Zomi te leh Engineering pilna ~ Pau Za Mung

Zomi te leh Engineering pilna ~ Pau Za Mung

Thu patna: Enigineering pilna in, mihingte tawh, a piangkhawm pah hiaa, ahun ahun in, mihingte makaihin a nuntakna dingaa aki samhpi pente lakah, khat ahi hi. Tua pilna in thuukmah mah leh zaimah mah thuahin, nam tampi tak a om hi. Ih muh ngeiloh, ih zakngeiloh nangawn zong a om hi. Tutungin, tuate khempeuh ih gen zokei dingaa, zong ih genthei keilai dinghi. Tua hiaa eite’n, nisimaa ih nuntakpih theihpak ding, Engineering pilnate bek, ka hihtheihna bang tawh kong kumh ding hi.

Zomite theihngei dan, Engineering pilna

Eite ciangin ih zaakngei leh ih theihngei Engineering pilna in, inn lam na, lampi bawlna, leii bawl na, tuitha tawh meitha ngahna, mawtaw car set tawh kisai cihciang bangbek zaak leh muhin ihnei bek hi. Tuabek tham loh, Engingeer te aki sapna leh aki lawh ziate zong, JE (Junior Engineer) lah lambu, SAE (Sub-Assistant Engineer) te lambu, AE (Assistant Engineer), EE (Executive Engineer), CE (Chief Engineer) te lah lambu mah aci veve bang aki omlai hi.

Ahih zongin, ih theihngei, ih theihngei loh; ih zaakngei, ih zaakngei loh, Engineering pilna aki ci vai khuataang khempeuh tawh kisai sepna khempeuh te ah, aki pelh theilo thuguipi khat a om hi. Tua in, gamdangte in bang cigen cih, ka theihkei hangin, Kawlgam PWC(Public Work Corporation-Pahlah kah) te’ Engineering pilna tawh kisai a bulphuh kammal(saungpoh-motto) in,
“ Mian, Kaung, Tettaa” Manlaang, hawih, kimanh, “fast, good & economic,” acih in, hi ka salua aa, zong dik kasa mahmah hi.

Hawih cihna ah, hawihin et lawmbek hilo, too mahmah lai cihnopna a hi hi. Tua thu thumteng aki saaikimh theihtheihna dingaa geelna leh sepkhiat na in, Engineering pilna ahi hi.

A manlan mahmah hangin hawihlo, tampi bei; a hawih mahmah hang in zekai in tampi bei; tawm abei mahmah hangin, zekai sileh hawihloh thuah lai; hihbang dante in Engineering pilna kici theingei ngeilo ding hi. Tuate in tualsung khutsiam(lettama, pazaan) te pawl bekte ii a hihna ahi hi.

Aki telzawkkaan lai na dingin;
Sing kallpi tawh inn lamhna (timber structure)

Ka Engineering sangkah lai in ah, ka structure(a kallpi) Lecturer in, a tunggaa bang thute, inn lamhna tawh a genteh danin; innkhat aki lamhna ah sing kallpi(timber structure) ahih leh, a khuam(post) in 12”x12” bang hi’n, hiangzawwl(postplate), innkamh( tie beam), innsunh (rafter), innkaan(purlin), leh kawwmzawwl(wall frame)te in 3”x2” bang hibek leh (or) akhuam in 4”x4” bang hi’n, hiangzawwl, innkamh, innsunh, innkaan leh kawwmzawwlte in 12”x2” hileh ki khaiilua, ki saaikimhlo ahih manin a etlawm lobek hikei, ki samh lopi in ahun leh asum motbei ding ahi hi. Tua in, a khuam bek ki sialo in a dangteng ki sia leh; ahih kei leh a khuam bek ki sia in a dangteng bangmah ci nailo lai leh, tua inn in, Engineering pilna tawh ki sai kilkello ahih manin, a mawknapi ahi ding hi.

Tua baanah, agol penpen in ato mahmah hangin a dangte kisia leh tua agol pen golna in, tua innaa dingin bangmah phattuam na om tuanlo, amawk napi taktak ahi ding hi. Ato uhleh tokhawm ding, aki siat leh ki siakhawm ding baanah, manlang lah manlaang ding, hawihlah hawih ding, aki samhlopi in sum bei thuahna a omloh na dingaa sepna in, Engineering pilna ahi hi.

Engineering na aki sepna ah, a sem bulpite.

Engineering nasepna khat peuhpeuh ah, a piding pha belbelte in;

• (a). A geelte(Architech/Designer).
• (b). A bawl, a lam(Executing Engineer)te ahi uh hi.

A geelte (Architech-Designer)

Engineering pilna tawh na aki sepna ah, Architech te in a thupi belbel te ahi uh hi. Hihte nasepin a tungaa ahong ki gensa, Engineering Motto teng ki saaikimh sakaa a taangtun sakna dingin a geelte ahi hi.

Tuabangaa a geluh ciangin, inn lamhna tawh ki sai gen lehang; guah tamluatna( heavy rain), huihpi nunna(strong wind and storm), ziinlinnna (earthquake)te aa kipan (natural disasters) a piangthei ding thute tawh ngaihsun kholsa in ageel uh ahi hi.

Tua natural disasters te tawh kizui in, tua inn aki lamhna ding mun lei tangh nam( type of soil) theihna dingin soil test, huih khauhna(maximum wind speed) theihna dingin a beisa aa a piang ngeisate kan ding leh, nisuah nitumhna leh a lei lupzia tawh ki zui aa inn aki ngatsakna ding(orientation)te zong ngaihsut phat mahmah ding akul ahi hi.

Inn ngatna(Oreintation) athupit dan

Inn aki ngatsakna ding geelna ah, ni suaktuung nizangh(sun rays) pan aa aki ngah nilumin, mihingte cidamna dingin ahawih mahmah zatui namkhat bang ahi hi. Tua ahih manin, inn a ngatna lam ding aki geel ciangin, inn khat sungaah aki tam omna penpen ahi, leengnaa khaan( living room) leh lupna khaan(bed room) te bang, nizangh kaap theihna dingin, sisuahna lamah aki kawih hamtangh ding ahi hi.

Sunlam, nisat mahmah ciangin, tua khaante, nizangh in kaap hileh, kawwm(wall) leh ceiling te in tua ni lumteng huupin, zaan khuamial, khua vot ciangin, tua a nilum daat teng, khahkhia kikin, tua alum daat in, mihingte aa dingin dammawhna piathei ahih man ahi hi.

Asem, abawl, a lamte (Excuting Engineer)

Hihte in, Architechte geelbang teelteek tawh alam dingte bek ahihi.

Kua zaw mawhpuak?

Tua ahih manin, hihbang Engineerte nasepnate khat peuhpeuh thu khat peuhpeuh hang tawhin, ki siatna khat a neih leh, tua hangin supna baaina bek hilo, mihing nuntaakna abei zahdong bang ahih leh, Architech te hang maw, Structural Engineers te hang maw( gamdang bang hileh) ki kan pah( court of inquiry) tiu-teuin, ahi zawzaw thu ngaattakin ki bawlpah hi. A mawh zawzaw thongdaan ahih kei leh sumdaan ki liau sakpah hi. Supna leh baainate lulhna(compensate) ding bel, Insuarance Company te tawh aki sai hi. Ahi zongin ei gamah tuabang a omngei naikei hi.

Ka tuakngeite

Ka gennop thute aki telzawk kaanlai na dingin, Zomite tawh kisai, kei mahmah tuahkhak ngei thu tampi takte lak panin, thu gukbek tawh kong kumh ding hi.

Zomite lakah Engineering pilna anei a tam naikei hi. Athei sunsunte in lah a pilna uh zui in zat ding a tumh keizel uh hi. Tuabaan ah, theilo ci’n hilhin lak lehang, ahong awlmawh keilai uh hi. Tuabang ka cih theihna in a nuai aa genteh nate tung panin aki telthei hi.

(a). Laaitui Maansuang lei.

1968- kumin Laaituite’ Maansuang Suspension Bridge Mizo tapungte in a kaapsat uh hi. Tua aki sia gunlei puahkikna dingin ad hock committee kiphuan hi.

Tua laitakin ke’n PWC(Pahlahkah), Rangoonah ka sep laitak ahi hi. Keima tumhtakin tua gunlei lim phatakin aki bawlkik lohkhak ding ka lung ana hi mawh mahmah hi. Banghang hiam cihleh, keima khomin Engineering pil na ii a manphatna telzo ka hihman ahi hi.

Keizong PWC Head Office, Design Section ah paiin, Maansuang lei tawh asau na(span) aki naihthei belbel ding Suspension Bridge Drg: khat teelin,  ka khasum lang mah bei in ka lei aa, Committee Chairman pa ka khak hi.  Ka khakbek hilo in, tua drawing ii thu a teltheih na dingin limpha takin ka  telgen lai hi.

Ahi zongin committee in tua drawing na awlmawh kilkello in, atheih ngei sa dankhat uh tawh nana bawl phakik ziau lel uh hi. Ke’n ka neih khem  peuh phial bei in ka piak banglo in, kuamah in ahong thusim sakkei uh hi. Tua ahih manin, tua lei in, a sauveilo in aki siakik pah hi.

(b). Tua, no Engineer pilna in ki zangthei kei.

1989- kumin, Maansuang leii puahna dingin aki kanhna in sum tawm ka bei kei hi. Aki ngah ciangin K 320,000 bek aki ngah hi. Tua sum aki ngah na ding aki hanciam laitakin kuamah in ahong huhloh uh, banglo in, ki  ngahin aki sep ding ciangin, hausate tung panin aki tuhngah zokei hi.  Ki lung himawh lua ahih manin, Suspension Bridge Drg: khat ka piak leh, “ Tua, no Engineer pilna in ki zangthei kei,” ci’n ahong ki sangkei hi. Tua leite in, Engineerte in a etcik( monitor) lohna hangin, a sepdan abawl  dan a maanlohna hangin, a bei tuaklo dingpipi ah a bei baanah, too-lo  pah ahihna bel, aki nial theilo ding thu ahi hi.

(c). Zomi Diamond Sumbawl( Diamond Dealer) Mihaupa’ inn

1982- kum pawl dingin, diamond (sein) sumbawlin nei aa ahau mahmah meltheih Zomi khatin, Kawlpi a hawihna penpen munah innmun khat nei ahihna; tua a innmunah Kawlpi khuapi akhai ding inn hawih mahmah  khat lamh ding tumh ahihna; kei kiangah aki sap Drg: leh BQ ka bawlsak na dingin huhna ahong ngen hi.

Keizong, hau mahmahaa, Engineering pilna paakta in a thupit laktheihlai lai Zomite lakah a om lamtak ka theih ciangin, ka lung lah damsi, lah ka ki paakmah mahkaan hi.

Kei zong, tuabangaa ahong ngetteng thanuam takin, a tupna bangin Kawl pi khuakhai ding takpi ahihna tawh ki zui in latest model tawhin ka suaih  sak hi. Tuabek hikei lai, a phawk khakloh ahi, bang zahtak bei ding cih zong, rough estimate zong, flat rate tawh ka tuatsak ciangin, tualai sum  tawh K 12-tein bang bei ding ahihna zong ka hihsak behlai hi.

Tua baanah, GTI Engineer Supervisor khat khasum K 2,000/- tawh cialleh, tua inn lamh a mansiangna ding kumkhat kaan sawtlo dingaa, supervising charges K 24,000 kaan beilo ding hicih zong deihsakna leh lung himawh  na takpi mah tawh ngaihsut na ka pia thuah hi. Tua bangaa ka gente kul  a saklohna, sum a mawkna aa abei ding hicih, a ngaihsut lamtak bel, a  mitheek in ka telthei pah hi.

Tuazawh kumkhat zawh ding ciangin ka innkuanun khua ciah ding Kawlpi  ka tunuh leh, ka zintun na uh ah hong delhin, ka limsuaih sak tawh inn lamh ki panzo in, a langtaang sangin a tamzaw bang manzo a hihna a hong gen baanah; ka va etsak na dingin ahong sam hi.

Kei zong pai in ka va etsak leh, a inn pongsann a gaal panin ih et ciangin, kei suaihsakna bang ana hi bilbel hi. Ahi zongin a sunglam aa a nasepnate  bel, pilna tawh hilo, khutmaa(letza-workmanship) bel taw-letza hi’n, ka  muhphet in ka khuasitmul bang tholiang zahdongin ahi phiatphuat(ciann) mahmah hi.

Kua Supervisor tawh sem ahihna ka dot leh, Pazaan siate siamlel ahih manin, a nungzui teng tawh sem ahihna hong gen takpi hi.

Bangzah taktak beizo ahihna ka dot leuleu leh K 10- tein val beizo hong ci hi. Tua inn a mansiang dongin a seplai na ding atawm belbel K 15- tein  bang beilai ding ahihna, olno takin ka tuatsak theipah hi. Tua hileh, tua  inn a mansiangna dingin K 25- tein peuhmah abei ding ahi hi.

Tua inn lamhna tawh kisai a huamin ka genin ah, ka cihbangin Supervisor khat cial hileh, a khasum K 24,000/- kaan a beikei ding hi. A inn in, pilna tawh a lim ki suai bangin ki lamh hileh a hawihdan ding bel, tua laitakaa Kawlpi khua sungaa latest model suallo ding ahi hi. Nasia mahmah ding hi. A sum bei ding bel, ahi linnliann cihbel omthei lo ding ahih hangin, kei tuatsakna tawh tawmbang plus or minus K 12- tein bangbek hiding ahi hi. Tu in, K 24,000 a iiplahna hang bekbek in K25-12=13-tein a beibeh(sup) lawh baanah, a inn a semte ki ciatlohna hangin, a hawihna dingzah in ahawih zopal palkei lai hi.

(d). BAG, Tedim Biakinn tawh kisai thute

Hih Biakinn tawh kisai thu tampi tak ki genkhin zo aa, tu in Engineering pilna tawh kisai a thupi mahmah ih genleu leu ding hi.

1986- kumin, Bethel Assembly of God, Biakinn, Tedimin, K 100,000 val man ding tawh ki gelsakin aki septak ciangin, a lungdam nazah uh tawh ki tuakin ana thupi simlohna hangun, Engineering pilna ii saungpoh tawh aki tuak kilkel kei hi. Ahih hangin, tuabangaa ana hihna uh in, anuai aa thute hangin khial ka sakei hi.

Singapore khawngaa innte 20/30 storeys te bang, kei nangawnin ka et bekin, anuai aa akhuam ki dawkte in, higeeng’ gaang’in, muanhuai tuak  hetlo hi. Ahi zongin ka Engineering pilna tawh ka ngaihsut zom ciangin  a muanhuai mahmah ding ahih lamtak telmah mah ka hih manin ka muang mahmah hi.

BAG, Tedim biakin zong, aki design in, RCC structure tawh kigel hiaa, a mau mitmuh pakin ah, muanhuai hetlo ding tawh kibang mah ding hi. Aki geelna ah, a muanhuai danin, ahi linnliann aa aki design zawhciangin, amuanhuai zawkkaanlai na dingin(safety factor) 50% bang aki behlap lailiang ahi hi. Eg. Khuam tawi 100- apua ding khat tawi 150 pua dingin aki design ahih na tawh aki bang ahi hi. .

Designer in tuabangin safety factor a tamlakna in, amau aa dingin lung muanna leh ngaihmuanna a neihna ding ahih man ahi hi. Tuabangin hih lo hileh, ama design innkhat in huihpi nun simin, ziinlin sialin bang aci  taammaw, ciktak ciangin ahong puuk thong taammaw!, cih hi tawntung  dingaa, lungnopna, lungmuanna, ngaihmuanna omthei ngeilo ding ahih  man ahi hi.

Taangthu tomno(anedote) khat tawh helhpak lehang:-

Siavuan khat leh Engineer khat aki hona ah, Engineer pa in Siavuan pa kiangah, amau mi cina a bawlkhialh uh leh, leisungah ki phumin ki selcip thei pahlel hi. Ahi zongin, Engineer te a khialhuh leh ki sel theilo, ki mu kinkenh ahih manin, lungnop cih omtheilo hi, ci hi.

Tua ahih manin, Engineerte in a geluh leh, aniam geel (under-designed) ngeiloh na dinguh, a uang geel tawntungna dinguh ngaihsut belhin aneih dinguh akul ahi hi.

Hih safety factor tawh kisai in, hihbangin percentage tampipi tawh kituat leh, manlang leh tawmbei thei diai hiam? cihthu in a dothuai thu ahi leu leu hi. Ahi zongin economic ih cih ciangin pauklap hawih mahmah thu(reasonable) ahih kul ding hi, cih zong, aki telloh khak ding lung himawh huai kasa hi.

Tua ahih manin, BAG Biakinn a kallpi in, RCC(Reinforced Cement Concrete ) tawh hiaa, muanhuai mahmah ahih manin, a kawwmin apua ado  ding (bearing) hilo, adal lel dingbek a hihmanin, leiseek tunhlangh (half brick-4 ½”) dingin aki gellel ahi hi.

Tua hiaa, Biakinnpi a buppi (4-storey) aa dingin leiseek aki samh vekpi in, 300,000 ahi hi. BAG in sa ahong gawh tungtaangin, upa Bu Kam Cin Hang in a BQ a etkik leh, leisek kisamh 300,000 amuh ciangin,” aa…,hawih pah liann ei! en! Mualtuk ah leiseek ih halsa 300,000 ih biakinn buppi lamhna dingin ki cingpah liann ding hi ei!,” ki paaktak tawhaa a cihin, tuciang dong ka bilkha ah a luailai hi.

Tua a lamh laitakun a en dingin hong sam, ka cih tungtaangin ka check leh, a nuainung storey kiu-keu(a biakinn buppi ii seh 1 /30) a kawwm sahna half brick( 4 ½” ) ding kimlai, ka muhkhialh kei leh pi 3(3’) phial mahmah sahin ana lamhna ah, a biakinn buppi aa acing ding aki ci leiseek teng khempeuh, tualai bekbekah beikhin pahthong hi.

Tuabangaa a hihna in, hun tampitak beibehin, tawmbei hetlo ahih baan ah, a biakinn hawihna ki siasakin, aakno khebok aki cite (or)senthi-dauh natna mahmah bangin, abill liahluah hi.

Tua ciangin, a nuainung pen storey zong, drg. sungaa a dimension bang  in ki lamhlo in nana ki khel ahihna zong ka mupak hi. Hihte in kei pai tung  taangaa ka heem muhpak thute hibekaa, keinua aa ana hihzop laite uh  ah bang ana cihuh cih ka genthei nawnkei hi.

Ahi zongin ka lungnoplohna ah, a kallpi RCC mah in ana hihmah taam maw; tua hilo aa sing (timber) ahih kei leh siik(steel I, C,T,L beam)te  khawng tawh nana laih maw; tuabangaa ana laihuh leh a laihnate uh ii  khauhna(strength) tawh ki zui in aki laih ding zong tampi tak omlai ding  aa, cih ka ngaihsunsun thei hi.

Hihbangaa ka gen hamhtanghna in, kei gel khialhna hangin bangmah pianglo ding a hihna, ka ki suang kilkel kei hi. Ahi zongin, kei ka ki suan kei phialmah leh zong a dangte ahih ding ka lung ahi mawh zawkman ahi

(e). Evangelical Baptist Church, Tedim, Biakinn

1987- kumhi ci ingh. BAG, Biakinn, Tedim Drg. leh BQ ka manzawh ciang ahi hi. Kei kiangah EBC, Tedim upa pawlkhat makai in a biakinn thak lamh na dinguhaa aki samh Drg: leh BQ dinguh huhna ahong ngenuh hi.

Tuabangaa ahong pai uh ciangin, keima tumhtakin, thupi ka ki sasim pianpah hi. Banghang hiam cihleh, EBC ih cihin, ih Zomite sungaa mipil, miciim, miteii, mihau aki citeng ki kaihkhopna Pawlpi a hihman ahi hi. Tuabangaa huhna ahong ngetuh teng ka manzawh ciangin, BAG, Tedim te mah tawh a lungdamna uh kikimh ding ahihhangin, tuahpha kisa in ataai pihpah vinghvengh uh hi.

Tuabangaa ka cihtheihna ahangin, tua Drg: leh BQ tawh kisai gen ding, lak ding, hilh ding tampitak a om ding kimlai, amau tuabang tawh aki cingzo pah a sak manuh ahi hi.

Senior Pastor pa in hong sam phawphot

Atungaa bangaa ka cihtheihna thu in, tuma kum 10-val lai ding, khua ka ciah khat, Tedimah ka omlai takin, a Senior Pastor pa un a biakinn uh a et sak dingin, hong samphaw phot hi. Tuabang ciangin kei zong, a beisa aa ka lungsim noplohnate hong vengh kinghkenghin, lungdam leh ki paak tak tawh in ka zuipah hi.

Bangtak ahi taam maw ka cih simsim leh, Biakinn ka tunuh ciangin, a Biak inn ceiling( 16’ bang asang ding) tungah, kahlei khungto liangin hong kah sakin, keima geelnate, amau thu tawh a nasep, a nabawlsate a muanhuai  takpi mah hiding hiam? cihna tawh ahong enkik sak ahi gige hi.

Tua ceiling tungah, kuamah dangin hong zuilo, ka kahtoh leh, khuamial bikbekin, datmei( torch light) khat de in, ka enkawi kawi hi. Tuabangaa ka et kawikawi na ah; pilna leh siamna takpi tawh a tawmbel K 100,000 val man tawh aki geelaa aki tuat RCC(Reinforcedment Cement Concrete) innkallpi(structure) teng khempeuh, sing(Timber) kallpi tawhin ana ki laih ka mugiau hi.

Suangpial

Suangpial aki ci in, anuai aa a paikha khempeuh mah a suakta zo ngeilo Zomite thaang(trap) khat ahi hi. Tuabang keekmah hi ei! Hihin Biakinn ahi kimlai, Suangpial thaang a batkhaak ding, ka ommuanin ka ngaihsun khathei zelzel hi.

Hihbangaa ka cihtheihna in, innkallpi(structure) dan bek hilo, RCC leh Timberte ii dan leh zia theitel aa, kei ahong theihsak kei hangin, a thei leh a siam designer khat kumh( consult) in, RCC tak panin Timber Structure tawh systematically leh methodically tak tawhaa a laih ahih leh, tua in a lungnop huaipah hi.

Tua hilo aa, lettama, pazaante tawh RCC ding kimlai, Timber tawh alaih ziau khawng ahih leh, tua in Suangpial taktak ahi ding hi. Banghang hiam cih leh, RCC thaa(strength) leh Timber thaa in, ki khailua ahih man ahi hi.

Ka thunget na

Tuabang aa aki hihgawpgawp Biakinn bangkhat, huihpi nun guahpi zukkhat, ziinlin khat tawh ki tuakin a ki khoplai takuh ahih leh, tua in leitung ah Suangpial lian penpen khat ahi ding hi. Tuabang thu ka zaakkhak, ka theihkhak lohna dingin thu ka ngen tawntung hi.

2005- kum pawl dingin, khua ah ciah ding, Tedim ah ka tungto hi. Tua lai takin, EBC, Tedim biakinn aki lam manzo in, aki hong tuung ana hi hi. Tua biakinn thak, ka gaalet phetin ka mit ahong la zallmah khatin, aki design bang ahihloh lamtak ahi hi.

Tua in, aki design lai in, tua biakinn in, Zogam khuapi, Tedim khua a tawi sang ding ahihna tawh ki zui in, ahi ngiamhnguamh, a biakinn sung lutna dingmai kongpi(Portico) ah aki lut tao-tao ciang bangin, khuasitmul tho in, ih tunbang asaang nganggngangg liangna ding, ahi ngiamh-nguamh (grand) mah ding tup na tawh aki geel ahi hi.

Ahi zongin, a taktak ciangin, tua Portico in, aki geelna bang hi peuhmah lo, ahi diai-duai, ahi thellthall, api suahhetlo ahihna in, ka mit hong dongh pah liann ana hi gige hi.

Hihbangaa ahihna ahang ka dot leh, amun ki cinglo ahih manaa pi 5’ a na khiap uh ana hi hi. Amun ki cinlohna dingin, amau hong puak dimension leh contour bang dan tawh aa aki design ahi hi.

(f). Tedim Bible College

1980- huam, Rev. S. Pau Khan En in, BBC ah AGS a seplai ahi hi. Khatvei, TBC (Tedim Bible College) lamna ding, a meltheihte khat in huhna pia nuam a hihna; K 12- 16 tein a bei ding LST sanginn khat lamhna dingaa aki samh, Drg: leh BQ ka bawlsak na dingin huhna ahong ngen hi.

Kei zong, ka hihtheihna bangbang tawh ka lawmpa deih buang ci’n sun tawh zaan tawh cihphial dingin, nipi kal khat sung ka bawlsak hi. Ka manh zawhciangin, a mite khat a la dingin hong sawlin, tuapa in ahong leenlaak ziau lel hi. Tuabang ciangin, Zawng leh uungdii gah(monkey and coconut) taangthu mah ka phawkkha zel hi.

Banghang hiam cih leh, amau tuabang tengbek tawh kicing pah a sakkhak man uh, ahi hi. Kamdawn tawh ka zaakkik thu in, khatvei huihpi a nun lehtua sanginn puukin kicimh hi, cih thu ahi hi.

Bangmah tawh aki tehthei vetlo, Laaituite

Maansuang lei lamhna dingin, Laaituite in ahih leh, Engineering pilna ahi, Drg: leh BQ a sanin a sangthei vetlote ahi hi. Tua ahih manin, aki tehpih theih ding nangawn zong a omvet kei hi.

Zawng leh Uungh gah( Monkey and Coconut)

Sumhaupa, BAG Tedim Biakinn, EBC Tedim Biakinn leh TBC te in, a pualamah bawlsak hile uh, K 100,000 nuai tawh aki ngahzolo ding Drg: leh BQ te, a valthong takpi in a ngahuh ciangin, Zawng in Uungh gah atuah ciang in, tuahpha kisa in a taipih pah vinghvengh mah bangin, zong ahong nung heikik kilkel nawn beekkei uh hi.

Zawng tawh aki batlohna uh

Zawngin Uungh gah a taaipih hangin, koici kheh ding cih a theihloh ciang in a nusiat pah banglo in, amau ahih uhleh, a cihna ding theilo pimah in,tua Drg: leh BQ te mah zuilopi mahin a kiplet bilbel uh hi. Tuabangaa ahih na uh in, supna lian mahmah leh luangthu baanthu ciang dong ahong tun thei ding thu ahi hi.

Thu khuphna

Ih Zomite in ahih leh, Engineering pilna tawh kisai, sepna bawlnate ah, hihbang in aki lopthop hih gawpgawp hangin, ih Pasian hawihluat man ci ding ih hiam, tuciangciang bangmah gentham ding tuahsiatna ih tuakkha ngei naikei hi.

Tuabangaa ih tuahkhak ngei nailo in, Pasian hong hehpihna in, bang tanvei ciang( grace period) cihin, kuamah in a genthei kei hi. Tuciang dong tuakngei nai saplo ih hih ciangin, cihbek tawh ih omom dingin zong, aki awihuai nawnlo thu ahi hi.

Tua ahih manin, hih a tungaa aki tuakkha thute panin, painful lesson in la aa ih ki puahphat mahmah na ding tupna leh ngimna tawh in, haksa sapipi aa ahong suaksak ka hi hi. ( Excerpt from Pau Za Mung’s Memoirs)