Zomite’n Lambu Ciang Bek Sam Thei

Zomite’n Lambu Ciang Bek Sam Thei

Mangpiza (Executive Engineer) ngah khinsa tawh Chin College Construction Project (Kalay College) ka tun zawh College lamna ah sep ding bawl ding teng ka man khit ciangin ( 1991 – 1994), Kawlpi ah keima tenna ding inn lamh ka kipan hi. Inn lamna ding a ka khol sehnel ka kong mai ah 5 sudrum ding khawng vum eu-au in om hi. Naupangte sehneel tungah kimawl thei a ka deih kei hi. Khat vei innsung pan ka pusuah lian leh ka sehneel tungah ka veeng naupangte akimawl laitak ka tuakkha lian a, lau kisa in; “ Hey! Guai! tai meemgmeemg ni ei! Lambu pa’n hong mu! “ ci in a taikeek mangg pah uhhi.

Lambu ih cih pen ei tangpi tangtate theih dingin ATO (Assistant Township Officer)/Myo-oke za tawh kikim hi. Zo gamah Ciimnuai’ tate sung pan Lambu sem masa, U Suan Za Kam, U Tun Kam, U Ngo Nang, U Kam Khua Tual, tua zawh teh U Vungh Tual, U Awn Tual, U Mang Za Cin, ‘Hawkguam Lambu’ U Tual Vungh cihte pawl hi ding hi. Amaute lakah U Suan Za Kam, U Ngo Nang, U Kam Khua Tual, U Awn Tual leh U Vungh Tualte in Mangpi za (Executive Engineer) dong hong ngah uhhi.

Amaute’ ma in Lambu sem pen Kawlgam bup na lengah Kawl mi kician zong kitam naii lo hi. Kawlgam suahtakna ngah ma in Kalate vive hi zaw lai ding hi. Tedim ah sangkah lai 1954 – ‘58 hun sungin Tedim Lambu sem pen a min thei keng. Pakistani te hi a, a tate thum zong SHS, Tedim ah sangkah in Tedimpau siam mahmah tek uhhi.

Tu dong mahin PWCte in Kawlgam khuapi khempeuhah a khua a liatna a neuna tawh kizui in AE, SAE, JE vaii puak pia hi. Tua a omna khuapite ii kumpi inn thak lamna leh puah kikna, lam thak ziikna lam lui puahnate a sem a bawl dingin vaiipuak nei ahih manin, a omna khuapi peuhah department dangte tawh kithuah kul hamtang hi. Thu neite in sep ding geel ding khat om leh tua khua ah amaute mah koh masak sawl masak belin nei hi. AE omna khuapite ah Lambute mah sawl tangzangin nei ahih manin, Lambute pen a koi akoi ah kithei phadiak (popular) takpi mah hi. (JE – Junior Engineer cihna hi a, a tam zaw GTI ongsate mah ahihi. Zo pau in Lambuneu na cihsak mai un.)

Ei Zomite leh Kawlgam khuata khuano lamte in Lambu ciang bek mah na sam thei in Lambu a cih leh a lian mahmah khin akisa, atungsiah za min zong a thei ban lo ih hihi. Ahi zongin ki-ukna lamah Kawl pau pan mah a ih laak Myo-uk, Vuandok, Mangpi, Menzi za ciang ih zang kim thei tek ding hi.

Kawlgam khuano lamte ah Lambu te’ Bogyi mah na ci in atung siah Lam Vuandok, Lam Mangpi, Lam Menzi cih bangin a khua mu zaw diak pawlten na zang uhhi . Ei Zomite leuleu ciangin Irrigation Department a, SAE te bang peuhmah pen Lambu cih bekmah bulphuh in ‘Hawkguam Lambu’ ih ci nuam teitei lai hi. Kawlgam a PAT semte Zolai sia mah ih ci teitei mah tawh a kibang ahihi.

Tua bek tham lohin ei mi sung pan zong a diakdiakin biakna nasem Manglai Kawl lai siam mahmah pipite na dongin tu dong mahin, cik a khan a ka sep khak ngei naii loh SAE za ahi, Lambupa’ hong cih den keei ciangin, naupang khat in pu aw, pa aw.. beek hong ci lo a, ka minpi taktak tawh hongsap galgal ding tawh kibang kasa aa, maan gen mahmah mai leng, nop mawh mahmah na khat nei gige hi. Galkap Colonel/Major/Captain khat RSM/CSM/CQ/Sgt pa’ aw cih tawh akibang ahihi. Akitel semsem dingin Menzi khat pen Myo-oke pa aw ih cih tawh akibang ahihi. Ahi zongin ‘amaute in Public Works sung min leh za tawh kisai bang mah a theih loh mah ding hi’ ci in ka mawh sak ka khialsak hilhial kei hi. (Lambu–SAE sem lai sem ngeisate’ aw, kong simmawhna kong neuseekna hi lo hi. Hong thei siam un.) RSM – Regimental Sergeant Major, CSM – Command Sergeant Major, CQ – Company Quartermaster.

Tua hi a, Leitung Pilna lam (Secular Education) nakpitak a sin ding nasia takin kong hanthawn nuam hi. Tuhun ciangin biakna sang lam vive ah ih kikhol nianua hi. Ei leh ei sungah ih buai leltak hi. Hoih lo hi aci vinven ka hi sam kei hi. A khang a khang a, biakna sia a kisam tawntung ding ih hih ciangin, kitawlnga lo a akahkah asinsin ih om ding mah ahihi.

Ahi zongin atam zaw pek tham pen leitung pilna lamah kipia in kidem bawl ta leng hoih ka sa hi. Zomite department mun tuamtuam ah kumpi nasemin omin kihel zo kim leng, ih Zomi bup adingin tampi tak noptuamin kipicing zaw lai ding hi.

Hih ka thu lu tawh kisai in Kawlgam Public Works a nasem engineer kicite min leh za tawh kisai a thei nuamte adingin anuai a bangin kong gelh hi.

Name of Designation (Public Works)
(Old- Before 1990) | (New- After 1990)
01.AJE Asistant Junior Engineer | Foreman/Road Worker Grade (1)
02.JE Junior Engineer | Junior Engineer Grade (3)
03.SAE Sub – Asistant Engineer | -do- (2)
04.SAE (Spl) Sub- Asistant Engineer(Special) | -do- (1)
05.AE Asistant Engineer | Asistant Engineer
06.EE Executive Engineer | Executive Engineer
07.DCE Deputy Chief Engineer | Dy Superintending Engineer
08.CE Chief Engineer | SE Superintending Engineer
09.-nil- – nil- | Dy Director of Engineers
10.DE Director of Engineers | DE Director of Engineers
11.GM General Manager | DMD Dy Managing Director
12.MD Managing Director | MD Managing Director
(2008 Kum Ciangciang)

Nidang nasep ka lut ma in ka zumpi ka department min uh pen PWD (Public Works Department) kici hi. Tua zawh ko nasep luttung lamin –1969 kum hun lai in PWC (Public Works Corporation) kici leuleu hi. Tua zawh ciangin PWC kiphiat leuleu in CC (Construction Corporation) ci in a min kheel leuleu hi. Galkap kumpi hong khan ciangin PW (Public Works) ci in kheel thimthum ta leuleu hi. Ministry of Construction khutnuai ah nidang pekpek akipan Public Works leh NHB (National Housing Board) te koih hi. Public Works khutnuai ah department atuamtuam tampi takin kikhen thuah lai a, tuate kong ban gen nawn kei ding hi.

BSPP Hun Lai (1962 – 1990)
EE: ACE Assistant Commanding Engineer kici ngei hi.
CE: Commanding Engineer kici ngei hi.
DCE: Dy Commanding Engineer zong kici ngei hi.
AE: Engineer (3) kici ngei hi.
SAE: Engineer (4) zong kici ngei hi.
BSPP: Buma Socialist Programme Party

Kum 1997 masiah AE pan EE ngah na’ng kum 24, 25 bang sawt hi. A tungsiah zong mun tawm pha mahmah hi. Ka Construction Minister uh ahi, Gen. Saw Htun hongkah ciangin 1997 kum akipan Public Works athak in ki set-up/form-up a, ACE/EE pan a tungsiah za bang a zah sawm val in mun kisehin kiphuang hi. CE/SE mun bekbek pen zumpi a tu tawh bang tawh 35 val tak ahihi.

Tua hi a, a awng munteng pia kim pah ding ci leh za khan ding ol mahmah hi. Mun awng tam lua mahmah hi. Nidangin DCE mun pen Yangon Div, Shan State bekah koih hi na pi’n tun Roads & Bridges ah Spl Unit hong phuatkhiat ciangin unit 15 tuak hong phuangkhia a DSE post bang mun 30 val bang om thei hi. DDE mun pen nidangin om ngei lo a tun mun 10 val bang kiguang thei hi. Nidang in DE 2 bek om a tun mun 8 om hi. Ni dang a om ngei nai lo, DMD mun 3 om hi.

Hih ka laigelh lai tak (March 14, 2008) in a mun awng zahzahzah kiza khang sak leh AE khat zong om nawn lo in a za khangkhin mang ding uhhi. Asistant Engineer (Vuandok za) leh a nuai siah teng tampi tak a za a sim in (200 – 300) a thak zon beh kul lai zen ding hi.

Ahi zongin democracy ki-ukna dan tawh ih gam ki-ukna hong kikheel zenzen leh tu laitak aa Public Works te sep khempeuh pen company tampi takin hong sem hong la tek zaw ta ding uh a, Public Works in ki-ukna lam bek hong len ta ding ahih manin, tu a ‘new set up’ kibawl bangin a behlaplap ding cih thadah, tampi tak a khiap suk kik ding uh kul zaw bungleh ding hi. Banghang hiam cih leh Public Works in company dangdangte tungah ki-ukna leh QC (Quality Control) khawng bek mah hong len ta ding uh hi.

Public Works Sung Min Kisap Dan
Public Works sungah min kisapdan pen a tam zaw a za mahin kisam hi. Ki-ukna (Admin.) lam len ding a galkap bu hong lutte leuleu ciangin a galkap za tawh kisam zaw hi. Vuanzite bang peuhmah pen vuanzi aw kici lo in a mau za mah tawh kisam hi. A thu in engineer te bang EE a ngah a kipan a nuai a ten itna taktak leh a suan a muanna danin a za tawh sam zaw lo in ‘Sia aw’ cih kinak zat mahmah hi. Ko sung bangah zong ka Dy Minister khat uh (U Tint Swe) pen engineering subject nih kithuap tawh master degree ongsa hi a Saya ka ci zaw uhhi. A khatzaw pen a galkap za mah tawh ka hopih zaw uhhi. Galkap ulian vuanzi za leh a tungsiahte’ bang ‘Aba’ kici zaw lai hi. Tua pen Galkap kumpi in: “Galkapte’ pen Gammite ii a suan a muan a nu’ leh a pa’ hi “ cih lungsim tangpi tangta milip khempeuhte tungah hong vom hong keng sak nuam ahih ziakin, Aba/Kapa’/Daddy or Uncle hong ci sak uh hi ngiau tazen hi.

Awn Za Pau