Zomi leh Khuahun Kikhek ~ Hau Za Cin

Zomi leh Khuahun Kikhek ~ Hau Za Cin

Zogam thak a tung pawlkhat Zogam mah bangin amau bek tuamtat om hi cih khawng i zak ciang i tenna khua leh tui a kikhek zongin pumpi leh sigui sunga luang sisan leh ngaihsutna khuakte a lampi mah tawn in pai zel lai a, lamkhial taleh lam dik tawn dingin kilaih pahpah samlo hi cih hong theisak hi. Zomi kipawlna ah kipawllo, Zomi nopna dahna ah kidawk ngeilo, Zomi nopbawlna annek khawm leh gualnopnate ah kihel ngeilo zong honkhat ki om hih tuak hi.

Ngalkhat bangin tuamtat in, Saipi bangin lian kisa ihi tam cih khawng hong ngaihsunsak hi. Ahih kei leh pianna, tenna, khanna khua leh tui leh beh leh phung khawng peuh tawh ki-en in a lianzaw a khuamu zaw, a teizaw, a pilzaw, a bu zaw leh a makai zaw te in angvan a kisam, huai a kisam, pattah a kisam zawte huailo, khoilo in eima masuan bek mah en kha ihitam ciin hong ngaihsunsak hi.

Ei bek ciat kikhual ding ihih leh Zomi sum mahmah ding hi.

I tenna mun leh mual, khua leh tui, gam leh lei cihte hong kilaih ciangin i thu luanzia, i suahtakzia, i suahtaklohzia cihte hong kidang mahmah hi. Tua ahih manin i ngaihsutna bek kilamdang hilo in i tuak thute, i zak thute, i nawkkhak thute hong kilamdang zungzung hi. “Mimal suahtakna,” “mimal deihtelna”, “kum cingta ing”, “kumcing nailo hi”, “kei su kei thu (keima nuntakna keima thu hi)”, etc cihte hong kithang hiaihiai hi.

Zogam ah nu leh pa leh khuasung vengsung bek hilo, beh leh phung leh minam ngaihsutna tawh a kituaklo peuhmah pen mimal in a sepnoploh, ahih noploh ahi hi. Gam thak a tungte in midang nawngkaisak kei peuh leh keima nuntakna keima thu hi cih deihteel theihna (personal rights) cih khawng thupisak lua mahmah uh hi. Suahtakna a ci om a, zangsiam leng a manpha mahmah ding ahih hang zangkhial leng suahtakloh mah a hoihzaw ding tampi om hi. A suakta lua nuntakna pen tai suaksuak thei ahi hi.

Zomi te zong Zogam bek ah om nawnlo in midangte ten masakna gam, midangte nuntakna gam ah i va peem, i va lal zong tampi i omta hi. Leitung huihnung hi kici a, globalization hangin Zomi bek hilo in leitung mi khempeuh zong a tenna gam masa uh nusia in gam thak, nuntakna thak, ngeina thak ah na tai kawikawi uh hi. Tua banga gam khat pan gamdangah a kituah, a peem, a teengte pen diaspora kici hi. Zomi diaspora zong hunkhop ki omta cileng kikhiallo ding hi. Tua bang i tai kawikawina ah a omsa gam mite kiukzia, a ngeina uh, a thukhenna uh, a annek dan uh, a nasep dan uh cihte a vekpi in i zui khin pah kei zongin damdamin i zuihloh hong phamawh a, zuih khit dikdek lah baih tuan samlo hi.

Tu laitak pen Zomi te Zogam nuntakzia pan Zogam thak nuntakzia ah a kilaihtoh laitak hi cile hang kikhiallua lo ding hi. Adjustmeng period, buffer state ah om laitak cih bang hi a, Zogam pan i puak nuntakzia a hoihte i zuih kankan laitak, Zogam ah i neihloh mi gam ah i muh a hoihzaw te i toptop laitak ahi hi. Tua bang hun sungah i om ciangin bangteng kingaihsun leh hoih ding hiam cih nakpi in khuamuhna zaizawte i lim bawl mahmah ding thupi hi. Mimal leh minam mailam ding a theite in a zik kei leh mimal bek hilo minam in bah lawh ding ahi hi. Tua ahih manin thu pawlkhat – makaite, thu theite, laigelhte, laphuakte leh mipi tawh nasem khawm peuhmah in a mangngilh loh ding leh a phawk den ding, a kisam banga a sep pah ding a kisam pawlkhat gen khawm leng ka ut hi.

1. Kipawlna: Zomi bek hilo leitung ngeina ah minam khat pen paizia kibang ahih manin matut gualzawhna a limci leh a mite ading a hoih geelna in kipawlna a omloh phamawh hi. Minam kipawlna ahih leh minam lungsim nei a kipawlding ahi hi. Mi tawmcik kipawlna cihte pen club khawng kici lel ahih manin minam min puaksak keikai ding kilawmlo ahi hi. Mi khempeuh huam kipawlna deih napi lungsim kawcik tak a makai dinmun leh thu leh la khempeuh zeek den nuam keei cihte pawl i paisan kul ding hi. Minam sungah a nei a lamte bek thupi bawl in a zawng a nuainungte konlawhlo, khuallo a neumuh nuam pian lai cih bang kizang thei nawnnlo ding hi.

Minam vai ahih manin minam a huam teitei ding ahi hi. A kihel teng huam, a kihel nailo teng tuam bawl, tuam et cihte kizang thei nawnlo ding hi. Tun a kihel zong a kihel naikei zong Zomi ahih nak leh Zomi kipawlna khempeuh ah a kihel thei, a kipai theilo ahi hi. Zomi khat ahih nak leh minam min tawh kipawlna te ah zong kipawlna thukhun leh deihna bang zui a kihel kim ciat ding, member hih ciat ding ahi hi. Membership fee cih bang a om leh zong i piaktek ding ahi hi. A kihel manlo zong, a kihel mante zong a kibangin minam khat ihihna i kilatsak den ding ahi hi.

2. Nupa kikal: Zomi ngeina ah nupa khat pen a kiten khit peuhmah leh kikhen kik ding pen a kideih masa hilo hi. A nupa kikal uh nuam in nuamkei taleh, lungkim in lungkim kei tale uh a kiteen keeikaai ding uh ahi hi. Nuamsalo pipi, kilemlo pipi mah in a khantawn uh a kiten ding uh cih pen a kuamah peuh in a ngaihsut uh leh ahi ding mah in a koih uh hi. Tua manin nupa tampi nopsa kei tale uh kikhenlo in kiteng keeikaai uh hi.

Ahi zongin gamdang, namdang te ngei ah tua bang na hi khin khollo hi. Nuamsalo pipi, lungkimlo pipi in khantawn zat keeikaai ding cih pen a ngaihsutna uh tawh kituak vetlo a, zong utlo pah uh hi. Ka nu in hong awi kei, ka pa in hong awi kei, ka ni leh gangte in hong awi kei ciin kisuanna ding nei kikeuhlo uh hi. Ama deihteelna bek thupi a, a nu leh pa, a sanggamte nangawn in ama mimal deihtelna, suahtakna pen kham theilo, uk theilo uh hi. Tua bang mun ah Zomi te i ten ciang, i om ciang i lungsim ah bang hong lut tam? Bang ngaihsutna tawh i kalsuan tam?

Zomi ngeina ah numei in a pasal khen cih bang kiza ngeilo hi. Minam dang lak ah numei hita leh pasal hita leh a ut nawnlo zawzaw in kikhenna na bawl lel uh hi. Zomi te zong tua bang gam ah kitung kiukiuta ahih manin amau suahtakna zat bangin ei zong i zat theih ding leh a zang nuam zong hong kibehlap kha mai ding hi. Tua bang hong kibehlap semsem leh tua bang a zang ngeilo Zomi leh Zomipihte in bangci in hong ngaihsutsak tam? Makaite, thuneite, thutheite in tutkhop a vaihawm kholh ding a hoih diam?

3. Kumcing leh kumcinglo: Zomi ngeina ah bel tate in zi leh pasal a neih masiah uh nu leh pa tawh omkhawm hi. Pasal in zi bang a neih ciang inntuan pah cih bang kideihlo hilai hi. Nu leh pa tawh omkhawm phot ding, ta khat neih khit ciang dama inn leh lo kitawm dingin tua ciang “inntuan” pan ding cih Zongeina ahi hi. Zi nei panpan inntuan nuama kithawi pahte a nu leh pa itlo, khuallo ciin kimudah pah hi. A zi in sutuah, a zi zolo hi kici a, a zi kimawhsak hilai hi. Namdang leh gam pawlkhatte ngeina ah pasal khat in kum 18 cing peuh leh zi a nei in a neilo tateu zong a nu leh pa tawh omkhawm nawnlo uh hi. Nu leh pa tawh omkhop pen ‘picinglo’ ‘kingeksak’ ‘miphalo’ na ci bilbel uh hi. Pasal khat ahih nak leh kum 18 (gam pawlkhat ah kum 21) nu leh pa gawlvak kul nawnlo in amau leh amau nek leh dawn ding kizontawm, tuamten in thu leh la zong amau leh amau na kikhensat pah uh hi.

Zongeina ah numei zong pasal a neih mateng a nu leh pa tawh omkhawm a, pasal neilo hileh a teek dong mah a pianna nu leh pa tawh omkhawm hi. Pasal a neih baih leh innsung nusia baih a, a neih hak leh a nu leh pa tawh sawt omkhawm cihna hi. Pasal nei in kikhenna khat om leh a nu leh pa kiangmah ciahkik a, a pasal neihkik dong a nu leh pa tawh tengkhawm hi. A nu leh pa in s sihsan khak leh a sanggam pasalte bel in om thei lai hi. Gamdang, namdang pawlkhat ah tua bang na hilo in numei zong “kumcing” peuh leh tuam ten, inntuan pahpah lel uh hi.

Numei hi in pasal hitaleh “kumcing” ahih nak leh a sih dong uh amau thukhensatna leh a deihna uh a lianpen hita a, nu leh pa in bangmah amau nuntakna ah thukuppih theihna nei nawnlo uh hi (a kidong ahih kei buang leh). [Zomi ngeina ah bel midangte innkuan sung khawng thu tampi va kigenpih, va kuppih, va tawknawi gawpgawp lai hi hang].

4. Nutek Patek tawh kisai: Zomi te pen nu leh pa a khoi, a kem, a kivui ngiatngiatte hi. Nu leh pa in zong tate amau bek a tuam teen theih mateng a kem, a khoi, kum 30, kum 40 dong ciang nangawn a kikem, a kivakvak, a ki khoikhoi laite himawk hang. Amah leh amah kikemthei ding, kivakzo ding cih i theih hang a kikhen nuamlo, a omkhawm, a ne khawm, a zekkhawm Zomi te ihi hi. Nu leh pa in tate sawt kemlua, sawt khuallua ahih manin amau nuntakna tha leh ngal mahmah in zong amau nopna ding bangmah sem manlo in a sigui khempeuh uh, a guhtui khempeuh uh a kang zah dongin tate hong kem uh, hong vak uh hi. Hih pen ngaihsutna ciimtak tawh ngaihsut kik dingin a hoih mahmah thu ahi hi. Tate pawlkhat in nu leh pa kiang nuamsa lua in ‘gawlvak’ den leh ut uh hi. Pawlkhat in amau mahmah hanciam nuamlo in nu leh pa neihsa bek ah kinga uh hi. Thadahna leh hanciamlohna piangsak hi.

Gamdang pawlkhat leh minam dang pawlkhat, leitungah gam khangto, nam khangto icihte in tua bang na hilo in “kumcing” leh “kumcing nailo” ciin na khen ziau uh a, mihing ngeina kumcing khinsa pen amah leh amah a kikhual ding, a kidon ding, a kizon tawm ding cih ngaihsutna na nei uh hi. Tua manin nu leh pa tungah kingakcipna (dependency) na kiamsak mahmah hi. Kumcingta cih mana kihawlkhia, kinotkhia cih ahih pah samloh hangin kum tuazah pha leh tua bang a sep theih ding cih lametna kibawlsak uh hi. Tua lametna leh tupna in khangno khat hanciamsak a, lawhcingsak hi.

Zongeina ah nu leh pa in tate kem in khoi den ihih manin nu leh pa a teek ciang i kep i don ding pen a ngeina hipah hi. Ahi zongin gamdang pawlkhat leh minam khangto kicite gamtat dan ah tua na hikhin khollo hi. Nu leh pa kep ding pen “thupha ngahna” cihdan in na ngaihsun uh a, na hanciam uh hi; ahi zongin amau hihding, tavuan, duty or responsibility in na ngaihsun masalo uh hi. Banghang hiam cih leh nu leh pa in zong tate pen a “kumcing” dong ciang bek mah uh na kem in na pattah uh a, a val pen nu leh pa thusiamna leh tate deihsakna tungah tampi na kinga hi. A tate uh kumcing peuh leh nu leh pa in – a vak ding, a kep ding, a khoi ding pen a ngeina hi nawnlo ahih manin amau mailam ding kikhual in sum leh pai na kikhol uh a, “savings” tampi na nei uh hi – tua a savings (sum kholsa) teng uh pen a tek a huai, nasep theih nawnloh cianga zat ding, nek ding ahi hi.

5. Tate pattahna: Zongeina ah nu leh pa in tate pen amau theihzah, hanciam zawhzah in pilna siamna nei dingin na pattah uh a, a ban a sepzawh uh a om leh na hanciampih uh hi. Nu leh pa in pattah zo kei leh beh leh phung sung, veng leh pam, khua leh tui in a hanciampih zawh leh hi a, a hanciampih zawh kei leh a cihna ding om nawnlo hi. “Kumpi” cih “mipi kipawlkhopna” gambup leh minambup huam nei ginalo ihih manin a hanciam zolote pen a kamsia suakpah hi. Gam khangto leh gam thupite ah (minam khangto zawte zong na hipah mai uh e) “kumpi” in khangno khempeuh kum 14 a phak dong, ahih kei leh mihing khat in a theihdinga kilawmciang khat (basic education) a neih ding hanciamsak uh ahih manin nu leh pa in a lungkhampih kullo in “kumpi” in na pattah uh hi. [Tua pen gam khangto leh minam khangto leh a khangto laitakte kilamdanna khat ahi hi.]

Nu leh pa in tate a “kumcing” dong a pattah ding, a khoi ding, mi picing khat a suahdong, amah leh amah a kikep theih dong a vak ding a tavuan uh, a duty leh sep ding ahi hi. A vakloh, a keploh, a nusiat uh leh kumpi in tua naupang nu leh pa man in thu dong ding uh hi. Naupang khempeuh in pilna leh siamna sinin sang a kah ding uh pen “a hih ngeingei ding uh” ahi hi.

Zongeina ah tua bang na hikhinlo ahih manin nu leh pa kikhen leh tate pen a pi leh pu kiang peuh ah om in a nu in pasal dang nei, a pa in zi dang nei cih bangin a tate uh “thankik ta neih” cih bangin khoiloh, keploh in a suah khit ciang kinusia in amau leh amau a suahsuah suak dingin ki “ek nusiat” mawk thei hi. Tua bang hanga lawm leh gual phalo tampi om theih ding hi. Gam pawlkhat leh minam pawlkhat i tenkhoppih, i muh thakte ah i ngeina tawh akibanglo honkhat hong om ding hi. Tua bang hun ciang bang icih tam – Zongeina mah zanglai ding maw, ahih kei leh i tenna gamte paidan zuizaw ding?

Zongeina ah tate thumanglo pen tawzep a ngeina hi. A bil nuai, a tawzep, a sam phuai cihte a ngeina hi a, ki ukzia namkhat ahi hi. Tate in bang hihkhial hiam cih zong thei manlo in nu leh pa pawlkhat in tate thallot thei mawk hi. Minam khangto leh gam khangto zaw te ah tate ahih hang a mawhna uh theihsak ding, zawhthawhthu tawh “hai bawl” a, hong zo keina inteh cih mana ciangkang tawh a tawzep phei pah pen na zang khollo uh hi. Tate zong mihing khat ahih manin a khialh uh leh a khialhna uh hilh masa ding, theisak ding, makaih ding na ci uh hi. Kisat, kivuak leh tawzep cihte pawl na zanglo bek thamlo, a kizat leh kumpi thuneite kiangah kigen thei a, kumpi in a tate laksak in a nu leh pa tawzep kik zawthei hi. Tua manin a lian leh aneu zong “liangko kikim” in thukhenna na bawlsak thei uh hi.

A khangto nailo leh a pillo mite lak bek ah zawhthawhthu khawng a kizang zanzan lai na hileh kilawm e!

Tua ahih manin na tate na thuhilhnop leh thudik thuman na theih kul a, na theih kei a, na hilh theih kei leh na hilh ding zong hong kiphallo ding, hong kideihlo ding na hi gige hi. Kumpi leh thuneite in tate kem theilo pen a kem theite kiangah hong koihsak ding himawk hi. Zawhthawhthu leh thagum tawh na tate na pattah a mihing khat in a khantawn mi phaklohna a neihlawh sangin a kemthei a pattah siam khat in a pattah a gam leh minam ading mihoih mizattheih a suah ding a hoihzawkna na telmuh mahmah uh hi.

6. Midang thu kuppihna: Zomi te pen midang khat nuntakna, a gamtat dan, a kampau dan cihte nangawn a kigen ngaingai, a kikhawllua mahmahte hi hang. Zi neih ding nangawn “nei nailo maw”, “na zi hoih kei si e”, “na tate gilo si e”, etc peuh ciin a kigen giapgiapte ihi hi. Gitloh man leh bawlsiatnopna tawh a kigen ahihloh hangin genloh ding a hoihzawk lam i theih nailoh man na hi gige hi. Nu leh pa in zong tate gamtatna khawng kuppih khin nuam hi hang. Tate in zong nu leh pa khawng hawmthawh in ko bawl nuam, zahpih nuam lai hi hang. Meltheihte khawng in zong zi leh pasal neih vai khawng, sum zat leh zeekna khawng, kizep kipuah dan cih khawng ah zong kikuppih ngeingai nuam hi hang.

I hai man hilo a, i theih nailoh man hizaw hi.

Minam khangto masa leh gam khangto masate ah tua bang na kizanglo bilbel a, mi gamtatna leh omdan cihte na kikuppih khin khollo uh hi. A phatuam ding ahih kei leh na kikuppih lo bek hilo, gensiatna, hawmthawhna, leh cinglahsakna cihte na genkhia nuam sese lo uh hi. Mite dahna, mite tuahsiatna cihte khawng na kikum hetlo uh a, a lungdamhuai, a thalawphuai lamsang leh nuihna lam vive na kikumzaw uh hi.

Thukhupna:

Zomi te zong i Zogam pan i pianpih, i khanpih thuhoih lahoih tampi tawh tuipi gal kantan in gam thak, khua thak ah mi thak leh ngeina tuam neite lak i ten ciangin a tunga thute in i theihloh kikal in huihnung bangin hong nawkkha den hi. Bangcih ding cih pen i khentat siamloh hun tampi om hi. Zomi ngeina ahih manin a hoih khin hilo a, namdang ngeina ahih manin a sia khin zong hituanlo hi. A hoih leh a hoihlo a khentel siam ding eite ihi a, tua dingin i hanciam ding ahi hi. A theizaw, a siamzaw i omleh a kimakaih dingte i hi a, a kipattah ding te ihi hi.

I kipawlzia hong kidang dinga, i nupa kikal hong kibang nawnlo ding hi. Numei in zong hong deih kei leh pasal dang hong zuatsan ziau thei ding na himawk hi! Tate kepna ah nu leh pa thu bek na dikkhin nawnlo thei a, tate zong a pilzawk hun na om thei veve ding hi. Mite thu leh la tuibuk muam kawma i gen hit-hiat hunte hong bei hiaihiai dinga, thuhoih leh thumanpha bek i kikup nop hun hong tung peelmawh ding hi. Tua hun taktak ciang Zomi te zong leitung kiukhat beka kikulhcip hinawnlo in leitungbup a zeel, leitungbup kalsuanzia leh leitung minam tuamtuamte gamtat luhek a theite ihita ding hi.

Tua ahih manin Zogam nusia in gam thak i tun pen supna baina tampi a om hangin meetna leh khanna zong tampi kibehlap ding hi. A taktak in mi pha dinga eite hong bawlpa in hong vaihawmsak zong na hi khinkhian theizaw hi. Tua manin eite hong bawlpa mah mitsuan in i gamtat luhekna khempeuh ah Amah loin kalkhat zong suan kei ni. Amah Immanuel hi a, eite tawh hong omkhawm den hi. Hau Za Cin