Zomite hopihna ~ Rev. Dr. Pau Khan En

Zomite hopihna ~ Rev. Dr. Pau Khan En

Kong it ka Zomi pih khempeuh aw, Tuma kum 2 laipawl a kipan in leitungbup pulpi natna ( pandemic) hong tung in tuihual bang in hual thum na ciang in nawkpi in hong nawk kha in i it i ngaih leh i muan i suan tampi in mual hong liam san khong uh hi. l lungzuang in i thaneem a, i hawmsuak hi. I pangpa in i thaneem hi.

Tua bek hong hi lo thong in gam le lei ki ukna ah hiamtawi ngongtat te khut sung i tung sawnsawn a, i dlipkua in a sihlawh aman lawh zong tampi i om hi. Ki ukna kituh na maimai hong hi lo- in, thuman ( dharma) leh thuman lo ( adharma) kisim kido na a hihman in Pasian um mi tampi thuman lam ah pang in ngongtat te’ hiamma nang ding in i kipan a, a nuntakna pia in a si a mang zong tampi mah i om mawk hi. I dah hi. I kap hi Khuangai in i thuum i taau hi. Hibang hun laitak in kongit ka Zomi pih te kiangah thu NIH kong phawk sak nuam hi.

A thu KHATNA ah, i thuakna khempeuh ah ei tawh hong om khawm in i thuak bangbang hong thuakpih i biak Immanuel Pasian in hong nusia lo- in hong ompih den hi, cih phawk in khukdin in lukun in Amah tawh i kizom den ding hi. Ama’ hong itna in kiliing ngei lo, kikhin ngeilo in kip ngiungeu den hi. (Isaiah 54 : 10)

Tua ahih man in laugawp liing gawp in kongkaw gawp lo- in i Pasian muang ngiungeu in upna ah picin i tuh ding hi.

A thu NIH NA in, buluh te ngongtatna pan i mipite hutnading vai tawh kisai in, hih politics lam ah uuk na siamna leh kivakna a nei makai te nong kikum uh a, kalung uh anuam hi. Minam kim in hih ngongtat te do na ding vaihawm in kithawi tek uh a tuabang mah in Zomi sungah zong eitawh kituak in vaihawmna zong om cih ka thei uh hi. Ahi zong in ko nautaang lam pan in kalunggulh pen uh in hih Myanmar gam a hiamtawi ngongtat ukna buluh te zunglot ding mah mah hi masa photphot hi.

Tua bang lungtup tawh vaidin na ah Zomi min in pawlnih khennih phalo in pawl khat min tawh i dinkhop ding mahmah ka lunggulh uh hi. Khen nih khen thum phakna in i tha hong neem sak ding a, mi mai ah hong maizum huai mahmah ding hi. Thukhun hong siam mahmah un. Galbang sabang in kinei lo- in unau khat bangin thu kikum khawm in i kilom khat theih ding lunggulh huai mahmah ka sa uh hi.Ko thu hong nget sak pha mahmah ung.

I mailam ding sau lai mahmah in mualmong et bang ahih man in eite khut kilen in mainawt khawm ni. Tung Pasian in Ama’ gamluah ding a, ateel Leitungbup a om Zomi khempeuh Thupha hong pia in Ama’ ading in hong zang ta hen! Rev. Dr. Pau Khan En