Zomi leh Makai ~ Cin Khaw Mung

Zomi leh Makai ~ Cin Khaw Mung

Thupatna :: Mikhatin makai sem ih cih ciangin mawk sep theilo a, a sep nang mun (position) kitangsam hi. Panmun neilopi in lah makai ki sem theilo a, panmun nei a makai khempeuh lah a lawhcing hi khin tuanlo zel hi. Zomite’n hih panmun thupi ih sa mahmah hi. Panmun nei khat pen na khempeuh hih theihna power, authority nei ki sa kha in, tutphah tungah tu in, tua a panmun pen tutphah tung pan a len mite hi hang ci in ka ngaihsun hi.

Tutphah tung bek a tutna pen makai hoih leh makai lawhcing hi lo a, Makai hoih ih cih pen leilak ah zong tut theih kul ahihi. John C. Maxwell in “panmun pen makaihna ah a niam pen dinmun” hi na ci hi. Makai suah theih nading in panmun kisam a, tua panmun pen thu neih nang hilo in, nasep theih nang hun hoih ngahna mun hi zaw hi. Tua thei in ih tel nak leh ih makaih sepna khat peuhpeuh ah lawhcing ding hi hang.

Makai hoih suah theih nading

Zomi leh makai cih thu ih ngaihsut ciangin, a ngaihsut tak mahmah thu ahihi. Bang hang hiam cih leh Zomite pen nungzui hoih, nungzui gina leh nungzui kician hi na pi’n makai hoih, makai gina a ki tangsam minamte ih hihi. Makai cih pen nungzui neilopi lah makai ki ci theilo a, nungzui nei khempeuh lah makai gina hi khin tuanlo leuleu zel hi. Makai hoih i cih in thu neihna hilo in, sepkhiatna tawh makaihna ahihi. Makai hoih leh makai lawhcing ih cih te pen gelkholhna kician nei a lam man tawh a mite a makaih siam mite ahi uhhi.

Zomite makai cih min a deih leh makai a ut mite hi hang ci in ka ngaihsun hi. Thu khat peuhpeuh thei in-thei takei leng, tel in-tel takei leng, siam in-siam takei leng makai dingin hong ki seh nak leh niallo in a mangpah thei te ih hihi. A makai thei ding leh a makaih siam ding hi leng bel phamawk kei ven. Makai ih ut zah in lah makai hihna dinmun taktak a la zo kitawm mahmah hi. Tua ahih manin, ih hanciam zah in ki gualzo zolo leh ki muibun thei taktak lo hi. Zomiten ih lelh mahmah khat pen Makaih cih min ahihi. Tua ahih man in Makai hoih i hih theih nading in thu tampi tak lak pan a nuai a teng en suk ni.

Nungzui kician hih masak kul

Greek Philosopher Aristotle in, “Nung zui hoih ahi theilo te Makai hoih hi theilo hi” ci hi. Nungzui kician, nungzui gina ahi ngeilo makai tamlua ihih manin, makaih zia kitel kimlo ahih manin ih makaih na mun ah ki muibun zolo hi. Makai na ut leh nungzui hi masa phot in la, tua ban ah sin in tua khit ciangin makai sep pat ding ahihi. Tua hi leh muibun in mi tampi tak te ading makai hoih na suak ding hi.

Gelkholhna, Lam lahna kician neih kul

Gelkholhna kician tawh makai theilo ihih manin makai i sep hang khantoh nang i sep tawm mahmah hi. Lian Muan Kim in a lai gelh na ah, lai-at siam Katherine Anne Porter in, mipi 50% in koi lam zuan a pai cih theilo uh a, 40% in a pai nang mun uh a khensat theihloh laitak in 10% bek in koilai ah pai ding cih a thei uh hi, ci-in gelh hi.” Tua hi a, mi tampi takin tupna leh gelkholhna kician a mailam ading uh nei khol theilo ahih man un, a kalsuan dan ding uh lam man a lak thei ding makai kician kitangsam uh ahihi.

Tua ahih manin, makai khat in mipite tha zawh ding hilo in, ih thu zawh theih ding kitangsam hi. Tua bang hih theih nading in, gelkholhna kician tawh lam maan lah theih ding ngaihsut huai mahmah hi. Ih gel dan zong hoih, ih lam lah dah zong hoih mahmah na pi’n a ki sam khat in bang hiam cih leh ei mahmah in ih patkhiat ding ahihi.

Sepkhiatna

Sepkhiatna tawm ahih manin kilawhcing zo taktak lo hi. Makai ih hih leh sep masak ding sangin sawl ding lam a ut masa zaw mite ih hihi. Makai hoih ih cih te pen sawl lam sangin ah, sepkhiatlam a hau te lawhcing zaw uhhi. Ih gensa mah bangin, tutpha tung a tutna bek pen makai kician hilo hi. Makai sepna ah tut hun om a, sepkhiat hun om hi. Na sepkhiat hun sangin, tutphah tungah na tut hun atam zawk leh na makaih sepna ah lawhcinna taktak ngah zolo ding hi teh. Makai khat na hih leh mipite khualin, nang mahmah in mipite etteh dingin mapang in, na sepkhiat masak ding kitangsam mahmah hi. Mipite in makaite hong encik mahmah uhhi.

Thu khupna

Zomite sungah bang hang kithutuak lohna, kikhenna tam hiam cih leh, makai te ki thu tuaklo ahih man ahihi. Tua hang mah in zong i minam sungah khantohna omlo in, ki langbawlna khang hi. Pawlpi khat le khat ahi zongin, kipawlna khat le khat ahi zongin, kipawl theih ding sangin ki-elbawlin, na sepna ah a ki dembawl te ih hih man in khantohna tawm pah hi.

Tua ahih man in makai te ki thu hualin, ki thutuakin mapang khawm thei leng i minam sungah ki itna, ki pumkhatna leh khantohna bukim om pan ding hi. I minam sung a khantoh theihlohna pen makai ten deihsakna neilo ahih manin ki picing theilo, ki khangto theilo hi. Makai te in lainatna leh veina lungsim tawh mipi te makai lo in, angsung khualna bek tawh mipite makaih ahih man in khantohna tawm hi.  Tua ahih manin makai lawhcing i suah nading in kithuneihsakna lamsang khiamin, sepkhiatna, huhna leh panpihna lam tawh mapang in, i mipite lam alak thei kim dingin Topa’n Zomi Makaite thupha hong pia kim ta hen! “Makaihna i cih in thuneihna hilo in sepkhiatna ahihi” Cin Khaw Mung (PhD cand.) September 12, 2019 (Thursday)