Zuau pen zuau hilo in a taktak ahi hi ~ Hau Za Cin

Zuau pen zuau hilo in a taktak ahi hi ~ Hau Za Cin

Ek pen a uih hilo in a gim hi. Saum/sathu pen a uih hi. Zuau pen zuau hilo in a taktak ahi hi. Eden huan ah gulpi in Eve pen a khem hi a, zuau a hilh hilo hi. Politics pen zuau hilo in kikhemna ahi hi. Huih lakah innpi lam ding ciin hong khem uh, hong umsak uh hi. Zogam i neih ciang Zawngtah nangawn a kung ah kah kul nawnlo dinga, Helicopter tawh kilo ta ding hi… cih kamleng kiza ngei a, zuau hilo in kikhemna ahi hi.

A kigen takpi mah hihtuak a, tua akigen pen kikhemna ahi hi. Hunkhat ciang i pianna Zogam ah kiciahkik ding hi cih pen zuau hiam, kikhemna hiam… ngaihsut tek dingin hoih hi. Canaan Zogam pen i mailam ah om maw, i nunglam ah om cih pen ngaihsut dingin hoih hi; ahih kei leh tu laitak in om!

A khangto minam hi hang cih pen kikhemna hilo a, zuau zong hilo hi, a takpi mah ahi hi. Ahi zongin a khangto khin hita hang kici thei nailo ding hi. Kuamah khangto khin cih bang omtheilo a, a khangto penpen minam zong khangto khinta kici theilo hi, amau zong maban na neizel uh hi. A niam pente leh a khangto pente tawh i kiteh ciang i omna mun kithei a, ei omna lui tawh i teh ciang a khangto hi hang akici thei ahi hi.

Ahi zongin bangzahtaktaka manlang in khangto ihi hiam cih pen kikan ngei mello hi. Hih sangin a manlangzaw thei diam, hih sangin a zia-olzaw leh a sia diam cihte kan huai veve hi. Mite pha kei hang cih pen zuau hi a, mite sang khangto zaw hang cih zong zuau hikik in, a khangto khin minam hita hang zong kici theilo hi.

Mawtaw, taihinn, innmun, logam lianpipi nei in ahi zongin mipi zat ding Hall pi khat, tualpi khat, mawtawpi khat cih bang i neihkhop zawhloh pen a ngaihsunlo i hiam, a deihlo i hiam, a thei nailo i hiam, a kisapna om salo i hiam, ahih kei leh ei angsung bek theilua i hiam. “Itna Pasian na hi” cih la sasa in ahi zongin i kim i kiang ah omte it tuanlote i hiam. Gamsung minam sung it tuanlo eima angsung bek a khualte i hiam. The Fool Rich i cihte kihi zaw hiam.

Hau mahmah pong, ahi zonga hai mahmah. Hauh pen khantohna ahi hiam, neih sunsun a manpha a zat theih pen khantohna ahi zaw hiam. A ki zum hoih mahmah a zangtheilo Sazuk thupi a kisa hiam. Rev. Khup Za Go in, “A Mawknapi Hi” acih essay i phawk tek hiam. Hau mahmah in i minam khual tuan kei leng, pil mahmah dingin i minam phawk tuan kei leng, siam mahmah ding i minam ading sem tuan kei leng… a mawknapi…

Naupangte, “Na liat ciang bang sem ding?” “Gamdang pai ding,” cih lian mawk pen zuau hilo in a takpi hih tuak kasa hi. India ah bel “IAS officer hi ding, Police officer hi ding, DC hi ding, Headmaster hi ding…” cih khawng kigen thei hi. Papite pau kawm pak leng, ko hun in “Phakan pai” cih pen minthang mahmah ahih manin “Phakan pai diam” ka kici zel uh hi. Tua phakan pen koi ah om cih zong a kithei hi tuanlo hi.

Kikhemna a kilim zat mahmah khat om a, tua pen, “Khuazing ah na vak leh sikha in hong man ding hi,” cih hi. Sikha pen om takpi ahih manin zuau hilo a, mi zong man thei takpi ahih manin zuau hilo a takpi hi. Ahi zongin khuazing ah vak peuhpeuh, a diak in naupangte, sikha in man ding cih pen zuau ahi hi. Khuazin zawh ciang vak nawnlo ding, inn ah om ding a cihnopna uh na hi gige hi. Ak tawphun ne leng phun hat ci a, kikhemna, nekloh ding cih a deihna uh hi. A ne dingin a deihsakzawk uh om ahih manin naupangte in duhgawh kha leh piak masak ding om hi acihnopna hi.

Thuman hong kihilh in, “Hih pen picing nek dingin kikoih zel hi,” ci uh henla, zuau “Hih pen naupang nek ding hilo hi,” hong kici kei leh ahoih ding hi in, i picin khit ciang (ci ngaingai dih ni, upa te cih dan in) hong kikhem ahih lam kithei pan hi. Tua ciang lah “aw haw” cih bek in omta a, kilakik thei nawnlo hi. Ak gilzial ne leng gamsung pai ciang khaugui palsat zolo ding ciin hong kihilh a, nek loh dinga hong khemna uh ahi hi. True lies.

Zuau pen a om takpi hi a, a taktak na hi mawk hi. Zuau pen zuau i sak leh na hi deksuai lo a, a taktak ahi hi. Ngaihsutna saupi hong neisak kammal pawlkhat om — Kiten khit ciang Sazuk sa vive ne ding; kei nong ngaih leh na cih bangbang ka om ding; thupha nong piak leh kong it den ding; ka hauh ciang mizawngte ka huh ding; ka neih ciang Pasian ading ka piakhia ding; khangno kik hi leng Pasian ading ka sem ding; gam kinei leh kikhangto ding (up huai khollo tawh kibang, gam kinei leh kihaza in nitum lo ding i hia?)… and so on… Hau Za Cin (Phuitong Liim)