Zomi mi thupi khat tawh kimu ~ Hau Za Cin

Zomi mi thupi khat tawh kimu ~ Hau Za Cin

Zomi leh Zogam khualna in April 18, 2015 niin Singapore pan Zangkong ka tungto uh hi. April 23-26, 2015 sunga Zogam khuapi Tedim ah Zosuan Tuailai Khawmpi 2015 siim dinga ka zi NM Vung Deih Cing tawh a pai ka hi uh hi. Zangkong ah ka tun uh ciangin Nipini tawh kituak ahih manin tuani tawlnga in a Tedim Baptist Church, Yangon ah ka kikhawm uh hi. Zomi sungah a zahtakhuai leh i suan i muan khat ahi Sia Enno tawh zong kimu kha in amau biakinn ah ka khatvei kikhopna ahih manin nuam kasa hi.

Amah Sia Enno pen mipi lam nga in thugen ding khempeuh dawhsang tunga tutna kigualte lak ah a laizang ah tu sak uh a, a gei ah Hunuk, Thugen, Hunpan, Sumpi Ap, cihte tu uh hi. Siapa in Siampi Thungetna nei in mipi in gingtakin AMEN ka ci uh hi. Khangno Bible Camp cih khat om ahih manin Khangnote hun tampi ka zang uh a, lapawl siam takin kisa ziahziah in Camp Speaker Rev. Pau Lian Mung in thugenna nei a, P4: Piakkhiatna, Phatna, Paikhiatna, Pahtawina cihte siksan hi.

Tua khit ciang Zomi sungah mi thupi ka muhnop mahmah ka muh ngei nailoh a tamzaw in ‘Colonel pa’ ciin i theihziau Pu Colonel Khen Za Mung kiangah hawh dingin ka dingkhia uh hi. Ama kiangah hawh dingin ka genkholhsa uh hi a, ahi zongin a pumpi a thahat loh laitak na hi a, Zato pan a ciah zawh zong a sawt nailo khat na hi in inn ah a tawlnga in mi khempeuh lengla a do ngap loh laitak ahi hi. Pasian hehpihna tawh ka nget teitei uh ciangin hong theisiam in a hawh thei ka hi uh hi.

Pu Col. Khen Za Mung kiang hawhna

Kikhop tawp ciang kiciamna omsa bangin Colonel pa kiangah ka pai suak uh hi. A omna lam na gamla mahmah ahih manin luipi tunga leipi kidawh bang a thak sitset hi a, nuamtak in kikan phei hithit lel hinapi sawtpi mah kipai veve hi. Tutung in Zangkong khuapi sunga pen a golna ka thei semsem hi. Khuapi hoih mahmah hi a, khua nuam mahmah zong ahi hi. Ama mawtaw tawh hong vakpih lawm Vungh Suan Mang tungah nakpi takin ka lungdam hi. Amau Colonel pa tawh khua khat ahih ban vuah tanau kigamla lua nailo ahih manun ka hawh ding uh zong a piang thei hong suak hi.

Colonel pa pen “Tedim pan Zangkong Ah” cih laibu gelhpa hi a, ka kimuh ma un ka lungsim ah – bangcia a pha tam (a lian, a gol in kigen ahih cianga), a khansuah lai tam (upata in kigen ngei ahih cianga), tawlnga nuam ahih leh hong tutpih man takpi tam cihte ka ngaihsun hi. Ka kimuh uh ciangin ka upmawh sangin na tangvalzaw a a sam a kang viuviau pen mikang mel suah kik zawzen hi.

Zomi sungah pasal melhoih leh thacing, nungak khempeuh in a zatep ding a samzang uh tawh a zialsak nop ding pawl uh ahih manin ka muhsawm sangin ka pi muh zawkan hi. Ulian mel pua in paak viavua a, melhoih in thacing ahih manin a kum leh a mel kituaklo hi. Lampi ah kituak hileng – kum 60 pawl in ki um ding hi. A laibu sungah a tangval laiin nungak melhoih tampi tawh kimeltheih ahihna kimu a, a uanggen hi hetlo ding, a gelh khit loh tampi om lai dingin ka um hi.

A mu peuh in it ding, ngai dingin ka um hi. Zogam tangval ding buangin ngaihbang, thacing peuhmah hi. Lai Siangtho sungah Israel te in kumpi ding a teel uh ciangin a tun leh a melhoih, a pilna tawh teh uh ci a, Zomi ten zong tua bangin teel ding hileng Pu Mung kitel masa hamtang mai in ka um hi.

Mikang hun laia khang, mikang zia thei leh mikangpau zong ama pianpih Zokam zah a siam ahih manin a hunzatzia pen a khangto zaw mikangte a zuiin a nai, minit leh second in hun zeek hi. Kikemzo, kiukzo mahmah cihna hi (a man of discipline). Galkap bu a sin lai a India gam Dehradun khua a Indian Military Academy (IMA) ah inndei khat ah a ompih pa England pan ahih mana a kiukzo hi in ka um kei hi. Zomi galkapte makaih dinga tuhun a Punjab State, India ah a om lai pek pan kikemzo hi cih a laibu pan kimu thei hi.

Sun ciang nai 2 sung lum in ihmu ding, nai tua zah in tho ding, kisil ding, lengla do ding cih bangin hunzat dan ding gelsa in a nei diudeu ahi hi. Tuhun ulian sungah tua banga hunzeek detdet bangzah i om tam maw cih hong ngaihsun sak hi. Zomi cih i kam pan i pau theih ma a Zomi a na taai dimdemsa leh Zogam leh Zomi sungah a makaih khin ahih manun amau khan hun in Zomi sungah ulian leh bu hizah a om pen a hi thei ding mah hi cih hong ngaihsunsak hi.

A khangno lai vua Zomi khangnote a pattah nop dan uh leh pianna khua bek hilo pianna nu leh pa beh leh phung a it a ngaihdan uh a gelhte in Zomi pasalpha taktak ahihna hong musak hi. Leitung galpi huih nung hanga khua nusia a om khia, khua hong ciahkik ciangin a khangual leh lawmte ‘a cih simsimte’ zong ana awng nawnlo, singdang anglai na tangta uh (hiam khat) cih pen ama adingin a lungzuanhuai mahmah ding thu khat ahi hi. Lungsim van a khai bang dinga, ngaihsut pak ding omlo in hawm heuhau dingin ka um hi.

Ei zong khua dangah sangkah khia in i om laiin i khua lam ah i ‘cih simsimte’ i ciah ciang a zual nawn mel kei uh leh i lungsim bei in khua ciahkik ding zong i thadah mahmah hi. Nungakte adingin zong theihsiam huai veve sam – amau zong na ngaihsun dinga, ei amau lunggulh in i ciahkik tam, lunglutna dang neisa in i ciahkha tam ciin hong ngaihsun pelmawh ding uh hi. Tua hi a, ‘heina khatlo’ bel a gen hak, thu khat peuh a piang thei himawk hi. Mihing dan ci mai leng hilo dia!

A inn uh ka tun zawh uh ciang theitui a san kiukiau a inntekte in hong suah uh a, ka dawn khit uh, ka khuaul uh kam, ka tawl uh damta cih ciangin Pu Mung hong tho a, maitai takin hong khutlet in hong hopih a, kei kua ka hiam cih khawng ka kigen hi. Ka pianna nu Ciin Zam Cing pen Pu Son Khaw Hau (muinam Son Khaw Hau, saman thei ahih manin ‘muinam’, min kibang zong om ahih cianga) tanu upa pen hi a, a sanggam te Pa Suang Hau Thang, Pa Thang Sian Mung, Tedim ah palik sem Pu Nang Khan Kap (L) cihte ka gen ciang theilo ahih manin Pu Kim Khan Nang zi pen ka Nuno hi, ka nu nau ka cih leh hong thei pah hi. Pu Kim Khan Nang pen Capt. Mang Tung Nung i mawtaw hawl sem ngei ahih manin.

A bizu tunga om a laibu Tedim pan Zangkong Ah cih pen hong lakhia in kei hong pia a, adang zong bu 2 khawng hong pia thuah. Tuateng na sim lecin ka nuntak sunga ka nuntakpih leh ka lungsim gil a laizang thei niteh ciin hong gen hi. A laibu sungah, tun ka simsim ciang, Zomi i hihna a khang akhang in i lapsangna leh i mainawtsaknate ka mu a, Zomi adinga mapang masa Zomi mi thupi khat tawh kimukha ciin ka ommuan in ka angtang semsem hi.

A lupna tungah tu kawma a gente, a laisimna inndei a laidal hong lakkhiat hong lahte, a inn sunga maan kisuang zihziahte leh a lim in a kibawl van tuamtuamte in Colonel pa pen mi mawkmawklo hi cih hong mu sak a, amah bang Zomi sungah i khan kik ding thungetna ah phawk huai dingin ka um phial hi.

Nailang bang ka holim, tui dawn, innsung a vante leh laibute en in ka om khit uh ciangin – a siangtho nuntak a nungta ding, kisikna ding omlo ding cihte Lai Siangtho sung a simna leh a nuntakpihte pan a muhte a thupina hong vaikhak hi. Tawldam kik nuam ahih manin ko zong ka ciahkhia pah uh hi.

Ahi zongin itna leh deihsakna tawh midang hun pia zo hetlo hitase leh kei vai leh kei lunggulhna hong theihpih a nailang bang hun hong pia hamtang Colonel pa tungah ka lungdamna ka gensiam kei hi. Tulsing dawna Phualngo bangin paak viauvuau a Zomi hih hong angtangsak semsem hi.

Topa in Pu Mung khan kumte hong sausak in Zomi leh Zogam adingin aksi bangin a minthanna leh a sepnate taang tawntungta hen. Ka lungdam. Hau Za Cin (Phuitong Liim)