Lamdang kasak leh ka theihnop sim gige “Zomite koi ah om i hi tam?”

Lamdang kasak leh ka theihnop sim gige “Zomite koi ah om i hi tam?”

Tusawng/tunai teng lupna ngakcip ka hih samloh hang dam lua phalo, ka lungsim zah a tang ziauziau zolo kahihman in munkhat ah omcip a laipeuh sim zel, facebook leh tweeter peuh pheklek zel, viber groupte peuh en zel, internet sung khawng pheklek kawikawi zel kahih leh “Zomite koi ah om i hiam? ” cih dotna khat in ka ngaihsutna ong phawng zelzel hi.

USA President 32na Franklin D. Roosevelt zi, Eleanor Roosevelt thugen ka phawk zelzel hi.

• 1) Great minds discuss ideas
• 2) Everage minds discuss events
• 3) Small minds discuss people

Zomite’ thu kikupna, social media tuamtuam a thu kisuah tuamtuamte ka et kawikawi ciang, idea kikupna bel om vetlo cihtheih ding phial dinmun ah ki om hi. Pawlkhat in thupiang khatpeuh ong gen zeuhzeuh a, tua tungtawn in tua thupiang thu kikupna tawh kibang pian ahih hang, tua thupiang a a kihel mimalte’ thu kikupna cih theih ding a tamzaw ki muthei hi.

Hih ka et ciang Zomite a tung a mipawl group 3te lak ah Group 1na ah kuamah omlo kici thei a, Group 2na ah tawm khawng om in, a tamzaw group 3na ah ki omlai hi leh kilawm pianpian hi. Ahih hang, a taktak in hih group 3te sung ah a kihel vetlo Zomi a tam penpen ihi hi.

Thu kikup cihbang omlo, vasi daingo kham bang a, ei’ cihdan, ei’ ngaihsutna ciat gen ngeingai lel ihi hi. Vai khatpeuh hang a tua vai tawh kisai kikum cihbang ihih kei buang leh thu khat peuhpeuh Kikum cihbang omlo (discuss cih omlo) tawh kibang hi.

Tua kawmkal ah Zomi tampi tak OR a tamzawte social mediate ah “ei le ei thu gen, i zin i vakna, i sep i bawl khatpeuh gengen lel, an nekna peuh, ei’ mimal vai tangkona cihkhawng leh milak kihelna ahih leh zong ei’ kihelna mun teng khawng tangkona” cihdan a tamzaw na hizaw pian hi.

A tung a i gen, Eleanor Roosevelt’ gen mi nam 3 lak ah kihel lo kitam penpen leh kilawm hi. Zomite koi ah om i hi tam? Pau Khat Suan