Zomi leh Social Media ~ Pau Khat Suan

Zomi leh Social Media ~ Pau Khat Suan

Nidang in i thu zakna media pen Radio leh Tadensa/ Newspaper hi a, khuahun kikhel zui in TV ong kibehlap hi. Tuahun lai mimal thu kizakna pen laikhak / post office leh sikkhau kisat (telegraph) ahi hi. Hun kikhel zui in fax ong kizang a, tuahun tawh kizom a sawtlo in email kizang hi.

Zomite lak ah zong leitung mun tuamtuam ah i zinkhiat, i kitheih khiat kipat leh email nakpi a a kizat hun ong kituak to a, email group tuamtuam i nei hi. Tudong mah tua email group te tawmtawm kizang lai hi.

Ahi zong in hun ong pai toto a, tuhun ciang in facebook, twitter, messenger, viber, whatsapp, wechat, … cihte kizang in, email leh telephone nangawn sang in ki limzat zaw ta hi. A kizang ngei Newspaper, TV, Phone.. cihte kizang nawnlo ahih samloh hang tuate sang in hunthak kizopna media te kilimzat zaw ahihman in hihte ah thu kicing zaw, manlang zaw ongsuak hi. Mailam ah bang ong om diam, bang ong piang diam thei nailo hihang. Athak thak, ahoih leh a manlang deuhdeuh bel ong piang toto lai ding hi.

Tua ahihman in hih media te nawlkhin, nuaksan, zakdah pong theih hilo a, a hoih leh muibun a i zattheih ding a thupi ahi hi. Hun paipai a, nate kikhel khel ahihman in, ei’n tua hun kikhel i delh kei leh e’n mi a phalo, khuahun a phalo hilel ding hang a, hun leh mite’n ong paisan ding hilel ding hi.

Minam in midangte i phaknop leh minam kipawlnate ah hih media te muibun tak a i zat ding a thupi leh a kisam ahi hi. Information technology khantohna tawh kizui in internet sung ah thu kim mahmah ahihman in khangthakte in internet leh social media te pan pilna leh thutheihna sin lel, kaikhawm lel uh a, mi thu dong tangtang nawn khollo uh hi.

A diakdiak in Zomite in tulaitak facebook ki nakzat mahmah ahihman in i kizopna leh kithuzakna ahoih pen facebook ahi hi. Ahi zong in mimal friend 5000 ciang bek kinei thei ahihman in mimal a lai post in Minam bup zel zolo hi.

Mi tampi in thei hen, theih huai i sak thute

1) media group te ah post (or) share huai hi.

2) mimal a aki postte hoih i sak a omleh khat le khat i friend kibang lo ahihman in, ei’ wall mah ah zong share sawn huai hi.

Tua hileh thu kizakna manlang ding hi. I theih kibang in, i ngaihsutna kibang ding a tua in pilna thu theihna leh ngaihsutna ong kihual sak in Minam maban ah kipumkhatna tawh manawtna tha ong guan ding hi.

Thu hoih leh pilna deihhuai natheih leh share sawn in! Pau Khat Suan