Zotawi lianu mah.. (Tangthu)

Zotawi lianu mah.. (Tangthu)

Ka handphone hong ging ciauciau ka zak ciangin ka omna kisilbuk sungpan mainul teng kawmsa in ka pusuak pah hi. Ka lukham tunga ka handphone nutsiat ka et leh number ka theih ngeiloh khat na hi a, la teitei in Hello ka cih leh a langlam panin ka zakcim theih loh awnel dikdek khat in ” Hey hong kinawh o. Niangtui ih dawn pahpahna sai sungah kong ngak zawh nailang sawt khin ta aimaw. ”

“Bang vai om a? Kei sangkah lua ding cia ana kithawi hiveng. Bangcia na phone lopi tawh ong hopih na hia?”

“Ka phone tawh ong holeng ka uten hong tawng pahpah uh ahihciang a lampi a phone kikhaite tawh ong ho hing ei. Thu lamdang om kei, keizong sangkah ding mah hi ing. Hong zawn phei o maw.”

“Awle. Bye”

Hihnu tawh ka kizuih zawh uh zong hong sawt pian ta hi. Zia leh tong zong kitel khin in, duh leh deih teng zong ka kitelpih khin uh a, ka kibat lohna uh tampi om hi mah taleh tuate in ko kizopna hong nawngkaisak zo lo hi. Amah pen minam dang ahih banah Biakna dang hi sawnsawn lai hi. Mi nuamsa innkuan sungpan a khangkhia ahihmah bangin sumlehpai lamsangah lungkham ngei lo a, kizem kipuah lam zong siam in, asilh aten khempeuh kilawmpih loh nei lo a, a maituamna vom tawh hong kithawi ciangin zong a hoihna kilang zo veve lai hi. Neklehdawn zong alim nono thei mahmah hi. Amah tawh kithuah peuh leng a nuam lo khat zong om lo a, nek khempeuh zong alim lo khat zong om lo hi. Amah ka geiah om peuh leh ka muh khempeuh hoih ka sa gai mai a, gensiat ding leh phunna ding mahmah hi leitungah ka mu kei hi. Khuasung bang vak khawm le-ung Trafic khong hong Jam den pian mai leh zong phamawh kisa lo zo zawzen hi. Amah pen mipil khat hi a, ahizong in hong thugen khempeuh hoihpen phial mah taleh numei thungen ahihna tawh a thukim lo ka kineih thei zel a, tawmvei ta ka kinial masa hamtang den uh hi. Tua in ka ki Itna uh khangsak semsem kik zaw bilbel hi. Itna lahdan asiam zah mahin a gendan zong siam a, amel ahoih zah mah in adangte zong hici zawdeuh leh cihna ding mun om lo liang hi cileng kikhial lo ding hi. A khut akhe te zol hilhial in, amai omdan leh a thapuak mahmah zong amah abawlpa Pasian in gensiatna om lo dinga abawl ngiat hi hamtang deuh leh kilawm ka sa a, Pasian in mihing abawl ciangin bel taka abawl leh zulh pian a abawl zong na om veve hiding cihpen hih ka lawmnu ka muhni a kipan ka tel pah hi. Milim suai siamten zong amah sanga hoihzaw suai thei ken teh cihnop huai phial hi. Vukgam a khangkhia ahih mah bangin aci asa ngo in, zutzut taihtaih puahpuah bang dekdak zawzen hi. Amah amuten Pasian melhoihna tawm bang telzo tuam dingin lamet huai hi. Kampau zong siam in, kamsiam zatna ding mun zong thei mahmah a, kamkha zat a kulna mun ahzong a kilawm ciang khat sung kheh thei veve hi. Amel ahoih mah bangin a lungsim zong gensiatna ding om lo hi. Hong it takpi ahihman in ka lungkim loh a agamtat khak ding kidawm mahmah hi. Sang ka kah lohni inzong midang tawh na kikhol tuan lo a, sanginn sungah a tutcip kei lezong a duh teng lei in sanginn sungah laa ngai kawmin amah bek om hithiat lel hi. A deihkaih nong ciphial zong un ka lawmnu in ka vang na tang den hi aci nuam ka hihi. Muanmawhna ding peuhmah in gamta kampau lo hi. Amah tawh ka kitheih khak pen kei adingin lungnopna ahihi. Sang ka lutcil ni un amah ka muh phetin hoihsa mawh lo hiding ka hiam ka va naih phei pah a ka hopih pah hi. Theih ding teng ama tungpan ka dot khit ciangin ka subject lak uh na kibang sawnsawn lai ahihman in tuani a kipan ka kikhen thei nawn kei uh hi.

Thu tampi kikum in vai tampi ka gel khawm uh a, anu leh apa tetawh hong kimu sak in, a pianpih sanggam tezong ka theikim phial hi. Amau zong hong itbawl tek uh hi. Ahizongin biakna leh minam kibat lohna hang leh Zomi khat ka hihna tawh lawm bang bekin ka kithuah pih hi. Ka kikal vuah gii ka khung uh a, tua ka khun uh gamgii pen pelh loh ding ka hanciam phapha uh hi. Nilehkha te hong beibei in khatvei amah tawh zan anne khawm dingin ka vak khia uh hi. Annek kawmin mailam hun ding ka kikum uh a, thu ka kigengen uleh nuam lua hiding hiam sangkhak ciangin hong zuih sawm mawk hi. Amah ka itna tawh tua thupen thusia in ngaihsun lo in lungkim takin ka thukim pah lel hi. Ankham khit ciangin taxi ngakna munlam ka zuan uh hi. Hong zuihni ( cise leng hong zinni ) ding pen sangkhak ka ciahni ciang hiding hi. Taxi khat hong tai kiaukiau ka muh uhciang in khutvan in ama omna inntual dong ka va kha hi. Tua zan pen khua lah dam pian in kha lah zan dang sangin taang pha zaw lailai ahihman in olno taka mangpha kikhak ding pen thubaih hi peuhmah lo hi. Ahizongin ka taxi hawlpa in a pitpit thumvei hong ginsak khit ciangin ka lawmnu hong letna khut tegel hemkhia in taxi khawlna lamah naupang sangkah nuamlo anuakte bangin maigum takin ka kikhin phei lihlih hi.

Sangkhak kuan ciangin ciahna ding meileng ticket ama ading tawh zong ka lei khawm pah hi. Ticket 2 ka leikhit lam leh ka paini ding uh ka lawmnu ka zasak hi. Ani hong tun petmah ciangin ka vanteng tawh meileng station lam zuanin keibek ka pai hi. Lamkal ah thu tampi ka ngaihsun hi. Hih ka lawmnu in hong zui leh mi hong muhna ah a ciahpih suak mawk ding inga ka nu leh ka sanggamte, ka tanaute tawh kiho thei lo ding, ka bangkua sungah amah hopihna dingin mangpau ka zat loh hong phamawh ding, ka innkuanpihten hong deihpih phial zongin lungleng khuangai in om leh keilah amah tawh omkhawm den thei loding, tuani ciang hehpih huai lua ding hi. Ngeina kibang lo leh minam kibang lo, biakna tuam, tenna gam lah kikhat lo, pau kilamdang lailai, ama ading saupi ka ngaihsutsak ciangin hehpih huai ka sa lua hi. Pasian thupha tawh von nihthum kitawi in hilezong amin dingun Nuamno leh Khualpu cihte Zomi khat ka hihna tawg kei bilah hong zaknop pen dinga, ahizongin ama bilah hih minte sangin Cinderela cipeuh a zaknop zawk ding banah telnuam zaw in a lawh zong nuamsa zaw ding hi. Kei kamsungah vaimimcim leh voksa cihte lim mah taleh ama adingin voksa diakdiak bang pen lipkhap huaiden dinga, duh leh deih zong hong kibang zo tawntung lo ding hi. Tanote hong khang uleh pute tungah thupha ngetna in tukzu kholh hong kul dinga, tuahun ciang hong baih lo ding hilai hi. Bang hang hiam cileh ka lawmnu nulepate adingin Zozu pisawmbel phungah tut kiukiau a gawlongneu khat tawh atuicil teng va hup niloh ding pen amau ngeina hi lo ahihman in nuamsa lua lo ding uh hi. Tuabang teng leh thu tampi ka ngaihsut ciangin itna sungah ka bualpih ngei nai loh Zotawi lianu bek mah ka lungsim sungah hong lian pen a, ngeina leh pau kibat pih Zolianu mah in hong hup zo zaw hi. Tuabang thu laigilte ka ngaihsutsut lai takin ka phone hong ham vauvau leuleu a, Hello ka cileh a langlam panin ka lawmnu in hong dawng hi.

“Kei hong kithawi khia ta ing ei. Koilai ah hong ngak ding na hia?”

“Entrance ah ong na ngak ning maw.” ciin ka dawng hi.

Ka gal a naipi kisuang ka et leh ka pai hun hong cing dektak ta hi. Ka lawmnu lah hong tung thei nai tuan lo, ka ngaknop hang lah meileng ih cihpen bus banga kholsak ziau theih hilo ahihman in ka nutsiat mai loh hong phamawh hi. Ka vanteng ka tutna ding munah ka koih khit ciangin Entrance geia ding Security pa hopih in a khutah laiip khat leh dangka 50 ka humkhawmsak hi. ” Lawm aw hih dangka 50 tawh nang adingin na duh khatpeuh atui ahi a aha ahizongin na leina inla, ahizongin tu zawh minit 10 khitciang in nungak puankang silh, sunglass vom bulh, jeanpant eng teng khat Bag vom tawh hong lut ding hi. Tuanu in nangpen meileng numbat hong dong ding a, na gen kawmin hih kong laiip piak na piasawn hamtang in. Na piak kei peuhmah leh palikte hong mansak ding ka hi maw” ciin thu ka vaikhak hi. Tua khit ciangin meileng omna lamah del liangin ka tai phei pah hi. Ka tutna ka tun ciangin ka phone hong ging leuleu a ka dawng kei hi. Aging hong kap ciangin ka phone phel in ka simcard ka phelkham a ninbung tawnung penah top nawn loh dingin ka senbawl hi. Meileng hong kikhin pah ahihman in keizong kuama hong phawkpih loh a ka puak lungsim vangik lel in ka mit ka sicip a, ka khuk tegel tungah ka lu ngasuk in ka bil tegel hum in ka kuncip hi.

Tuabanga ka kikhen zawh uh kha nga khit ciangin lamet lohpi in laikhak khat hong tunga ka room ah lut in Coffe dawn kawmin ka sim hithiat leh hibang in na kigelh hi.

” To,
Phawkden leh itluat U aw,
Lungsim kitamzan a khitui leh naptui tawh keibek nong nutsiatni in sih ding longal ka teel ding dang om lo hi. Tuani pen kei ading in maitaina leh lungnopna abei ni hiliang dingin ka lamen a, nuntak gimzong nam zo nawn lo in lungsim leh pumpi hawmpi in ka vanteng tawh innlam zuan in ka ciahkik hi. Ngaihsut kician mel zong nei lo in sih ding bek ngakin khakhat dektak phial ka nuntak khit ciangin khatvei zankim mi daih laitak in ka lukham nuaia ka koih nong laikhak nutsiat pen ka sim hi…” Kong it tawntung lawm aw keibek kikhual hileng hong ciahpih ding hi’ng, ahizongin ih mailam ding saupi ka ngaihsut ciangin ki awilopi mah in ka ut lohpen bangin a gamta ka hihi. Tulai tak nong telkhial zongin nikhat ni ciang hih ka gamtatna hangin lungdam nong ko kik dinga, tulai taka ih khitui luangte tuani ciang nuamna khitui in hong laih ding hi.. Minam leh biakna kibatpih mah tenpih ding sanga a hoihzaw om lo hi…” nong cih in ka mit vak sakin itna takpi tawh nong gen ahihlam ka tel ta hi. Kei lungsimnat zah leh kei thuak zah mah in nang zong na thuak ding lam kong thei hi. Ahizongin U aw na ki lungnuamsak ta in maw, banghang hiam cileh keizong hih nong laikhak ka simkik khit a zingciang akipan keilehkei ka ki tangpilsak a, ka maiphiat in nang tawh ih kitheih mapek a ka om ngeidan mah bangin thathak leh lungsim thak tawh maitai takin ka omkik thei ta hi.
Hong itden
……”

Laikhak ka sim khit ciangin ka lawmnu maan ka kepden pen lakhia in, a tungah khut nga in ka lawmnu ading thu ka ngetsak a thupha ka pia hi.

(Pure Fiction)

…Zomi Quavadis…..

Francis Lamthang