ZRO pawlpi thu lunghihmawhna leh deihsakna thupulakna

Thupulakna (Press Release): Zomi Re-unification Organization Pawlpi Thu Lunghihmawhna leh Deihsakna Thupulakna

November 14, 2018 ni in Zomi Re-unification Organization Pawlpi min tawh “Pu Thanglianpau, President, ZRO Pomnawn Louhna Thuphuan” (Thuphuan) ahong kibawl a kipan in sak leh khang, sim leh mal, tuipi galkhat a om Zomi khempeuh in lamdang kisa mahmah hi.

Tuamah bangin, United States of America (USA) gam sung a om Zomi-te in zong hih Thuphuan tawh kisai in lunghimawhna kinei ahih manin, USA gam sung a om Zomi namkee (Tribe) tuamtuamte a kigawmkhopna Zomi Innkuan USA, Inc. (ZIUSA Kipawlna) in Thuphuan tungtang a thupiangte limtak in khinkhai in hih Thupulakna ka bawl uhhi.

1. Sak leh khang, sim leh mal, tuipi galkhat ah akikhen Zomi-te a kigawmkhop theihna ding ngimna anei Zomi Re-unification Organization (ZRO) Pawlpi sung ah, atung a Thuphuan tawh kizui in Makai panmun kituhna, kimawhsakna, kilangpanna ahi zongin, tua Thuphuan hangin Zomi Namkee (Tribe) tuamtuamte kikal ah khat leh khat kitelkhialh theihna ahi zongin, tua Thuphuan siksan in Zomi taangpi taangta, numei naupang sung ah tualsung buaina cihte hong piangkhia hi.

2. Tu khang hun ading in adeih huailo hibang tualsung buaina hangin, tu laitak in ih minam buppi in ih lam-et ahi Tualsuak Minamte thuneihna (The Rights of Indigenous People), eima’ Minam thu eima’n vaihawmtheihna (Self Determination), ih gam leh ih leitang tung ah thuneihna (Territorial Rights) cih minam hamphatnate hong kikhaktan thei ding ahih manin, ZIUSA Kipawlna Board of Directors pawl in nakpi takin ka lunghimawh mahmah uhhi.

3. ZRO Pawlpi sung a, makai panmun kituhna hangin Zomi-te kigawmkik theihna ding maban lianpite sung a kal masate ahi;

• (a) India gam sung ah Zomi-te a’ding in Territorial Council a kilam theihna ding,
• (b) Myanmar gam sung ah minam thuneihna bukim (Self Determination) tawh Zomi State a kiphuh theihna ding,

cih mabanpite kikalsuan theilo a, Minam buppi hamphatnate akisuplawh ding ka dah mahmah uhhi. Hibang thubuaite tu khang hun a, minam mabanlianpite ih neih laitak in ahong piankhiat dihdih pen ZIUSA Kipawlna buppi in poi ka sa mahmah uhhi.

4. ZIUSA Kipawlna in USA gam sung a om Zomi Innkuan kipawlna (49), a mimal in (15,000) valte a kigawmkhopna hi a, USA Gam Kumpi in khua leh tui kipawlna kician khatin ahong ciapteh ban-ah, United Nations Organization – Economic and Social Council (UN ECOSOC) in Consultative Status ah ahong san’ ahi hi. Tua dinmun panin, USA Gam Kumpite thu vaihawmzia, UNO Kipawlna Kivaipuakzia cihte leh tu khang hun a leitungbup minamkim in azuih dingin akihanthawn ahi Rule of Law, Good Governance cih zia leh tong hoihte tawh Zomi buppi kivaipua in kimakaih ding pen ZIUSA Kipawlna in ka lunggulh tawntung uhhi. Tuamah bangin, ZRO Pawlpi sung ahzong Thukhun zui a kimakaihna, diktatna leh thumanna tawh Kivaipuakzia cihte a kizuihna dingin itna takpi tawh ka deihsak uhhi.

5. ZIUSA Kipawlna in sak leh khang, sim leh mal, tuipi galkhat a om Zomi buppi sung ah Gamgi (Political Boundary) hangin kikhenna, Gammi (Nationality/Citizenship) hihna hangin kikhenna, Namkee (Tribe) leh kampau awkaih hangin kikhenna cihte om nawnlo a, si khat sa khat, sanggam unau laizom khat, minam kician khat hihna tawh Zomi buppi kigawmkhop theihna dinmun (Political Status) kician khat akingah zawhna ding kilunggulh mahmah hi. Tuamah bangin Zomi-te akigawmkik theihna dingin minam maban ah ma apang ZRO Pawlpi pen ki-it mahmah a, kimuang, kisuang mahmah hi.

6. ZIUSA Kipawlna in ZRO Pawlpi it in ka muan mahbang un, ZRO Pawlpi tawh kisai in anuai a bangin muhna leh sandan ka nei uhhi.

(a) 1993 kum a kiphut, ZRO Pawlpi pen sak leh khang, sim leh mal, tuipi galkhat a om Zomi-te kigawmkik in Zogam alam dingin a kithawi, Zosuan Zomi khempeuh in kidalna dingin amuan asuan Zogam Salphate hi a, minam tuamtuamte mai ah kum tampi sung kipkho takin adingtang zokhin Pawlpi kician mahmah hi ci in ZIUSA Kipawlna in angtang takin ka thei uhhi.

(b) Tuamah bangin, President Pu Thanglianpau Guite leh Vice President Pu Calvin H. pen ZRO Pawlpi Thukhun tawh kituak in Term khatkhit Term khat akiteel toto Minam Makaipite ahih manun ZIUSA Kipawlna in ka zahtak mahmah uhhi. A panmunte uhtawh kituak in Pu Thanglianpau leh Pu Calvin in ih Minam Mawhpuak zo mahmah uhhi ci in ka thei uhhi.

(c) Ahi zongin, November 14 ni a Thuphuan bangin Pawlpi President theihpihlo a, Vice President in Cabinet Meeting sam cihbang zia leh tongte ka sang theikei uh a, hibang zia leh tong, ngeina dante pen leitung gam tuamtuam ahzong kizang nawnlo hi cih thu ka tel uhhi.

(d) Tuaban ah, Makaite khat leh khat kimawhsakna tawh kisai in Pawlpi Thukhun tawh ahi zongin, Gam ki-ukna thukhunte siksan a mawhmat theihna khatpeuh kician takin akilah theih masiah mimawh mikhial hilo hi (Innocent until proven guilty) cih ngeina pen akhangto gamte leh minam thupite in azuih ahih manin, ZRO Pawlpi inzong ngeina dan hoihte zuihsiam ding kilawm ka sa uhhi.

(e) ZRO Pawlpi in a kician mahmah Kivaipuakzia nei a, kiciamna tawh akikhung Thukhunte nei ahih manin, President a kipan Zogam Tangval Salpha khempeuh in tua thukhunte zuihsiam tawntung ding kisam ka sa mahmah uhhi. Makai panmun kilaihna ding ahi zongin, sum leh paai zeekna ding ahi zongin, nisim maban kalsuanna ding khempeuh ah Pawlpi Thukhunpi tawh kituak in kalsuan dingpen Zogam Salpha khempeuh mawhpuak ahi hi.

Tua ahih manin, Zomi Innkuan USA Kipawlna in, a tung a Thuphuan tungtawn in ahong piangkhia tualsung buaina hangin anuai a Thu leh Dinmunte lunggulh in ka ngen uhhi.

1. Zomi-te kigawmkikna ding madawk in ma apang ZRO Pawlpi pen tu laitak a teelcing President Pu Thanglianpau Guite in limtak in makai in mainawt ding,

2. ZRO Pawlpi sung a thagum hatna suangin panmun kituhna (Coup Attempt) peuhmah khawl ding,

3. ZRO Pawlpi sung ah makai panmun kituhna tawh kisai in Pawlpi Thukhun om bangin kalsuanpha (Rule of Law) in picing takin kimakaih a, thudam tawh makai kituh ding,

4. ZRO Pawlpi Makaite kikal ah kilemna leh kithusimna (Mutual Respect) a om theihna dingin Biakna (Saptuam) Makaite’ panlakna, kaihkhopna, leptuahna leh makaihnate mangkim ding,

5. ZRO Pawlpi panpih in, a Ngimnate a thukimpih Zomi-te sung a Namkee (Tribe) tuamtuamte in ZRO Pawlpi zahtak, thupi bawl in phungvuh ding, Namkee khatpeuh in Pawlpi pen aituam neih sawmlo ding, Namkee khatpeuh in Pawlpi tung ah aituam deihna siksan in thuzawh sawmlo ding, ZRO Pawlpi thu tawh kisai in Namkee khat leh khat liangko kikim in kizahtakna tawh vai hawmkhawm ding, Namkee khempeuh akigawmkhopna Zomi Council kipawlna min tawh vaihawmnate zahtak in, masak ding,

6. Zomi sung a kikhaikhawm Namkee (Tribe) khatpeuh in ama aituam deihna leh hamphatna dingin ZRO Pawlpi leh a Makaite langpan in, Pawlpi mindaina ding leh tualsung buaina a pianna dingin numei naupang taangpi taangta hawlhthawhlo ding, tawsawnlo ding, khemlo ding,

7. A tung a Thuphuan hangin ahong piangkhia, Pawlpi sung hi taleh, Namkee kipawlna sung hita leh, khua leh tui kipawlna khatpeuh sung a Makaite tukhawmlo, maitang kimu a kikumlopi in khat leh khat kideihlohna thuphuan, kipomlohna thuphuan, kilangpanna thuphuan cihte, kongzing leh Social Media ah pulaknate zang nawnlo a, gam leh minam itna takpi tawh lungsim siangtho takin kikumkhawm in thu leh la vaihawmkhop theihna zia leh tong hoihte kisin ding, zui ding,

Zomi Innkuan USA Kipawlna in Zomi-te minam picing semsem ahih theihna dingin Ngimna Bulpi khatin kinei a, leitung minam tuamtuamte lak ah picing tak leh kiptak in vai kiding hi. Zogam leh Zomi-te sung ah kilemna, kithusimna, ki-itna khang semsem in, Zomi-te in akhangto minam asuah theihna dingin anungta Pasian muanna tawh ma kipang tawntung ding a, akisapna bangin kumpi thuneite, leitungbup kipawlnate tawh khut kilen in vai kihawm ding hi. Zogam leh Zomi itna tawh; Board of Directors (Zomi Innkuan USA, Inc.) November 23, 2018