Zomi Movement – (Kei’ teldan leh lunggulhna)

Zomi Movement – (Kei’ teldan leh lunggulhna)

Zomi Movement icih in Minam sung kipumkhat ding, kihuai ding, Minam leh Gam ading pangkhawm ding, semkhawm ding, … cih a kipan alian azai mahmah leh khang sawnsawnte’ dong ah Minam picing, Minam lian, Thuneihna kicing a nei a zang Minam leh Gam suahna ding hi a, a tom in “Zomi Reunification” ngim le tup masuan in avek in huamkhin hi.

“Zomi” cih minam min in “Tedim, Tonzang, Lamka” gam sung a minamte leh tuapan a a zin, a lalte bek a huamsak peuh mah in Zomi Reunification lungtup, Zomi movement pi a balnen, a phelkhap, a kitukalh sak ahi hi. Zomi movement langpang ahi hi.

Zomi it a kinei hi napi, Zomi khempeuh genloh a vengkim a vengpam nangawn ah pawl le gal bawl a, mipi a khenkham denkeei zia le tong peuhmah Zomi Reunification lungtup a balnen, a khenkham “Zomi movement langpang taktak” ahi hi.

Tua ahihman in Zomi movement lunglut taktak i hih leh….

• I lungsim leh i ngaihsutna tangzai sak ni.
• Kikhen tawmtawm nawnkei ni.
• Khat le khat ki thusimna tawh lungsim kipia takpi in thu kikum, theihna leh ngaihsutna kigen kihilh ni.
• Ei’ thu bek thusa cihdan leh ei’ buu sep ding bek thatang hanciam cihdan lungsim suahkhia ni.

Buu semnuam lua mahmahte’n Zomi Movement thu hualpi pualam ah Zomi min paulap sese lo in buu sepna ding na zong tapeuh un.

I lungsim puakzia kituak a, i ngaihsutna leh i zia i tong a kihual ciang ong makaih, lam ong pii ding mi Pasian in ong guan mahmah lel ding hi.

Tu tadih tuabang ding mimal khatbeek, khatta zong i nei naikei hi. Minam bup kalsuan khop theihna ding a aciangciang pan a hanciam ki makaihna ciang hipan hihang.

Mual ong suahpih ding I kisap taktak pen, i kisap taktak pa/nu mu nailo, nei nailo hihang. I minambup kal suankhopna ding i lungsim lampi tangsak masa phot ni.

Extremism tawh kisai ngaihsut khak

– Thulu khat bek, vai khatbek ah na khempeuh, thu khempeuh,vai khempeuh nga a, extreme luatna pen picinna ding ong dongkhak mahmah ngaihsutna toi hi.

– Thu khat, vai khat peuh ah a extreme lua mimal makaihna peuhmah in mipi huai zo ngeilo hi. A tuacite mipi makai ding a kilawm lo cihna zong hipian pah hi.

– Thu khat vaikhat peuh ah uatluatna pen extremism hi a, tua a extreme luate thisimloh luatna zong extremism dangkhat mah hiveve zel hi. A nih in a hoihzaw om tuanlo hi. Pau Khat Suan