Zomi leh khuathak ~ Lian Za Tuang

Zomi leh khuathak ~ Lian Za Tuang

Dear all Zomi, Zomite’n khuathak New Ciimnuai or New Tedim sat ding, cih thu pen thangah huai mahmah sa ing. Ahi zong tua ma-ah ih ngaihsut kholh ding thu tampi om leh kilawm ka sa hi.

Midangte le ei Zomite USA tun dan kibang lo hi. Midang Chinese, Japanese, Korean, Thai, Indian cihte pilna tawh tung uha, tung phet mahin siavuan khawnga kipan nasep hoihnono tawh zum thupi khawngah nasep kipan pah uh hi, khangno zaw deuh laite’n sangkah zomto-in, tua khit teh nasep maban khat pepeuh pen mipil u liante tawh thuk takin hong kipankhia uh hi. Houston khuapi sung zongah Sente khuapi (Chinese town) cih oma lampi’ minte nangawn senlai tawh kigelh zihziah zen hi.

Thangah huai mahmah ahih manin banghanga hiciang tung uh hiam cih ngaihsut huai masa mahmah hi. Mipil le mihau sa in tung uha, sumbuk thupi khawng nei uhin, amau nek le dawn silh le teente kicing zihziah saka, kumpi nasem sitni a kipan om zihziah uh hi, amau laka om mikang, mivom omte bang, nop salo uha tai sansan lel uh hi. Tua manin amau nget loh pi-in kumpi’n a piak ahi hi.

Eimite kumpi’n mun le mual hong pia mah leh zong, kua in company hong phut dinga, kua’n nasep hong guanin zum hong hong ding hiam? Ih ta i naute sangkah nading khantoh nading hong zekai mahmah ding hi mawk hi. Eimite pen US i tun tawh hi i kisak pah khaka i ngaihsut masak ding i sin masak dingte i phawk loh khak ding dah huai hi. Ih gam pilna niam lua ahih manin mi gam-ah i sin toh lai ding tam mahmah hi.

Namdangte US a tun teh ESL pan GED, college zom to suak uha ei mite bel Sushi, Sen ansai le company kilut pah hi. Ei mi mipil khat thugen ka zak ngei khat; i mipih kawllai, manglai sim theilote i vei luat manin laibu hoih i sakte khawng suplawh liangin letkhia, hawmkhia ta leng, a tuate mah laisim uk loteng na hi zel uha ei mi lakah laibu kikhawng zo mahmah lo, ci hi.

Kawlte bang pitek putek dongin bus tuankhawm, lam paikawm nangawn in laisim ngeungeu zen uh hi. Innsim-ah laibu kimu tek hi. USA ah zong eimi Pasian nasemte’n i mipih pau le lai theilohna hanga biakinn a zuan zolote veina tawh pawlpi tuamtuam kihong ta-a, tua bang mite mah kimu zolo zel thei hi. Pawi khat pepeuh a om teh kikhawm sun leh zong zukham sa khawngin kikhawm thei lai uh hi.

Khantohna pen mikangte le a dang mivom, Bene (Spanish)te zong kikhai mahmah lai hi. Mikangte le a dangte omna khuasung, mawtaw, meileng khawlna stations le zumsung, innsungte sianthonate kikhai mahmah hi. Eimi pawlpi a thupit zahkhat in mikang pawlpi, community tawh kizom-a, amau tung pan pilna i sin tohtoh ding zong thupi ka sa-a, a diak-in i tate maban dingin mikangte pilna, minam itna, Pasian itna le lungsim siangtho a neihnate guksak taak mahmah hi.

Eimite’n tu dongin i innsung, sabuai (table)te anbuk sungte dailenbuk sung puah dan hahsiang dan dong a kithei nai lo hi lai hi. Ih kongvang limlang sawpna (spray) nangawn zat dante dong a kisin tawm ding i hi pan hi. Pawlkhatte bang tutsa a dailennate a muhcil uh ahih manin a tungah din sa-in daileng bang ki-om ngei hi liang hi. Ei lam zato siavuan sem khat in hi lamte nurse khat i theih a theih loh tam mahmah dinga sin beh leh bel thei to pah ding hi. Tua ahih manin i theih loh lam thei-a, a sin huai a kanhuaite i sin toh ding thupi mahmah hi.

1975 kumin Thai refugee camp pan US a tung Hmong minamte bang, California, Minnesota le Wisconsin khuapite ah teng uha US te 2000 census ah mi 180,000 bang a om in kiciamteh hi. Ei bangmahin lokho singpua hihna pan US a tung uh hi-a, mi tung pan pilna laak ding, sin ding cihte ngaihsun lo-in a mau le amau a hong din pah u teh tu dong mahin khantohna nei thei tuan lo uh hi.

60% Khangno kum 24 tungsiah pilna sang pen bel high school ciang bek tung uha, 7% bekin bachelor’s degree pan a tungsiah tung bek uh hi. 40% pen mizawng ci-a kiciamtehna nuai-ah om uh hi ci’n 2000 census bawlna pan kimukhia hi. Amau zong US a tun zawh uh kum sawm bang a phak khit dong mahun a omna inn (apartments)te sung nangawn-ah akkhawi uh hi, kici hi.

USA ah om ta leng mite tung pan pilna sina i kikhansuah kei leh bangmah khantohna i nei tuan kei ding hi. Tua manin ei Zomite ih omomna tekah eimi le eimi ki-it kipumkhat kawmin i kiim ate nuntakna pan thuhoih, pilna tampi i sin beha i ta i naute hoihtak khan suahin hi leng; nikhat hunkhat teh gamdangte pilna siamna mah tawh Zomi khangno tampi takin ih gam i lei hong vei ding uha pilna sangpi tawh hong puah ding uh hi. Tua ni ciangin tu-a i vision te haksa nawnlo ding hi. Z – Zomite hanlungciam khangto diam!!! Zomi khat hihna tawh, Lian Za Tuang (1624 Westlake Dr. # 2403, Conway, AR 72034, USA)