Zopuan lo-ngaal’ hong silh ke’n maw

Zopuan lo-ngaal’ hong silh ke’n maw

Zolapi awi-in, Zolaam-laam nuam hang, Zopuan mah hong silh linlen ve. Maangkaang te’n “Sing from the same hym book” a cih mah bang-in, minamvai ahizong sumlehpaaibawlna ah, tuplehngiimna kibangteng mapang-khop ding hoih a hihi. Deihna kitel-meello pi-in, kumtawn khatawn ih tuhkhop hang’ thumin tuanlo khading hi. Tukhawm tingteng, hakgega mah in, a thaneemzawzaw kinelhsiahna hilel hi. Tua hi aa, ngiimna leh mungtup kibat kul aa, bangci matut ding cih kikum leeng’ phattuamna om phadiak hi.

Zopau in, “Sialvom leh sialvom mah kingai” ih ci aa, Mangkaang te’n bel “Birds of a feather flock together”a ci uh hi. Lungsim suakta tak in, ih tutkhop ih khawlkhop ciang in, lungtai in sunlehzan na ngawn ih phawk kei hi. Seplehbawl ding zong thanuam ban-ah ngaihsutna hoihnono hong phulkhia zuahzuah zawdeuh aa, ki mazang phadeuh hi. Alibaba Company neipa Jackma in “Na lungsim kibatpih uh zong in, kipawlkhawm in naasem un”ci-in nasep-kipannuam te hanthawtna pia zeel hi.

Eimi te citak ciding maw, kigentel ciding maw khat in, behlehphung khualehtui kipawlna kihahkat mahmah hi. Taangpi in hong theipih ding lunggulhna a omlo, vaithupi kikupna a omciang midang kisam nuamlo aa, zong kideihphalo lel hi. Mudahna hilo napii- kisai phalo kisa hi aa, midangte’n zong theikha lolel hi. Tua mah bang in, innkuanvai leh minam vaite a pualam mi leh thu tawh toknawi-kaaipan ding a hoih kei hi. Ngeina leh Biakna-pawlpi zong khentel ding a hihi. Banghang hiamcihleh, biakna pawlpi cihciang in, a tuamtuam om aa, lungsimpuakzia zong a tuam hipah hi. Hakkol kibanglo kipuakhawm theilo hi. Masuan kibanglo tonkhoploh hoihzaw ding hi.

Tuunnu khat sung pan, piang tektek zong lungsimpuak kibang kimlo hi. A hizong, unau innkuan khat hihna tawh a kivaihawm te eilungsimlian hita keileh, seploh phamawhbek hilo, innkuanbup phattuamnang a hih man-in thasial lo in, ih bawhhuan kul hi.

Innkuan sung ah Innkuan lutang a hi’ NulehPa te-in a deihna uh kitatsat lo-in, genleh lamlah kulden aa, tate’n zong a mau khangcinna dungzui in NulehPa deihna theikawm inleh, a mau deihna-uh zong a genzeel in “ Suangpi suangneu in thek” zeeldingthu zong a hihi. Tua hikei leh, innkhumkhat nuai ah omkhawm, sikhat-sakhat veve zong kitelkhial thei aa, buaina tampi piangsak thei hi. Khasiatna tawh kidim, lawpna omlo, a thazawm gai innkuan a hiding hi.

Tate omlo in NulehPa kici theilo aa, NulehPa omlo pen innkuan bucing kici theilo hi. NulehPa kimlo te tagah a kicih mahbang in, taneilo Nupate zong bucing kisazo denlo uh hi. Minam khatzong innkuan khat mah a hihi. Tua hi aa, innkuan lutang NulehPa a hih bang in, minam lutang zong makaite a hi uh hi. Innkuan khat a suah hang’ NulehPa piicing pahsamlo aa, PiilehPu, NilehGang, BehlehPhung tawh a kikumkhawm leh a semkhawm Zongeina hoih neite ih hihi. Ih hihna, thahatna-thaneemna, eilehei sang’ hong theitelzaw pawlkhat na om gige cihna zong a hi hi. Tuabang aa, ei hong teltheih hongdeihsak minei aa, a maugenna telsiam leh gamtat luheekna kaan, a hoihzaw a tawm hi.

Mihing pawlkhat te’ ih pil leh ih handan kizangkhial thei aa, mawtawhawltheilopi- khat in mawtaw-hawlsiam khat kihawmthawh ngam, teltheihloh pi’ galzaak bektawh zong kito ngam, upmawhthu khawng thutak sa ngam, puatham theihna leh muhna tawh a bul-teltheihte khawng ki nial-ek ngam lel hi. Khut-meelek zong taanglo pipi, nasemsem te kihawmthawh thei hi.

Bangbang ahizong, Pawi ih bawl-ih siim ciang in, a thutawh kituak ban-ah, ei tawh kilawm-kituak puan ih silh bang in, thu kikupna khat a omciang zong a thutawh kituak aa, eimunciat ah mapang in, gamtaa leh kalsuan theileeng maazang phadeuh ding a hi hi. Nantal’suan