneticist) Scientist minthang mahmah, DNA code a hongte lakah khat ahi hi, Dr. Francis Collins pen USA gambup in zong a kisaktheipih mahmah uh hi a, Khristian ahih zong poi asa zong na om bilbel hi.

Hih a tung a min guk kong teel khiat a kong gelhte pen leitung pilna ah zong mi nuai ah a om het lo, Pasian itna ah zong mi nuai ah a om het lote hi uh hi. Pasian om hi, Pilna in Pasian lam kawk hi, ci-a a vak kawikawi a tangkokote ahih manun amaute’ min kong tuang sak se hi. Amaute bangbang a pilna nei mah, Topa zong um, Topa a it mipil tam mahmah a, gelh ding ci le’ng a sawm-a-za in zong ka gelh thei ding hi. Hih bang mite I muh ciang in Pilna leh Pasian kigal lo, Upna leh pilna kigal lo hi cih kician mahmah hi.

Ahi zongin ei’ sung khangnote lak ah a zumhuai mahmah thu pen I khangnote in B.A. ciang, M.A. ciang khawng ah Philosophy hiam, Science hiam hong lak uh ciang un, “Pasian om kei, Lai Sianghto zong maan kei mai in teh” a ci khawng peuh om mawk hi!

Hih pen a zumhuai pi hi. Den a i gen a tung a i min lawhte pen Lai Siangtho thu ah Ph.D ngah, leitung pilna ah zong Ph.D ngah cih bang hi uh a, “Pilna leh Lai Siangtho kigaal, Pasian om ke’n teh” ci peuhmah lo-in, “Pilna in Lai Sianghto a maanna lak a, Pasian om ahih lam cian sak zaw hi” ci uh hi. Amaute pen ei sanga a hai zaw cih bang hi lo uh hi.

A nai pen etpak in ei sungah zong Sia Hau Za Cin Suante (Ph.D in Chem.) zong om hi. Sia Hau Za Cin tungtang a genna ah Sia. J.M. Paupu in hih bang in na gen hi “Science leh Pasian thu kikalh lo; Scientist hih hangin Pasian biak tawh kilehngat lo ahihna ama tung panin kician mahmah hi” ci hi. Tua ahihmanin khangnote lak ah pil semsem le teh Pasian um kei semsem ni teh, Pilna leh Pasian thu a kikalh hi cih thu om thei zel pen Zuaupi Hi. Topa zahtakna in Pilna kipatna hi (Pau 1:7a). Ei leh ei a kikhemkhem mite hi nawn lo ding in Topa in hong thaksuak sak tek ta hen.

Note: Pilna ka cih ciang in thu theihtheihna hiang tuamtuam Philosophy, Sociology, Science, Archaeology, Anthropology, History, Psychology, Theology leh a dangdangte kagenna ahi hi. A tung a min kigente zong a dam lai hi uh a, a thugennate uh Youtube pan et theih hi. Laigelh: Kham Khual Hatzaw