Zomi Nam Ni : Alang lampan etna ~ Rev. Gin Khan Nang

Zomi Nam Ni : Alang lampan etna ~ Rev. Gin Khan Nang

Zomi Nam Ni 62 veina a sawt loin i zang ding uh hi. I theihsa tek bangin Feb.20, 1947 ni-in Falam khua-ah Zomite suahtakna ding thukimna kibawl a, hih ni pen ciamteh huai sa-in kum simin i zang uh hi. A lungdam huai khatah Ukpite (Hausate) thuneihna a bei ni hi a, siah piak a bei ni hi. Siah i cih ciangin kumsimin inn kim in an bung 6 (tangseu zong kici) Hausate kipia, Sa a mat uh ciangin a liang kipia, tuuktha khaltha ci-in tuuk sungin thakhat, khal ciangin thakhat ta kipia a, tuate a beina ni ahih manin suahtakna lianpi khat bel a suak hi. Ahi zongin alang lam panin en lehang i suakta takpi hiam cih kan huai ka sa hi.

1. Zomi Nam Ni pen a gamsunga teng Zogama omte in zang pha lo mai uh hileh kilawm hi. Kawlpi, Mandalay, Zangkung, Manipur, Mizogam cih leh gamdanga om te in limzat zaw hi. Hih pen bang hang hi ding hiam cih ka ngaihsun thei zel hi. Zo gama om, a leitang tunga tengte in i suahtak ni uh phawk kha lo uh maw, ahih kei leh suakta lo uh ahih manin zang ngam lo maw cih ka thei kei hi. Nung 2009 kumin Tonzangah kizang cih kiza. Tedim bangah a kizat lam kiza nai lo hi. Ahih kei leh sum leh pai haksat hang hi zaw maw thei khang. Lawmte khat in khua lui-ah Sial khat leisakin Zomi Nam Ni nuam takin zang hi cih hong gen ka za hi. Tua ahih manin suakta takpi hang i ci thei tam?

2. Falam kikhopna-ah mipi pen 5000 pha-in tua lakah mi 17 bek in nial kici hi. Pu Chin Sian Thang genna-ah khut lam loin a tu leh dingin khen uh hi ci hi. Hausate thuneihna a deih lo teng dingsak hi kha ding hi. 2009 kumin hih Los Angeles khua-a Zomi Nam Ni ka zat lai-un Pu Salai Nilian in a genna-ah, “Pu Za Hre Lian in hih kikhopna-ah mihing hih zahzah kipai lo hi. ‘Mi 500 zong a pha tam maw ci hi” ci hi. Mi paizah pen aki-uang gen hih tuak hi ci-in Pu Nilian in gen hi. Hih pen ahi kha thei mah tam cih huai hi. Bang hang hiam cih leh tua hun lai (1947) lampi zong hoih nai lo ding, kikawmna zong haksa mahmah lai ding, mi zong tam kithei nai lo ding, tuhun bangin kikawm nai lo ding ahih ciangin mi 5000 kikhop ding pen haksa mahmah kha dingin up huai hi. Falam khuazang bup zong 5000 pha nai lo kha ding hi. Tua ahih manin hih pen a mantak mah ahi tam cih huai hi.

3. Feb. 20, 1947 ni-a kikhopna pen Kawl kumpite pilna hi ka sa hi. Bang hang hiam cih leh Kawl gam in suahtakna (independence) a ngah khit ciangin Consititution kibawl a, tua Consitution sungah Hausa thuneihna kiphiat a, Zogam pen Superintendent in uk ding a, a zomah Asst Superintendent om ding a, phualpi kumpi (Zangkung) ah Minister khat om dinga, Minister ukna nuai-ah Superintendent in vaihawm ding ci hi. Hausate thuneihna kipia nawn lo hi. Tua ahih manin Hausate thuneihna pen kumpite phiat hi zaw hi. Sia Sian Cin Thang in a genna-ah hih Hausa thuneihna a bei ding ciangin Hausate ut loin, nial uh hi ci hi. Tua hi a, Kawl kumpi in Hausate a tawpsak zawh loh ding uh lau-in ei leh ei hong kitauhsakin, Hausate pen mipite hong nawksak suak hi. Hausate thuneihna a bei ciangin Kumi in siatvatna (compensation) pia uh a, Pu Pum Za Mang zong Rs.70, 000 (tua lai-in sum kibang kizang lai) kipia a, tua banah Kawlpi-ah Datsi zuakna permit (Petrol Pump) pia-in tawl khat sung datsi zuakin zong hau man mahmah kici hi.

Manipur gamah hausate thuneihna bei zo nai lo hi. India in independence a ngahna sawt mahmah ta, ahih hangin Manipur gam hausate bei thei nai lo mawk hi. 1980s lai-in Pu Go Khen Pau in (Health Minister a sep lai) hauasate tawpsak ding, compensation pia ding ci-in gen a, ahi zongin Hausa kipawlna Chief’s Association in nang ahih manin tuni dongin Hausate thuneihna bei nai lo hi. Mipi lam pan nawkna om lo zong hi kha ding hi. Siah bel kai zo nawn lo uh hi. Ahih hangin Village Authority-ah Chairman hi ding cih ahih manin thuneihna ciang nei lai uh hi. Kumpi huhna sum paite bangzah hiam ngah theihna lampi om hi ding hi ven, khahsuah nuam lo uh hi. Sadar Hills ah Kuki Hausate in a gam uh Nagate zuakin tu-in a gam teng uh Nagate khut sung tung khin dek kici hi. A dah huai khatah Hausate pen hereditary system zui mawk uh a, a pa a sih leh a tapa tungah hausa hihna kikoih mawk hi. Hih pen ngeina hoih het lo khat ahi hi. Mipi in i deih kitel thei lo cihna hi a, suahtakna gama a zat dingin kilawm nawn lo hi.

Ka gen nop pen ahih leh Hausate siah piak vangik a bei mah bangin lungsim vangik a bei hiam cih ngaihsut huai kasa hi. Gandhi in, “Mikangte ukna pan i suahtak mah bangin i lungsim zong a suahtak kisam hi”a cih pen man mahmah hi. I lungsim suakta zo taktak nai lo hi ka ci hi. Hausate khut nuaia om lai sangin galkapte (thautawite) khut nuaia om pen haksa zaw kha ding hi. Bang hang hiam cih leh Hausate khutnuai-ah nek leh dawn kicinga, siah tung siah phei kipia zo hi. Galkapte khut nuai-ah nek ding om lo a, lampi ei leh ei kibawl tawm kul a, kuli aana kithuak zo lo ahih manin Hausate hun lai ngaihuai kik phial leh kilawm kasa ci hi.

Thukhupna: Zogam pen Chin Special Division panin Chin State hong kipia hi. A thu-in State hi a, ahi zongin thuneihna khat zong hong kipia lo hi. Tu-in zong State min bek a pua hi a, bangmah nop tuamna khat zong om lo hi. Tua ahihmanin Zomi Nam Ni (Suahtak ni) i cih in bang hiam i nop tuamna, phatuamna bang teng hong pia hiam cih ngaihsun lehang ut huai ka sa hi. Mizogam, Nangaland, Manipur gam State ngahte en lehang, amau thuneihna nei uh hi. Sum zeek ding amau budget kibawl thei uh hi. Tua bang thupi a, lop tak zong ka sa hi. Zomi Nam Ni zang kei ni ka cihna hi lo hi. Zomi Nam Ni i zat ciangin hih thute ngaihsun pha kik zel lehang hoih lo ding hiam ka ci hi. Zomi Nam Ni i zat ciangin Zo ngeina lam leh lasakna ni bekin zong loin, Topa in Zomi, minam khata hong bawl buangin lungsim suahtakna mantak i ngahna ding, nek leh dawn kicing i neih zawhna ding leh Zogam pen gamnuam a suah theihna dinga Topa tungah thungetna hunin zang thei lehang deih huai ka sa hi. Tua hi loin, thungetna zong neingap lo, Topa zong phawk man beek loin hih ni gualnop bawlna bang bekin i zat leh a mawkna suak ding hi ci-in ka ngaihsun hi.

Rev. Gin Khan Nang