Zomi North America Cup 2015 – Michigan taangkona

Dear Zomi tuukpeng uuk khempeuh,
Ahong tung ding Zomi North America Cup tuukpeng pawipi – USA gam Michigan State Grand-Rapids khuapi ah Zomi Innkuan Grand-Rapids innteekna tawh September 6, 2015 ni-in nasia takin kibawl ding ahih manin, USA gam sunga om Zomi tuukpeng team a lunglut khempeuh te kong sam uh hi.

Zintun ni – September 5, 2015 ( Saturday ) nitak 6:00 p.m. a nunung pen hi dinga, innteek Zomi Innkuan Grand-Rapids te thusiamna leh vaihawmna tawh zintun na ding inn leh neek le dawn limtakin ong vaihawmsak ding uh hi. Zintun nitak mah in tuukpeng pawi ong siim khempeuh lasakkhopna tawh kilawmtaatna kinei ding hi.

Zomi North Cup tawh theih huai thu pawlkhat:

1. Tuukpeng kimawl dingte in Zomi hi dinga, a nu ahih kei leh a pa, ahih kei leh a zi Zomi hi-ingh a kici te hi hamtang ding hi.
2. Team cing zo lo te’n khua dang pan la thei dinga, ahi zongin a lakna khua te in a nial a leh kihel theilo ding hi.
3. A khatna te Zo Daaktal khat, Medal leh $ 1,500.00
4. A nihna te Medal leh $ 750.00
5. Team lutman $ 300.00
6. Tuukpeng kimawl ding te khempeuh Zomi North Cup thukhunte a zui dingte hi thei bek ding hi.
7. Team Uniform ei mau deih bang tek kisilh thei ding hi.