Zomi leh Zogam Hiah/Hihlaai-ah/Hihtak-ah/Hiai-ah!

Zomi leh Zogam Hiah/Hihlaai-ah/Hihtak-ah/Hiai-ah!

Lai Siangtho Kammal-tawh gualhsukna:
“Pasian’ Kumpigam note’ sung-ah (The Kingdom of God is within you) Luke 17:21)”. acih mahbang-in gam leh minam vaai taktak-pen minam aneite’ lungtang sung-ah a-om mateng “minam it” cihbang om ngeilo dinghi. Lungtang cihciang-in pumpi sung-a khuttum cia sabawk apum bilbel (heart) cihziau lamsang hilo-in, itna, veina, deihsakna, laainatpihna cihte khempeuh’ bulpi genna ahihi. Pasian ZEISU-in, “…….. na’ lungtang khempeuh-tawh na’ Topa Pasian it in” acih ciang-in lungsim ngaihsutna (mind) genna hilo-in “veina (feeling, emotion, psych, soul)” agen ahihi cihteng thukong honna cipak lehang!!!

Matthew 6:21., Luke 12:34
“Na’ neihmanpha omna-ah na’ lungtang om dinghi (For where your treasure is, there your heart heart will be also)”. Lungtang-pen taanglaai Israel paukam-ah lungsim’ sang-a athuukzaw tham-a genna hi-a, Paunaak 23:26 – Ka’ tapa-aw, na’ lungtang hongpia in (My son, give me thine heart) cih ciang-in, adiak-in ngaihsutna khempeuhte’ bulpi, zungpi, ngaihsutna leh theih theihna khempeuh apianna guipi acihna ahihi. Deihna-ah “lungsim” cihteh ngaihsutna leh theihna hi-a, “lungtang” cihciang-in tua ngaihsutna leh theihna khempeuh apianna bulpi ahihman-in “… na’ lungsim hongpia in” ci lo-in, “…. na’ lungtang hongpia in” aci ahihi.

Kammal zatzia mahmah-ah “lungtang” azangh mite abaan zolo ding-a hong kisehphial ahidiam “heart” khempeuh-ah “lungsim” ci-in hong kimuam, hongki thun mawk-a, “give me your mind,” cihlam tawn ahihman-in Pasian’ thuzuui te-inlah Pasian it taktak zolo, alim leh kam bek-tawh., minam it te’nlah alim leh kambek mah-tawh, lawmta, beh, khua leh tui nangawn lungsim ciangbek mah-tawh., khuahun zil-in kihei ziauziau, sumlehpaai zil-in kikheel ziauziau, minlehza zil-in kidang ziauziau., banghang? “Lungtang” piakzia hongki hilh ngeilo, lungsim ciangbek asaangpen itna akisak khaak ziak ahihi ci-in ka-ummawhhi.

Taanglaai-in “lungtang” agen ciang-in itna, hehpihna, laainatpihna, deihsakna, veina, cbt khempeuh’ bulpi agenna-in kizangh-a, ataangpi-in “soul” and “psyche” kha, khalungsim genna ahihi. Cidamna lamsang nunnasilsuuisiamzil (biology) siamsinna hongkhan ciang-in lungtang-pen ngaihsutna leh theih theihna, veina cbt’ bulpi hilo, tuate’ bulpi-pen Khuak cihthu hongki nungmuh hang-in tuate akimuh masiah Greek lungngaihsiampi Socraties, Plato, Aristotle te’ hunlaai nangawn-in “Lungtang”-pen ngaihsutna leh veina khempeuhte’ bulpi-in sehlaai uhhi. Tua ziak-in, Lai Siangtho sung-ah ngaihsutna, theih theihna leh veina khempeuh’ bulpi agen ciang-in “lungsim” ci niingniang lo-in, “Lungtang (Heart)” ci’n zangh uhhi. Zomite’n banghang-a ‘lungsim’ zangh kiaukuau ahitam?

Zomi Khang Tuihual gaal-et lehang, minam it cihteh atung-a lungsim niingniang hilo-in lungtang taktak-tawh itna bangzah I-mu dinghiam?

Lungsim-in tampi ngaihsun thei-a, angsung hamphat nading, minngah nading, meet nading leh mite’ phat nading cihte ngaihsun thei-hi. Lungtang-in ahihleh tuate khempeuh tel mahmah ahihman-in tuate angah nading muituum-in nei selo-in itna leh veina khempeuh bulphuh-in thugen lasakna leh sepna ama’ hihtheih khopkhop-in nei to-hi. Taanglaai kammal-ah hazaatna, minthannopna, kiphatsakna, duhhopna, huaihamna, aangsung theihna, deihgawhna, giitlohna leh hiamgamhnate ahihleh lungtang pan-a hong pusuak-mah hinapi “lungtang” kici lo-in “satak (fresh)” Galatians 5:19., 5:24 ahizong-in, “…angsung (self)” Matthew 16:24., Mark 8:34., Luke 9:23., kici-hi.

Zomi sung-ah “minam makaaipi” I-cihcihte ataangpi biakna lamsang-ahzong makaaipi vive ahihtawh kituak-in hih “makaaipi” ci-a I-minvawh mite-in minam-pen lungtang-tawh it lo-in pilna-tawh it hi ci-in kamu-hi. Pil thei mahmah uh-a, cidam thei mahmah uhhi, ahizong-in amau’ makaih mipite naakpi-in thazawm-in huih’ muut nana-ah hoisuk saksek-in hoito saksek uhhi. Khat hongdawk, “Chin hikhang, Zomi hihang” cisek., apaam diak-ah, “Ei Zomi Chin te” cisek., Zomi’ thu gengen kineih, “Chin teng mawtaw tungpan khia un acihteh ‘ko Zomi te-zong mawtaw saap pia ung'” peuhci-in Zomi kicihcihleh Chin akicihna lak-ah vaki kausi-phuum tantan, thugen angaite nangawn-in theilo zah-a hong mengcip….

Zomi minam makaai minpua deuhdeuhte ataangpi-in “lungtang neilo” uhhiam cihnop-huai mahmah-hi. Minam’ ading-in 1962 kum pan-in tuni ciangdong Zomite’ kisaktheihpih mahmah khop-a minlian zaliante ka’ en toto-a, minam’ ading lungtang anei khat mahmahzong kamu kei-hi. Ka’ etna mitliimlang a power tawmlua-hiam cihbel ka-thei kei-hi. Makaai ulianpite agensia-nuam hilo-in, minam vei kahih man-in angsung nusia ngam zahdong-a minam naseem “omngei-hiam” ci-in asuutsuut kahi-a, ka-mu kei-hi. Amau’ angsung nusia cih genloh, atungsiahte-in asawi-et khaakding bekbek kihta-a minam’ ading bangmah aseem cihthadah agen-a agen ngamlo hontang vive ahihlam ka-telcianhi.

Khalkha khawng-ah University khawng kilamleh alungdam gawpding mite’nbel hongna telsiam unla, Zogam-ah University genloh College nangawn omlo, High School gina sana-zong omlo, library kician-zong omlo, surgery namtuamtuam kibawl theihna zato gina-zong omlo, mizawng daaipaamte’ zat zawhding, lei zawhding zah-a zatoneu leh zatui hawmna phual khatbeek omlo, leitung-ah a free-a akibawl Tuberculosis (TB) nangawn NGO-in a free-a apiak nasann sum kila sawnsawn, NGO om sunsun pan-a a free akingah peuhpeuh mihau ulian teng-in buplaak zawlaai, apau ngamzong om tuanlo, “minam it” kicici bilbel, “minam it” akicici te nangawn-in tuabangte duhgawh seem zawlaai…..

Lungtang neilo vive’ vaaihawmna nuai-ah kidiahcip I-hih man-in mipi’ muhna ciangciang-ah zatui ahunbei (expired) te tawmnono-in lei-in siahuante-in amau’ private-in zuak-tawh, sut-tawh, piak-tawh naakpi-in mipihte’ sisan teep/dawn ngeekngeek-in hau hanhan ahihna leh aphinciil mahmah kumpite-in hongpiak sunsun taangpi taangta’ zatding lampi, leiį, innpi cihte lambuu (engineer) te-in tua vante azanghding taangpite’ sisan-mah dawn/teep-in alomlom-in sum ngahthei cih mipi-in mu ahihman-in tute tate’ ading thungen khempeuh-in “Siahuan leh Engineer,…” suah nading bekbek-mah ngenpah., ahoihlam-in azuun-nuam a-om zong-in, ataktak-in Kawlgam level-a siahuante leh lambuu te’ neek theihzia muhna tungtawn-a lunggulhna ahihi.

Gentehna-in, Man Suang Leiį akibawl nading USD 1000 kumpite-in dawi’ havang kaal-ah hongpia cipakni! Lambuu Pu Peng-in tua budget zeekding kumpi-ah ngen-a, aveengpa Pu Lawi-inzong kumpi-ah ngen-hi. Anihtuak-uh’n Man Suang Leiį kiptak, khotak leh hoihtak-a bawlnuam hilo-in, ama’ angsung-ah bangzah lemtum theiding cih duhhopna bek-tawh tua sum zeeknuam akituh ahihi. Pu Peng-in ngah cini: USD 100-tawh tungsiah maai-et., 100-tawh lawmte’ kam huu., 200-tawh vanlei., sepdingteng taangtha thagum-tawh sawl., ama’ ipsung-ah ??? Tuapipi-mah, “Laaituite leh akhua kiim-ateng ka’ khualna-tawh ka’ nasep…” cizawlaai., akam ahuk khitsa te’nzong, “Pu Peng mawkbel note ciangciang’ gensiat ngamding hilo., note’ ciangciang’ batzawh deksuaiding hilo.,” cici lel-uh….

Namdang lak-a makaai minthangte ataangpi amau’ thuakna, kipiakkhiatna, angsung nusiatna leh minam’ ading zumkong maangkong phuutngamna, anngolh akuulleh ngolhngamna, kolbulh khaukhih thuak akuulleh thuakngamna cihte-tawh aminam pihte’ maai-ah dingngam, pangngam uhhi. Zomi makaai ulian-a I-neih sunsunte amau’ ankuang nusia ngam cihthadah amau’ ankuang themcikzong asukha loding thute nangawn-ah taangtawng pekpan-a amau akhawi atote’ mit-heek kihta-in meikhup khekhe lel-uhhi. Amau’ ankuang asukha hetloding zato, siamsinna-a kipan mihing’ nuntaak nading-a aphamawh (essential., crucial, fundamental) silte nangawn aphu-ngam omlo (om lehzong lawhcinglo ahitam kiza ngei khollo)., amau’ ankuang sathau-tawh zol pihpiahleh akamlim ngaungau, tutphah khawng atuam-a nei leulau, …… “hausa’ ziak-in kuangzawn baan” acih bang-in amau’ khatehkia adawl ngei mite-in ahihleh pumgup, pumphat, pumpan giapgiap, tuateng-tawh taanglaai kumpite kisadekphial-uh hileh kilawm!!!!!

Hihte khempeuh aziak namtampi om ding-a, tuate’ lak-ah “Lungtang kihello itna” -pen guipi khat hiding-in kaseh-hi. Kuamah mimal-a kawkna omlo-a, anawkkhaak a-omleh bawkzek-a akinawkkha hiding cih eileh-ei kisuihmaam pahding ahihi. Hihte tuaci ahihteh paampaih ni-ei cihna hi zenzen lo-in, hihbang angsungtheihna leh duhhopnate ahithei zah-in khiam ni-in, “Lungtang”-tawh minam it theihding, “Lungtang khempeuh-tawh TOPA it theihding” kisin panpan taloding I-hihiam cihna ahihi.

Khenkhatte-in “thubeisa suutsuut, khantohna omlo” ci-in amu-zong omhi. Amau’ muhna-zong amau-tawh kituak hipah dinghi. Leitung-ah alawhcing minam, mimal peuhmah hunbeisa amangngilh, akitheihmawhbawl kuamah omlo khadinghi. Abeisa-a khialhnate mawkkoih kiuhkeuh lo-in naakpi-in research bawl-in, tua muhkhiatte (findings)-tawh tu-a kalsuanna puahto, zuunto ahihman-a akhangto hizaw-hi. Hunbeisa kinaaksuut phalua kisa-in Plato, Aristotle, Albert Einstein, Karl Marx, Charles Darwin, Emeil Durkhem, August Comte, Sigmond Freud, Carl Rogers, cbt taanglai lungngaihsiampite’ thuluanteng-mah naakpi-in thusinna-in kinei-a, tuate’ tungpan-in tu-a kalsuanna akipuah toto ahihi.

Zomi mipilpite’n ahihleh “apiang laaitak thu-ah” cihkhat nei uh-a, “apian ma-in apian nading geelkholhna (project)” nangawn paampaih phial uhhi. Dahhuai mahmah-hi. Thu khatpeuh apian ma-in geelkholhna, sehkholhna, khaukaih kholhna a-omlohman mah-in ahongpiang thu khatpeuh’ tung-ah kithuhual tak-a bawhkhop theihna, sepkhop theihna omlo pahpah-hi. Project omlo-in thu khatpeuh hongpian lehzong alum alet-in hongpiang lel-a, kitoknawina leh kitukalhna bekmah-tawh mualkhum den-hi. Abeisa-a muhna leh saannate ataangpi khangthakte-in paihkhiat kuul ta-hi.

Giinkholhna (Project) lo-in masuan lianpi kipang ngeilo-a, kipang mahlehzong ahiding bang-a lawhcinna leh taangtunna om ngeilo ahihman-in Giinkholhna neihding ahihi.

Giinkholhna-ah lungtang lo-in muituum (target) kikha loding ahihman-in angsung duhhop huaihamnate paaikhia-in veina neih theihding kisinding ahihi.

Giinkholhsa-tawh kituak-a kalsuanna-ah kitukalhna a-omloh nading-in giinkholh ma-in giinpihding-a kilawmteng kamkum khawm-a geelkhawm masakding ahihi.

Geelna-tawh kituak-a akiseem ahih naaknaakleh (hunlehmual zil-a lohtheihloh laih akuul neuneu cihloh) kinialna peuhmah omsak nawnlo-a maainawtding ahihi.

Geelna-tawh giinkholhna mitsuan-in akisep naakleh ataangpi maa kitun dinghi.

Matut khit nangawn ciang-in tua abeisa sung-a thaneemna khempeuh kalkhia (analyse) ngiat-in, masuan adang zopna-ah bangci pelh theihding cihte laaksiamna-in masuan limci sak seemseem dinghi.

Geelna, giinkholhna cihte apian theih nading-in kipawlna’ tuplehngiim (aim & objective) kician tak-a gelhtheih, kaihtheih, guantheih kisam-hi (tua ahihman-in penglam gaalkaap ahauhman khawng-a tutphah hongtu a-om limlimleh cikmah hun-in geelna, giinkholhnate piang ngeilo ding-a, apianleh tuabang mite’ mindeihna-tawh mapanna ciang bekmah hilel dinghi).

Kipawlna-in tuplehngiim kician aneih theih nading-in khang tuihual-tawh atonkhawm siam, lungtang-tawh a-it mi kisam-hi, banghanghiam cihleh “lungtang” lo-in tampi kigeel nianua-a, mipi’ maai khawng-ah kigen zuahzuah pongsaam napi-in ahun ciang-in bangmah hong kiseem hetlo lelmawk zeel-hi.

Lungtang-tawh kampau-in lungtang-tawh it-in vei thei lehang nang leh kei I-ki muhdah nading, I-ki hazaat nading, kigaalbawl nading khatbeek ka-mu kei-hi. Mipihte’ muhna ding khualna ciang khawng-tawh thugen lasakna-pen lungtang-tawh kilehbulh-a, minam khantoh nading khat mahmahzong kimu theilo-hi. Amau’ penglam gaalkaapte-in ahihleh “nasia saam-ei, thuuk mahmah saam-ei, pilvaai, piicinvaai taktak,….” cihsak pheenpheen lel-a, tuate-in minam susiasia-in, guh tung-a guu zuut bang-in hongzen lua-hi.

Pasian-in Lungtang hongkalh mahbang-in Zo Tuunnu-inzong Lungtang hongkal-hi. Kineihsiamna, laigelh siamna, thugensiamna, lukhuneelkaai beemciacia, meelhoihna, cihte hongkal peuhmah lo-hi. Na’ Lungtang bek hongkal-hi.

“Ka’ tapa-aw, na’ lungtang hongpia in” tu-inzong hongcici laai-hi.

Banghang-in na’ lukhuneelkaai khawngbek piapia-in laklak liatluat leltak na-hihiam?

Banghang-in na’ zaliatna, na’ tutphah saangpi cihteng khawngbek laklak lenlan na-hihiam?

Banghang-in mite’n “pilvaai tak-ei, nasia mawk-ei” hongcihding ciangbek-tawh na’ Tuunnu phatphat pongmawk na-hihiam?

Banghang-in “Zomi” ci phuunphuun-in na’ khuaveengte nangawn el-in langbawl kawmkawm-in “Zomi it” kicici laai na-hihiam? Nanglehnang akikheem na-hihlam theihhun mahmah ta-hi.

Banghang-in min-ngah theih nading lampi, sum-ngah theih nading lampi, sia septheih nading lampi, upa septheih nading lampi zonna ciang-tawh na’ Tuunnu hicih mawk na-hihiam? Tuunnu neilo sanggah kisa na-hihiam?

Mi khat-in ahun-amual zil-in kikheel thei mahhi, ahizong-in “lungtang” taktak kikheel theilo-hi. Kingaknaneilo itna (unconditional love) kisam-hi. Pasian bek-in anei hilo-a, Pasian mahmah-in nang leh kei’ tung pan-a hongkalh itna-zong kingaknaneilo itna ahihi: lungtang khempeuh cihteh kingakna neilo, mudah thei ngiatlo, langpang theilo, gaalbawl theilo cihna ahihi. Haksa lualo-hi; Na’ lawhcin hun-in Pasian na it-a, na’ lawhsap ciang inzong Pasian na it naakleh kingaknaneilo itna ahihi. Tua mahbang-in, makaai panmun na-ngah ciangbek-in Zo Tuunnu a-it na-hih lohding, upa panmun na-ngahman, sumkeem na-hihman, khangno makaai na-hihman, ulianpi daan-a hongki koihman bek-a a-it na-hih lohding naakpi-in kisin in. Piangthei-hi. Piang khinzo-hi. Kipawlnate-in hong paampaih-a, hong langbawl zong-in Zo Tuunnu na’ itna kiamsak kei in, na tampi na’ septheih omlua mahmah-hi. Na’ lungtang-in na’ sepding honglak den-hi. Om-hi, tam-hi, abuuk abaak-in sepding-in hongngaak-hi.

Lungtang-tawh a-it mi-in amau’ min kidawk nading sang-in minam’ phattuam nading mitsuan uh-a, min leh angsung bek-tawh a-it mi-in amau’ kidawk nading, amau’ patkhiat ahihkei naakleh seem cihthadah langpan den uhhi. “Na’ khut ziatlam’ nasepna na’ veilam theisak kei un” hongci ngeungeu Vaan Pasian’ deihna-tawh akilehbulh vive-in lungtang neilote gamta ahihleh nang leh kei-in lungtang neibuang, lungtangnei uut buangding hihang! Ulianpi neihsate khalau thapaai-a, ‘naupangvaai’ hongsak mahmah-uh hang-in lau nading omlo-hi. St. John-in, “Itna-ah launa omkei” ci ahihman-in thumaan genna, minam min maan gennate-ah lau hetlohna-in itna’ gah khat ahihi.

Tua ahihman-in, I’ lungtang-tawh Pasian it siamding kisin kawm-in, Ama’ piansak Zomi-zong lungtang mah-tawh it siamding kisin lehang-a, thumaan genna-ah lauloh kisin lehang “Zomi leh Zogam Hihlaai-ah Om-hi” kici thei tading ahihteh kipat ahun naaidiam ci-in adam theilo I’ meima anaaiphual kiingkeeng-pen anaai hong dawtkhia kiik pak-ing. Sisan, sigel zong luangthei khamawhloding-a, anaaiteng leh asisan hoihloteng luangkhialeh damlam manawh zawding lametna-tawh,

Zomi Pasian’ Thupha!
Zokhai